隔籬部門嘅Annie嗰日返到office簡直全場嘩然，因為佢將自己個頭染到粉紅色，或者你會話打份工啫，染髮有咩問題呀？如果一般深啡淺啡淺金當然冇問題啦，但係Annie係粉紅色喎，其實好誇張。
我哋嘅industry仲要涉及Banking and Finance嗰類，日日有客上嚟，每個行業嘅文化同生態都唔同，我估一般公司都未必有個成頭粉紅色嘅同事，其實一睇你都知佢明玩嘢。
我嗰朝正想行埋去問Annie咩事咁激嘅時候，佢已經火速畀上司叫入房，應該傾咗20分鐘左右啦，Annie出返嚟嗰陣神態自若，後來我哋其中一個老細返到office，仲帶埋個客一齊上嚟，咁大家只好繼續做嘢冇得八卦。
Annie個位喺路邊，而且靠前，我離遠已經留意到老細望住佢個頭皺皺眉，冇辦法，隻色實在太sharp醒喇，唔好話喺office呢個有限空間，我相信就算喺街上面見到，唔少人都會下意識望一望。
結果未到lunch time，Annie又畀上司再叫入房，今次出返嚟唔止神態自若，仲嘴角上揚，我哋都估到係同個粉紅色頭有關㗎喇，點知真係。
Annie：「我畀人炒咗喇，叫我聽日唔使返喎，正！就係想咁！」
畀人炒都咁開心，原來係因為Annie搵咗另一份工，新公司希望佢下個月返，而我哋呢度辭職要兩個月通知，Annie個新offer等唔到咁耐，所以之前嘗試同上司傾，點知換嚟非常粗暴嘅回應。
Annie：「我唔係話自己啱晒，合約講明係兩個月通知，白紙黑字寫得好清楚，呢層我都知，我只係想問下可唔可以用未放嘅大假去抵銷，例如扣假令到離職期縮短啲，剩低嘅就畀錢賠，希望大家夾下，點知佢（上司）態度勁差。」
另一位同事搭嘴：「呢度係兩個月通知，但合約冇講明可唔可以扣假，因為唔同情況都試過，有人可以，有人唔可以，好睇你個department head嘅性格作風，仲有你同佢嘅關係好唔好。」
我：「係呀，好似我阿姐咁，之前咪有個新仔嘅，過咗試用期先話份工唔適合所以resign，最終一個月通知都唔使，我阿姐好易話為，佢話冇心做就無謂夾硬要人留咁耐，同事做要做得開心，走都唔好記恨，仲話大家一樣打份工，唔需要互相為難。」
嗰次我阿姐直頭係成人之美畀個新仔早啲走，請replacement又快，所以公司雖然有規例，但都好視乎你個department head點處理。
Annie：「上星期我都係問下佢啫，唔得咪唔得囉，賠錢早走我都要準備㗎嘛，但佢一句ban埋嚟就話唔使旨意，強調冇得扣假，就算冇嘢做都要我齋坐兩個月，咁我話最多咪賠錢囉，然後佢講明唔會出reference letter畀我。」
其他同事聽完紛紛畀意見，有人話冇reference letter冇所謂，第時見其他工拎住份合約甚至出糧紀錄，照樣可以證明做過呢份工，又有同事爭論緊唔畀reference letter係咪可以搵勞工處等等。
不過Annie冇再深究呢啲問題，佢用咗一個極端方法去解決，就係染到個頭粉紅色，唔知點解Annie咁有信心高層一定睇唔過眼，其實傻嘅都知老細見到之後好唔高興，落咗聖旨叫Annie上司解決個下屬。
Annie：「頭先我阿head問我係咪特登玩嘢，我照答佢係，我冇所謂呀，如果有咩嘈到去老細嗰度，佢麻煩過我啦，我點都走嘅，你就要繼續喺度做。」
我：「咁最後係咪叫你扣假再賠？」
Annie笑咗出聲：「唔使，佢仲要賠畀我，呢樣我都冇諗過，本身想玩嘢，而家我當出bonus，晏啲請你哋食靚靚散水餅。」
員工提早走要賠，而家演變成炒人，咁就公司賠，但係有幾位比較資深嘅同事就唔認同Annie嘅激進做法，佢哋覺得唔好理其他department會唔會酌情處理員工resign要求早走，總之合約講明兩個月通知，畀你早走係人情，唔畀你早走係道理，更加認為Annie特登染到個頭粉紅色有違反合約之嫌，因為合約中有提到員工行為要恰當之類，坦白講我冇特別嘴嚼contract嘅細節，唔肯定亦唔敢加自己意見，但Annie第二日就唔使返工係事實，仲有錢賠都係事實，佢呢次算係「求仁得仁」啦！(完）
執返啲類似嘅故事出嚟，發現呢個係唯一搏炒嘅post，反而被炒後耿耿於懷，甚至出「怪招」想返去嘅例子就有幾個，失憶嗰單最經典。
同事被炒後聲稱失憶再返工
https://hkofficedaily.com/?p=15598
被炒後放唔低「你打爛咗我飯碗呀」
https://hkofficedaily.com/?p=21999
呢頭叫WFH 嗰頭出解僱信「佢驚我喺公司搞事」
https://hkofficedaily.com/?p=22776