做咗咁多年HR，咩求職者都見過，有部分你會從談吐中發現一種自卑感，而呢種自卑感，好多時都係由過往經歷做成，例如寄咗幾廿份CV出去都冇回音，又或者interview嗰陣被對方用說話貶低以致冇晒自信。
不過早兩日我見咗一個求職者，佢唔止言談中缺乏自信，仲親口同我講佢好自卑，一切源於我最後問咗佢一條問題：「你而家仲有冇見緊其他工？因為我哋仲有其他candidate會見，可能都要一個星期左右先有消息，到時得定唔得都會通知你，正常係by email。」
我一直in人嘅做法都係請唔請都通知對方一聲，請就當然係直接打電話啦，如果candidate落選，我都會補返個email話畀對方知，雖然我出嘅「落選email」係有既定格式，但重點係希望個求職者知道結果，唔使一直無了期等待。
而我問呢位求職者有冇其他工見緊，再表明最快都要等一個星期先會知結果，係希望畀個心理準備佢，如果佢喺呢段時間真係有offer，起碼心裡有數可以決定揀邊份，我最唔鍾意釣住啲candidate，我揀人，人揀我，應該公平啲。
勢估唔到我講完之後，眼前呢位求職者突然講咗句：「我3個星期前用zoom見咗另一份工，到而家都冇消息，應該唔會請我㗎喇，其實都正常嘅。」
我：「點解正常？你指嗰間公司唔請你係正常？」
「係呀，因為我又算特別叻，又唔算特別有經驗，加上你都見到啦……我有兔唇。」
聽返呢位求職者講述經過，佢喺嗰次zoom interview首先係戴咗口罩，然後個HR問：「喺屋企視像點解要戴口罩？」
「應佢要求除低口罩，個HR即刻畀我嚇親，佢好似未見過兔唇咁，問我個嘴咩事，又喃喃自語話CV應該要畀埋相，講真我都好自卑。」
我：「你唔需要覺得自卑，嗰位HR咁樣講嘢，有問題嘅係佢，你唔應該將問題擺落自己身上。」
「雖然係咁講啫，其實我有諗過戴口罩見工。」
我：「所以我噚日打電話約你，你就問咗我兩次需唔需要戴口罩interview，但我好似答你公司冇規定，戴唔戴係你個人自由㗎喎！」
「我記得，只係諗返起上次zoom interview，覺得醜婦終須見家翁，與其你之後嚇親，不如我就唔戴口罩上嚟，咁你見到我嘅時候就有心理準備，總好過in得好地地，之後見我有兔唇先有變數。」
多次提及兔唇問題，呢位求職者自己都好介意，佢亦三番四次強調心理上好自卑，仲覺得永遠唔會搵到工。
我：「其實每間公司請人都應該睇能力，外觀上有缺陷好小事啫，做嘢係用對手，用個腦，你唔使咁灰，你咁樣會令自己冇信心，變相in乜嘢工都未見先輸。」
我嘗試畀多啲鼓勵呢位求職者，好慶幸聽到佢其實仲有後著。
「我爸爸做茶記，佢間茶餐廳最近想請個水吧學徒，我自己唔想呀，但係再搵唔到工就冇藉口推，到時可能要跟爸爸返茶餐廳，然後學沖奶茶……」
未等佢講完，我已經搶先回應：「就算係學沖奶茶做學徒有咩問題？做水吧都係一技之長，兔唇其實可以做手術醫返，雖然我唔熟，但我知可以，上網搵下資料，心態上唔好放棄咗人生咁。」
最後我仲同呢位求職者輕輕帶過一件事，我話有個朋友嘅仔今年15歲，有嚴重智障，完全唔可以自理。
我：「唔係要鬥慘，不過你有手有腳行得走得，仲有個爸爸介紹工作，其實已經好幸福，我朋友個仔今年15歲，佢嚴重智障，完全唔可以自理，所以兔唇相對上嚟講，算係小問題喇。」
有句說話好老土，但好真實：我一直哭著沒有鞋穿，直到我發現有一個人連腳也沒有。
嗰位嚴重智障嘅15歲小朋友，唔係朋友個仔，佢係我個仔，如果有得揀，我寧願佢有兔唇，可以返茶餐廳做水吧，雖然冇同個求職者講到咁白，但我希望佢明白。
至於最後會唔會請呢位求職者，我真係要等多一個星期先知，無論最後入唔入到嚟我公司做都好，我最希望佢領悟一個道理，就係當你喺山腰仰望山頂嘅人，其實山腳下嘅人都一樣仰望緊你，有緣見到呢篇投稿嘅朋友，大家共勉之。（完）
關於自卑，唔知大家記唔記得有個連載叫《Slash》，佢嘅第二集係講侏儒症患者。
我個客係侏儒症患者 佢拎住張相泣不成聲
https://hkofficedaily.com/?p=20318
《Slash》其餘兩集
Slash 1 – 代人辭職分手殺出血路
https://hkofficedaily.com/?p=20308
Slash 3 – 孫仔唔見咗留低個婆婆
https://hkofficedaily.com/?p=20335