老實講，Eva有勇氣違抗媽咪指令，毅然飛去澳洲working holiday，個人而言真係好佩服佢，轉工跳出comfort zone都唔容易，更何況佢不嬲服從媽咪，就咁樣走咗，將來返嚟點修補關係呢？
Eva臨走前講過：「我知道永遠唔會得到媽咪嘅認同，所以想試下獨立，唔係出於惡意報復，只係想搵返啲自尊同埋自信，都咁大個人啦，我想做自己鍾意嘅工作，過自己想過嘅生活。」
當時人未飛，Eva已經喺心裡面默默向媽咪告別，亦接受咗唔能夠改變媽咪嘅事實。
屋企對Eva嘅影響唔止咁少，我作為局外人就睇得好清楚。Eva嘅性格係忍讓、懦弱、自卑，同埋自我價值低，呢種係討好型人格。
同事畀嘢佢做，Eva永遠唔識say no，明明有啲嘢係人哋嘅錯，佢通常會唔出聲默默承受，仲有開會嗰陣永遠唔敢表達意見，好冇自信。
當年我老婆就係咁，因為外父外母由細到大都唔畀佢請同學仔或者朋友返屋企玩，理由係屋企唔見得人，又細又亂會畀人睇唔起，所以我老婆人生大部分時間都覺得自己低人一等。
我外父係會打仔女嗰種人，有咩事就用藤條用衣架打到飛起，我唔知Eva老豆係點，亦唔知佢老豆仲喺唔喺度，因為佢冇提過，我就無謂考究喇，但係一個人喺咁嘅家庭環境長大，習慣所有事都要聽父母講，唔可以有自己嘅諗法，你駁嘴就會被打被鬧，日子耐咗，仔女就會軟弱而且冇主見，就算有意見都唔敢表達，養成一種順從心態。
細個討好父母避免被打被鬧，大個咗就習慣用同一模式去討好別人，希望藉此獲得認可，讚賞，同埋接納。
其實Eva走咗之後，我同佢媽咪係冇任何聯繫，畢竟佢個女喺我公司做得三個月啫，講到尾都非親非故，但係幾個月後，伯母又再打我直線。
佢媽咪搵我都係不情不願，最大原因係Eva啲朋友冇一個肯透露佢個女嘅澳洲聯絡方法，換言之，伯母係「走投無路」先會搵我。
「淨係寄過一封信返嚟報平安，回郵地址又冇，訊息又唔覆，佢班朋友冇一個係好人嚟㗎！我睇死佢去到唔會搞得掂！」
我：「你兩母女完全冇聯絡？」
「冇呀，你有冇佢嘅地址電話？」
我：「真係冇呀伯母，唔係呃你，佢走咗都冇搵過我，老實講，好少後生會同舊上司聯絡㗎喇，不過Eva其實好有分寸嘅，我睇唔使擔心。」
「佢有分寸？我都唔知做錯咩事，生咗呢個忤逆女，小小事就話離家出走，以前佢阿公管得我仲嚴呀，邊個敢駁嘴就打，丟晒我啲衫出門口，仲會塞辣椒落我個口，而家話佢兩句啫，唔通我想佢衰呀？」
Eva媽咪唔算歹毒老母，我feel到有愛存在，但欠缺管教方式，同時亦了解到係原生家庭問題，Eva媽咪本身都係受害者，好多人嘅爸爸媽媽都一樣，細個受到呢種對待，成年後嘅生活就擺脫唔到原生家庭嘅陰影。
只不過，呢個唔應該係你無法好好生活嘅理由。
新一代應該要去改變，否則你嘅下一代就會悲劇重演，Eva嘅公公婆婆係咁樣對佢媽咪，佢媽咪就咁樣對Eva，如果Eva唔求變，將來佢嘅仔女亦會同一命運，新生家庭繼續行舊路。
我嘗試WhatsApp Eva，單剔，照計唔會block我吖。
心血來潮，喺電郵search返當日Eva份CV，見到佢個私人email，我就嘗試用呢個方法聯絡。幾個鐘後，Eva覆返我，但佢唔係覆email，係用另一個電話號碼WhatsApp我。
由於喺email中提到佢媽咪再打畀我，所以Eva一開始好緊張，仲有少少嬲，後來我安撫咗幾句，佢亦都平靜咗，仲透露準備寄第二封信返去，但就好堅持唔會留低任何聯絡方式畀佢媽咪。
我：「佢識唔識send email？可唔可以講我聯絡到你，但唔畀你新number佢，話我哋只係靠email聯繫。」
Eva：「都得嘅，佢唔識send email，就算佢癲到叫你幫佢打email，我都可以選擇睇定係唔睇，不過真係唔想再麻煩你，你冇義務㗎！」
我：「耐唔耐幫你兩母女做一次傳聲筒ok嘅，我呢幾年都係幫老婆同外母傳話，除非你媽咪三日唔埋兩日就搵我啦，咁真係唔好意思，我可能要得閒先一次過同返你講。」
切斷父母嘅聯繫唔係一件容易嘅事，內心亦會好難過，但如果咁樣係一個健康嘅選擇，其實都算係退而求其次嘅好方法。
Eva媽咪唔識send email，所以往後要靠我做橋樑，可能隔咗一個外人喺中間，明顯聽到佢媽咪收斂咗，一般都係叫我問Eva生活成點之類，雙方純粹互報平安。
呢件事發生喺幾年前㗎喇，Eva返嚟香港之後就冇再搬返屋企，聽佢講係同個best friend一齊租咗個單位，喺紅磡區，佢兩母女已經用返WhatsApp溝通，平均一個月食一次飯，Eva自言同媽咪係生疏咗，但少咗衝突，原因係彼此之間建立咗一個「安全距離」，佢知道媽咪會干涉佢生活，如果兩母女仲想有計傾，唯一方法就係唔好進入對方嘅生活。
聽Eva講，媽咪耐唔耐會叫佢搬返屋企，亦會問佢返香港之後份新工嘅詳情，但Eva全部點到即止，一律約略概述，唔會深入透露，另外會定時定候搵媽咪，知道佢老人家無病無痛就得喇。
將關係定格，製造一個最好嘅距離，總好過愈嚟愈惡劣。
睇住自己嘅小朋友長大，我同老婆都會互相提點，作為父母能夠做嘅，就係為子女提供一個溫馨嘅家，唔好下下都擺出高高在上嘅姿態，更加唔好將呢種辛苦作為要仔女回報嘅理由，無須要令佢哋產生虧欠同埋罪疚感，絕對唔可以情緒勒索。都係嗰句，小朋友嚟到呢個世界，唔係佢哋主動要求，反而係父母要完成自己心願，將佢哋帶嚟呢個世界。
生存，從來都唔容易，呢一代嘅物質同科技勝過上一代，但搵食難咗好多，壓力大咗好多，有時諗返轉頭，我甚至會覺得迫佢哋嚟到呢個世界係有啲自私。
===
《最好的距離 1》 https://hkofficedaily.com/?p=15633
《最好的距離 2》 https://hkofficedaily.com/?p=15657
《最好的距離 3》 https://hkofficedaily.com/?p=15674