旅行幫同事買煙 斷正被罰款6000

有冇試過去旅行畀朋友或者同事叫你幫手買嘢?我以為隊張購物清單過嚟已經老實不客氣,點知呢啲只係碎料,起碼個list裡面嘅嘢都係合法吖,最多要你走走糴糴啫,原來有人會過份到嗌你帶違禁品入境,又有人傻到真係幫手。

本身我唔知咁多事,直至最近有兩個同事由好friend變到面阻阻,跟住仲無啦啦喺office嘈起上嚟,大家就開始發覺有唔妥,起初佢兩個爭拗嘅位係錢,我哋仲以為係借錢唔還呢種私人糾紛。

「我唔理,總之呢六千幾蚊你一定要畀返我,有晒白字黑紙文件,我一蚊都冇收多你,你還唔到就分期。」

「嗱,首先你唔好用個『還』字,我唔係欠你,亦唔係連六千幾蚊都冇,但我畀得唔順氣!」

「點解唔順氣,係你欠我嘅,你唔係諗住要我出呀?你知唔知搞到我同老婆鬧交呀!還錢啦柒頭!」

「你講嘢斯文啲好,問下其他人係咪應該我畀囉,同埋我再警告你一次,唔係還,我冇欠你,你唔醒目啫,冇理由問我攞返喎!」

結果佢兩個就搵我哋成班同事畀意見,原來同事A早排就同老婆去東京旅行,同事B就叫佢買電子煙,原因係香港已經禁售,雖然坊間仲有啲好似IG shop嘅物體偷雞賣緊,但係價錢就mark up咗幾倍咁多。

以電子煙部機為例,有個牌子叫Ploom,日本隨街賣到,大約1200yen至1980yen(視乎型號),如果喺日本機場免稅店買再平啲,最新嗰部都係880yen,即係HKD 50咁上下。

但係香港啲加熱式電子煙機「黑市價」就要HKD300-HKD500,足足貴咗6至10倍,冇計啦,人哋可能係搵命搏帶批貨入香港,唔通唔使賺咩,都算係刀口飯嚟㗎!

同事B就係叫同事A喺日本機場免稅店買呢隻牌子嘅電子煙機同埋電子煙,點知人哋當日咁啱冇晒貨,同事B應該係見難得有免稅,買唔到加熱式都唔好嘥,轉而叫同事A幫佢買返真煙,要兩條萬寶路唔知咩黑冰。

同事A當時已經話萬寶路呢啲真煙比起電子煙size大好多,驚拎過關會畀海關見到,但係同事B就同佢講,其實電子煙同真煙都一樣,點解之前叫佢買電子煙就唔驚,而家買真煙就驚,最終唔知佢兩個點樣deal啦,總之同事A就真係幫同事B買咗兩條萬寶路真煙。

香港禁咗電子煙,真煙入境又唔可以帶超過19枝,呢啲法例就唔多講喇,重點都係同事A喺香港出關時真係畀海關捉到,具體點樣計算罰款就唔清楚喇,因為同事A冇畀張罰單我哋睇,而結果就係罰咗六千幾蚊。

聽講同事A個老婆好嬲,咁都可以理解嘅,人哋兩公婆去旅行要幫你買嘢,過關畀人捉到已經夠晒尷尬同埋麻煩,成個trip即刻蒙上陰影,我相信佢哋喺機場應該搞咗一輪手續,最後同事B仲置身事外唔負責,更加話同事A自己唔醒目,我路過聽到都覺得好過份。

雖然大部分人都覺得同事B要畀返錢同事A,但係估唔到有人會企喺同事B呢邊,論點係……

「唔係話同事B啱,不過你都有責任(佢指同事A),你覺得唔應該買就一早推佢,而家返嚟失驚無神要問佢拎返六千幾蚊,佢都冇諗過有呢筆支出,何況兩公婆一齊過關好少check行李㗎喎……」

乜有數據顯示兩公婆一齊過關,畀人check行李嘅機會特別少㗎咩?

據了解,同事B直到目前為止都冇畀返罰款同事A,同事A曾經讓步話一人負責一半,同事B都係拒絕。

我唔係話同事A冇錯,自己兩公婆去旅行,用私人時間幫同事買嘢其實已經好傻,仲要係犯晒規最終搞到被罰錢,點計都係好無辜,而定佢兩個喺公司反晒面,唉,開開心心放假去日本,最後搞成咁真係勁無謂。(完)

【日本職場】AKB迷兩年考日文N1 請教清水健入行 AV汁男幾錢人工

YouTube video
error: