成日話虎毒不吃兒，但凡事總有例外，我有個好幫得手嘅同事叫阿Dee，有日佢無端端走入房問：「我老豆有冇搵你借錢呀？如果有唔怕同我講，我一定會代佢還返畀你。」阿Dee嘅問題好奇怪，其實我聽唔明。
我：「點解你老豆會搵我借錢呀？發生咩事？你閂埋門慢慢講。」因為阿Dee氣沖沖咁走入嚟我間房，門都冇閂，但我當時真係一頭霧水，呢度又唔係學校，唔使見家長，我連佢老豆係咩樣都未見過，借咩錢呀？
阿Dee：「頭先Emma同我講唔好意思，因為我老豆上星期問佢借錢，但佢冇cash喺身借唔到，跟住我先知原來阿May同Sharon借咗，我還咗畀佢哋喇，所以如果我老豆有問你借，希望你同我講返，我會負責。」
愈聽愈多問號，Emma係HR，阿May係Receptionist，Sharon係另一個部門嘅staff，簡單嚟講全部九唔搭八，佢哋點識阿Dee老豆？阿Dee老豆又點知佢哋係乜水？點借？邊度借？咩原因借？點解會有人肯借？所有嘢都講唔通。
再問詳細啲，我終於可以重組返成件事嘅始末，總算係解開咗一連串嘅疑團。
阿Dee老豆老母一早離咗婚，咩事離婚佢冇講，我亦覺得唔需要問，而阿Dee老豆雖然離開咗個屋企，但仍然會不時問個仔攞錢，每次攞錢都有唔同嘅藉口，一時係病，一時係出面有事，一時又直認係賭債，連阿Dee都分唔清邊句真邊句假，呢啲唔重要啦，故事點樣高低起伏都好，最終目的都係要錢啫，其他嘢只係包裝。
幾個月前阿Dee老豆急住要錢，走咗上嚟公司直接搵佢，點知阿Dee同我哋成班人開緊會，佢老豆「響朵」搵仔，作為Receptionist嘅阿May當然要畀面同事，安排世伯坐低等等，當時Emma又咁啱同阿May喺接待處傾緊計，所以佢兩個就見過阿Dee老豆。
我嘅疑問其實都係阿Dee嘅疑問，當Emma同阿Dee講身上唔夠cash所以冇借到畀世伯嘅時候，阿Dee都好奇怪點解佢老豆會識得問佢哋借，原來就係當日上嚟嘅一面之緣，所以佢老豆認得阿Emma同阿May……阿Dee老豆都幾誇張。
嗰次阿Dee開緊會，期間收到message就匆忙走出去，原來係急急腳畀錢老豆兼打發佢走，所以我哋成班人開完會係見唔到世伯。
咁世伯又係幾時問Emma、May，仲有Sharon借錢㗎呢？
後來有一次，世伯喺公司樓下「埋伏」，佢因為認得阿Emma同阿May，所以走上前話趕住搵阿Dee，不過搵唔到人（其實當日阿Dee係放假），幾個女同事見佢老人家講到十萬火急，所以就借咗錢畀阿Dee老豆。
阿Dee：「其實我老豆係特登，佢嗰日朝早搵過我度水，我唔借，仲叫佢唔好再上去我公司，因為我放緊假，所以佢係有心喺放工時間走嚟樓下等阿May同Emma，佢知道當日唔會撞到我吖嘛，根本係早有預謀，Sharon只係咁啱同阿May一齊收工一齊走，跟住知道佢係我老豆，所以幫得就幫。」
我：「得罪講句，你老豆都幾恐怖喎，走去搞個仔啲同事。」
阿Dee：「唔止恐怖，直頭係仆街，我覺得好冇面，好搞唔搞走去搞我啲同事，問佢哋借錢都夠膽死，我同Sharon根本唔熟，平時連一句說話都冇講過，我老豆竟然問埋佢借錢，頭先Emma講完之後，我直頭想搵窿捐。」阿Dee愈講愈激動。
我：「你老豆之後冇同你講返？」
阿Dee：「走嚟我公司樓下問我同事借錢，佢點敢講呀，我頭先知道後打畀佢，連電話都唔聽，真係仆街嚟㗎！」
我：「咁你老豆問佢哋借幾多錢？」
阿Dee：「聽Emma講，我老豆問佢哋借$7000蚊，佢哋冇咁多，阿May借咗$1000，Sharon借咗$500，我知道後即刻畀返佢哋，但我唔肯定個仆街老豆係咪淨係問咗幾個女仔借，我唔知佢上次嚟公司搵我仲有冇認得其他同事，唔通全office逐個問邊個有借錢畀我老豆咩，在情在理我都要問下你，都要知會你一聲有咁嘅事。」
$7000都要借，最終借得$1500又收貨，阿Dee老豆搞咩呀？
我：「但係點解會畀老豆知道你公司地址咁失策呀？我喺度做咗9年，屋企人淨係知我喺銅鑼灣返工，佢哋都唔知我公司係幾樓幾室啦，我連卡片都冇派畀自己阿爸阿媽。」
阿Dee：「因為我個仆街老豆曾經話有啲嘢要寄返畀阿媽，我唔想佢知我同阿媽嘅地址，結果留咗公司地址畀佢寄嚟。」
我：「咁你真係戇鳩喇。」
阿Dee：「未算，佢根本就冇嘢寄嚟，後來我先知佢出去借錢要填擔保人資料，佢要套我聯絡地址填上去。」
雖然呢個係人哋老豆，但我真係想講句，咁仆街嘅老豆邊度搵呀！
然後我今日收到阿Dee嘅辭職信，佢話唔想再留低，因為覺得好瘀好面懵，覺得Emma佢哋會唔知點睇自己，亦唔肯定有冇其他同事借咗錢畀佢老豆而又冇出聲，心理壓力好大，好難消化成件事，又嬲又抑鬱，呢排晚晚失眠，過唔到自己嗰關。
其實阿Dee做嘢係好得，好幫到我手，挽留嘅說話我講咗，無奈佢去意已決，唉，我都唔識講。
站於上司嘅立場，我當然唔想佢走啦！但站於阿Dee嘅處境，只能夠講句明白嘅，將來唔好再曝露新公司地址畀個咁嘅老豆知喇，虎毒未必不吃兒，老豆為咗錢完全唔理個仔嘅死活，雖然話家家有本難念的經，唔知道當中仲有啲咩細節，不過點講都冇理由走去搵仔女嘅同事借錢啦，長貧難顧，阿Dee真係要為自己打算多啲。（完）
阿Dee嘅事令我諗起《最好的距離》呢個連載，雖然性質唔同，但一樣係屋企人騷擾到同事。
《最好的距離 1》新同事阿媽打嚟：「你會畀我個女過試用期㗎呵！」
https://hkofficedaily.com/?p=15633
《最好的距離 2》唔通我會害你咩我都係想你好啫
https://hkofficedaily.com/?p=15657
《最好的距離 3》我哋冇主動要求嚟到呢個世界
https://hkofficedaily.com/?p=15674
《最好的距離 4》好多人成年後嘅生活都無法擺脫原生家庭影響
https://hkofficedaily.com/?p=15703