喺公司溝女真係要睇路，雖然溝錯女唔會死人，但分分鐘會多咗個仇家，甚至係冇咗份工，喺度想講下自己嘅陰影，即使成件事我都覺得自己冇錯，仲要好無辜，不過我已經怕怕喇，女呢家嘢，喺公司以外搵會好啲。
文字就冇語氣嘅，我嘗試形容半年前有一晚凌晨兩點幾，冇錯係夜半兩點鐘，我阿頭打電話嚟，因為嗰晚我打機未瞓，加上佢從來唔會呢個時間搵我，當時已經肯定有事，第一樣係諗自己邊個job做得唔好，係咪有客投訴，點知……
「請你嘅時候我已經講過（呢句係正常語氣，下一句先開始無啦啦大聲）－－－唔好喺公司溝女呀！！！你係咪當我冇到呀！！！你係咪唔想做？你講！你一係聽日交封辭職信畀我，一係就我炒咗你，你自己揀！！！」
我梗係嚇親啦！凌晨兩點個阿頭打嚟講呢啲，情緒仲要咁失控，聽得出唔係飲醉酒，佢係喺清醒嘅情況下鬧我，當中夾雜埋粗口，從來未見過或者聽過阿頭咁激動，就算我喺公司溝女都唔使咁呀？
我又驚又要扮冷靜咁回應：「咩事呀？你講緊咩呀？」
阿頭：「你係咪溝緊Lancy呀？我條女嚟㗎！你約佢睇戲做咩呀？我問你約佢睇戲做咩呀！你係咪玩嘢呀！」
其實嗰晚我的確send過message畀Lancy，msg內容係約下星期睇戲，而我亦真係有同Lancy曖昧，大家後生仔後生女，又係同事日見夜見，好正常啫，關鍵係我根本唔知道Lancy同阿頭原來係一對，如果早知佢係你條女，我梗係唔會介入啦，office三角戀咩！
而家講返梗係輕鬆，當晚阿頭係瘋狂爆粗鬧我，其實驚㗎，冇咗份工都事小，我直頭驚阿頭情緒咁激動唔知會搞啲咩事出嚟。
呢個時候我竟然聽到Lancy把聲，好似喺另一邊勸緊阿頭唔好咁嬲之類，好明顯佢兩個當時係一齊啦，得，明白晒！
我冇咩可以做，唯有同佢解釋：「不知者不罪吖，我都唔知Lancy係你條女。」你叫人唔好喺公司溝女，你自己咪喺度溝緊女囉，但係我冇串佢，費事啦，遇著個傻嘅，情緒咁激動，第二日返工仲要見喎，所以我咪係咁耍冧囉！
我：「如果知道Lancy係你條女，我梗係唔會溝啦，唔好意思，除咗工作以外我唔會同佢接觸，唔會再msg佢講私事，WhatsApp都block埋佢得未？有咩淨係留返喺公司講，你鬧我都睇下前因後果吖，我明知佢係你條女就話啫，我都唔知。」
阿頭狂爆粗鬧完我之後開始肯聽解釋，佢嘅情緒都平靜咗落嚟，呢條友都痴痴地，究竟佢有幾鍾意Lancy呀？作為上司你咁失晒控真係好肉酸囉！
點解我唔大大聲嘈返阿頭？點解唔同佢硬碰硬？因為Lancy呢條女唔值得囉！
Lancy外表係正嘅，但佢畀我嘅感覺係好鍾意收兵，我其實同呢條女出過兩次街，兩次都借頭借路叫我買嘢畀佢，所以我完全冇溝佢嘅意圖，呢啲女溝唔過養唔熟啦，玩下就得，大前提都係我根本唔知Lancy同阿頭原來喺埋一齊。
平靜落嚟嘅阿頭開始講嘢有返啲條理，唔再一味爆粗，後來佢叫我唔好再約Lancy，得啦，驚咗你啦，點敢再搵呀！
第二日返到office我又見到阿頭，又見到Lancy，大家都扮冇嘢，唔知佢兩個點諗啦，我自己就覺得好尷尬，同埋心理陰影響之下足足困擾咗我成個月，好驚Lancy會將我哋之前flirt嚟flirt去嘅msg畀阿頭睇，但照計就唔會嘅，你估呢條女簡單呀？佢都冇理由為咗我而搞到同阿頭情海翻波啦！
我冇特別block到Lancy個WhatsApp，大家係同事，block嚟都冇意思啦，呢條女真係醒目㗎，佢喺office都冇同我再傾計，係有時撞口撞面打個招呼，睇得出佢都唔想節外生枝，咁咪識諗囉！
後來有一日阿頭走嚟同我講：「你係咪話部腦好慢呀，我叫咗IT幫你換部新，keyboard mouse都會一次過換晒。」
我：「嘩，咁正？好呀，唔該晒！」
唔通我話唔好呀？你畀我咪受囉，部電腦廢我都講咗半年啦，而家無端端肯同我換的確好突然，但我唔問咁多喇。
又隔咗一排，阿頭某日畀咗封信我，都未有時間思考係咩嚟，佢已經率先開口：「加$1500人工，已經幫你盡量同老細講㗎喇，本身想加你$2000，佢話太多，$1500都唔錯啦！」
想講下發生咗嗰件事之後，阿頭喺公司係對我好咗，唔止換電腦同埋加人工，仲有好多嘢都幫我爭取咗返嚟，例如同客出去食飯嘅claim錢上限，阿頭嗰種客氣反而令我覺得好唔自然。
我呢啲小角色唔可以為佢帶嚟任何著數，我亦冇再私下搵Lancy，Lancy個格更加唔會叫阿頭對我好啲，或者阿頭係驚我將嗰晚件事講出去，所以喺工作上畀啲著數我，希望我識做啩！
同朋友講過呢單嘢，佢哋問我點解咁尷尬都唔轉工，但我好滿意而家個工作環境同埋收入，公司仲要離我屋企唔遠，搭小巴好快到，就算行路都係20分鐘鬆啲，如果因為咁樣轉工我覺得好唔抵囉，溝錯女啫，以後唔喺公司溝囉！好心嗰啲辦公室地下情自己浮出水面啦，又唔想畀人知，又介意人溝你條女，麻Q煩！
講到辦公室感情事，以下呢兩個連載其實好經典。
《大叔的誘惑》上 25歲女同事戀男上司
https://hkofficedaily.com/?p=21065
《大叔的誘惑》下多女埋身唔算威專一先最難取替
https://hkofficedaily.com/?p=21070
《給自己的情書》上 – 同事合演求婚大作戰
https://hkofficedaily.com/?p=18657
《給自己的情書》下－喺餐廳嗰10分鐘好難捱
https://hkofficedaily.com/?p=18669