Slash 1 – 代人辭職分手殺出血路

「想你幫我送個生日蛋糕畀朋友,訂咗㗎喇,晏晝3點先去葵涌取貨,跟住再送入東涌嗰間世茂喜來登酒店,記得幫我喺酒店樓下拎住個蛋糕影張相,唔好影到你個人同隻手喎!東涌係咪要加錢?Total幾多?」

我:「係呀,Total $1150吖,如果葵涌嗰邊準時,我應該4:30之前咩都搞掂晒,完成咗即刻打畀你。」

呢單係easy job,個客嘅朋友由另一個地方飛嚟香港,要喺防疫酒店隔離21日,對方係女仔,至於佢兩個係咩關係就冇問,亦冇需要問啦!總之個女仔喺隔離期間撞正生日,我個客想買個蛋糕畀佢,又唔想求其,加上喺Foodpanda同Deliveroo睇過,東涌嗰邊有得叫cake,不過係一件件嗰隻,冇得訂一整個,同時唔想畀個女仔知道係叫外賣,自己又唔想入東涌咁遠,因為唔上得樓,最終都係擺低喺酒店reception叫職員送上房,一來一回覺得唔抵,始終有啲人高薪厚職,時間就係金錢。

要求我捧住蛋糕盒用酒店做background影張相,好明顯係想扮自己親自送入去啦,我收$1150係咪好抵先?佢話問過Uber同埋GoGoVan司機,前者唔肯吉車攞蛋糕再吉車入東涌,話唔啱公司規矩,後者就話唔會幫手影相,結果單生意就落咗喺我手喇。

好似未介紹自己做乜,但我都噏唔出自己係乜,因為咩都做,三年前失業寄過成百封CV出去冇回音,有幾份係有得見嘅,可惜冇下文,成個人失晒信心同方向,頹住喺Carousell話自己咩都做,交收、拎嘢、陪食飯、陪傾電話,求其搵啲嘢撈咋,冇諗過真係有人contact,更加想像唔到原來搵到食,總之你諗得出又唔犯法嘅order我都會接,收費視乎複雜性逐次傾,同埋我係男仔,工作時冇咁多顧慮,對住朋友一般會話自己係Slash,性質方面絕對係吖!

屋企兩老都有問過我點解成日唔返工,但又有家用畀,究竟而家做緊乜?我答佢哋自己做Slash,老豆反問:「咩殊話?」

我:「即係freelance嗰啲呀!」

「咩冷呀?我同你講,你唔好喺出面搞搞震呀,正正經經搵份工啦!」

我:「而家咪返緊工囉,你當我炒散啦!」

頭先話送蛋糕係easy job,因為年中接到好多呢類order,特別係呢兩年各國大封鎖,咁嘅景象真係有今生冇來世,之前有單送蛋糕job仲要陪埋對方女朋友食飯,所以東涌單嘢純粹當速遞咁做,好輕鬆㗎喇。

陪食生日飯嗰次其實幾爽㗎,個男仔係澳門人,嚟唔到香港陪女朋友過生日,因為份工唔容許佢請十幾廿日假去隔離,佢話過往幾年都會買蛋糕同女友慶祝,上年嚟唔到已經好失落,佢女友比較文靜,朋友唔多,我個客今年唔想佢又一個人孤孤單單咁過,所以準備咗蛋糕,訂咗間高級餐廳,亦同女友預早單咗聲,雖然食飯嗰陣要開住直播聽佢兩個傾計係有啲怪,但男方嘅心意我係明白嘅,幾浪漫吖,餐飯仲有得claim,成隻job我又收咗幾千蚊。

有人問過我,一個男人叫另外一個男人陪個女朋友,唔驚我又食又拎咩?首先,我呢個「乜都做Slash」已經有3年相關經驗,叫做有啲名氣,而家甚至唔使再喺Carousell登廣告都有referral單,好專業㗎!其次係,小弟被朋友形容為9成似盧廣仲,有1成唔似係因為再樣衰過盧廣仲,唔係踩盧廣仲呀,希望佢班fans唔好嬲豬,而家講緊客觀事實啫,正常嚟講我係唔會有任何殺傷力,公認㗎喇,嗰位澳門客睇完我WhatsApp張相都話好放心交個女朋友畀我。

其實講起都有少少唏噓,澳門同香港近到咁,但係受制於防疫措施,加上好多人要搵食行唔開,距離咁短都可以超過一年見唔到面,估唔到個世界變成咁,更加唔知幾時先至回復正常,稍為好轉又有個變種病毒,變種完又再有另一個變種,沒完沒了,人與人之間嘅距離這麼近那麼遠。

我最常接到嘅order仲包括分手同攤牌,其中一個case係女客人好驚佢男朋友,因為男方有躁狂症同埋暴力傾向,分手嘅原因就係唔止一次畀個男人打,我勸過呢位女客人報警,但佢唔肯,而個男人又要佢交還拍拖時嘅所有禮物,我個客唔敢出嚟,怕又一次受到暴力對待,結果搵咗我去交收一箱禮物。

有單辭職job都好經典,其實我個客已經resign咗㗎喇,不過就委託我去佢公司執返私人物品同拎一封reference letter,初時我都唔明點解要畀生意我做,反正都離咗職啦,後來我先知佢當時走得好急,有啲男朋友送嘅杯同埋擺設唔捨得唔要,同埋佢公司啲人真係好討厭,面目可憎又單單打打,我以朋友身份話拎返啲嘢都要畀說話我聽,班同事個個都咁乞人憎,唔怪得我個客唔想返去面對。

唔係張張order都咁funny或者過癮㗎,我接過一隻job係好心酸,個客係一位侏儒症患者,佢要我假扮佢去見一班人,嗰次我賺咗好多錢,但睇住佢喺我面前喊個樣,而家諗返都好唔舒服,佢做咗個一生人最後悔嘅決定。(未完待續)

error: