《最好的距離 3》 7種摧毀小朋友嘅方式

表面上我係打畀Eva媽咪報喜,話佢知個女順利過試用期,實際上我希望同伯母傾一傾。

我有諗過作為上司,呢啲嘢係咪做多咗?但係作為員工個阿媽,Eva媽咪打嚟問個女嘅工作表現,又迫我收佢啲禮,對方咪一樣做多咗,係咪先?

我:「伯母,其實你唔使咁緊張Eva,佢做嘢好勤力,好聰明,你無需要走上嚟公司㗎,Eva會好尷尬。」

「唔會,淑芬無所謂㗎!」🤦🏻‍♂️

我:「同埋呢,我哋約過佢幾次食晏,但係見你都整定飯盒畀佢,不如每星期搵一兩日唔使整吖,等佢同我哋食,同事間可以聯絡下感情。」

「出去食味精嘢邊有益呀?佢同你投訴我呀?話我唔畀佢出去食飯?」

我:「冇冇冇。」

「佢係咪為咗出去食飯,丟咗啲飯餸呀?」我幾時有講過呀?

我:「真係冇,我哋叫佢食晏都唔去,係要食你個飯盒,話時話伯母你唔使煮咁大份量,office工成日坐,適量就好喇,有時我會請同事食下午茶。」

「即係佢覺得食我啲飯餸好辛苦?我煮都未嫌辛苦。」

溝通唔到,草草打個圓場就算,我開始後悔喇,如果三言兩語就講得掂,老婆當年就唔使同外父外母發展到互不理睬。

預感呢次會好心做壞事,第二日問Eva果然不出所料,伯母訓斥Eva向外人講屋企壞話,搞到佢冇晒面,兩母女鬧咗埸交。

我:「真係對唔住,令到你同媽咪嘈。」

Eva:「鬧交唔係因為你,反而我想同你講對唔住。」

我:「點解?」

Eva:「因為我想辭職……」

我:「下,因為我個電話,所以媽咪唔畀你繼續做?」

Eva:「唔係,佢想我繼續做,其實我之前靜雞雞試working holiday,點知批咗,本身都十五十六,但自從佢走上嚟公司送禮物之後……我想試下獨立。」

我:「雖然你走咗要再請人,不過我支持你去,你媽咪真係畀?」

Eva:「佢唔畀,成日話做所有嘢都係為我好,但有好多嘢唔係我想要㗎!佢口中嘅『好』,係咪我心裡面想要嘅『好』?點解我唔可以選擇自己條路點行?佢鬧我係忤逆女,聽完呢句之後,我下定決心一定要去澳洲working holiday。」

我老婆都畀外父外母鬧過忤逆,因為我哋當時商討緊婚事,我老婆唔鍾意擺酒,佢話好攰,似做show,外父外母持相反意見,一定要搞,仲要大搞,理由係要同親戚朋友交代,我當時坐喺度唔敢出聲,老婆向外母講咗句:「你冇資格話我忤逆。」然後就拉住我起身走。

外母:「點解我冇資格?我生你出嚟㗎!」

老婆冇答,反而落到街之後先同我喊住呻,雖然當時要一邊安慰佢,一邊諗婚事點收科,但老婆講咗句說話令我印象深刻:「我哋嚟到呢個世界,唔係我哋主動要求父母成全㗎,反而係我哋嚟到呢個世界,成全咗佢哋做父母嘅心願。」

雖然有啲混亂,好多「我哋」「佢哋」,不過我聽得明,而且諗深一層,又係喎!用尹光嘅《少你阿爸》歌詞去解釋~~~「你未出世係一條精蟲,另一半係卵」,我哋未出世前咩都唔知,冇人迫你唔戴套中出吖,你要「必」我出嚟呢個世界,我冇得揀㗎喎!反而係好多人想生BB,然後真係生咗仔女,成件事係達成佢哋做父母嘅心願。

後來老婆畀咗本書我睇,裡面講到7種摧毀小朋友嘅方式:

1)令小朋友覺得自己咩都唔掂;

2)經常將自己仔女同人哋仔女比較,用呢種方式刺激小朋友;

3)父母將自己定位成為屋企嘅犧牲者,令仔女產生內疚同罪惡感;

4)同仔女講嘢嘅語氣永遠唔會和善或者有商有量,一定係大大聲或者用命令式口吻;

5)仔女一切由父母決定,唔好講自由,佢啲信你要拆,佢啲日記你要睇,令仔女覺得被支配;

6)成日講「一日都係你搞成咁」之類嘅說話,所有嘢都要遷怒於他人;

7)令仔女當眾出醜,例如喺親戚朋友面前矮化自己仔女。

我自己都有小朋友,所以唔係鼓吹Eva忤逆,只不過話仔女忤逆之前,可能要細心諗諗有冇做過以上嘅事。

老婆成日同我講,我哋冇辦法決定自己有點樣嘅父母,但我哋可以決定自己嘅仔女有點樣嘅父母。

我老婆似唔似哲學家?

Eva走咗之後,我竟然成為咗佢兩母女溝通嘅橋樑,因為Eva喺澳洲嘅日子,係完完全全切斷咗同佢媽咪嘅聯繫……

===
《最好的距離 1》 https://hkofficedaily.com/?p=15633

《最好的距離 2》 https://hkofficedaily.com/?p=15657

error: