有一年聖誕，當時仲未有疫情，同事阿Jim諗住拎假同老婆去旅行，點知經理唔肯批，原因係嗰段時間公司有兩個project行緊，佢希望人人standby，咁阿Jim唯有改期啦，仲諗住無所謂，反正peak season機票貴。
點知隔咗唔夠一個星期，經理話自己聖誕拎咗假，因為「睇睇下都唔係好忙」，神又係佢鬼又係佢，重點係我哋department放大假唔可以疊住，聖誕前後畀經理拎咗，意味坐其他人就唔可以揀嗰段時間……
又有一次，隔籬部門個department head無端端走嚟畀說話阿Jim聽，內容大約係啲嘢遲晒，搞到佢班手足好麻煩，當時我都喺度，同阿Jim兩個人聽到一頭霧水，阿Jim愈諗愈唔忿氣，但嗰位department head又嬲咗佢，所以就搵隔籬部門另一位同事問個明白。
「你經理話你做錯嘢，所以個期先遲咗，我大佬咪發晒脾氣囉，過兩日冇事㗎喇！」
人哋個下屬篤爆背後嘅原因，謎底終於解開咗喇。
阿Jim唔係卸膊，不過呢單嘢的確唔係阿Jim跟開，食咗死貓梗係要解釋啦，人哋信唔信就另一回事喇，同埋都好難奢望對方個department head會講對唔住，話晒佢同我哋經理始終熟啲。
所以阿Jim同經理嘅恩怨係不斷累積，正所謂冰封三尺非一日之寒，呢幾年佢兩個都撐到好「恆」，而阿Jim亦唔係一面倒捱打，除咗會頂撞同埋寸個經理之外，亦開始hea做，咁我都好明白佢嘅，有呢啲咁嘅上司真係食得屎，以前阿Jim好搏㗎，而家5:55已經熄機，6:00即走，亦從不參與任何有經理出席嘅gathering。
有次經理可能都忍無可忍，嗌咗阿Jim入房傾，原來係作出口頭警告，話留意咗阿Jim一段時間，覺得佢冇heart，仲勸佢自己辭職。
阿Jim反問點解要佢自己辭職，經理就同佢講：「大家都明㗎啦，公司炒你，嗰封reference letter一定會打埋出嚟，到時影響搵工就唔好啦！」
而阿Jim就直接回應：「職呢，我就唔會自己辭㗎喇，一係你就炒我，賠足錢，係咁多。」
因為阿Jim都喺度做咗5年㗎喇，人工有三萬咁上下，如果經理炒佢而令到公司無啦啦要賠錢，到時就要同老細解畫，經理好唔想行呢一步，最終佢兩個就成日喺office你串我我串你，火藥味都幾濃㗎！
疫情嗰一兩年其實好啲嘅，因為公司行AB team制，盡量令office唔好咁多人，每星期總有兩至三日work from home，當時經理都盡量編到自己同阿Jim唔同更，費事篤眼篤鼻，但係上年年中開始office回復正常，佢兩個互窒嘅情況又開始返。
經理有時都會運用佢嘅職權留難，做埋啲小動作，例如上星期阿Jim想清一日假，經理明玩嘢唔畀佢拎指定嘅日子，可能係想打亂阿Jim啲計劃啦，幾廿歲人做啲小學雞嘢，不過阿Jim後來同返我哋講，佢想拎嗰日大假根本冇特別嘢做，純粹想去睇音響。
點知經理仲未狙擊完，噚日開會語帶相關咁同我哋訓話，主要係想畀說話阿Jim聽：「麻煩大家清假唔好拎星期五同星期一，我知你哋想自製長假期，連埋weekend一次過休三四日吖嘛！」
本身都冇人想睬佢，但係經理仲要喋喋不休：「我就好反感同事咁樣連住放，希望你哋明白公司冇咗邊個都得，地球一樣係咁轉㗎啫，唔好玩爛個制度。」
阿Jim即場反問：「吓！公司冇咗邊個都得？咁我上星期想請一日假又唔得？咁即係點呀？聽唔明喎！」
有啲同事忍笑，有啲同事就等睇開火，冇諗過經理詞窮，嬲到面都紅晒，迅速結束個meeting就走咗。
故事當然未完啦，由於阿Jim多次表明自己唔會辭職，而經理一來唔想賠錢要同老細交代，二來唔想便宜阿Jim，但係「公司冇咗邊個都得」單嘢又chok住條氣，所以噚日放工就同阿Jim傾調組。
因為我哋公司最近有兩個department都請緊人，不過其中一個係IT，阿Jim做唔到，另一個就係Sales Support team，聽講調組唔使減薪，人哋個team head都初步ok咗，所以阿Jim好開心，希望佢呢幾日搞埋啲手續順順利利啦！（完）
延伸閱讀：明明係Resign 離職證明變咗被解僱
https://hkofficedaily.com/?p=14505