12個Jason去野餐太沉重，好在之後接到幾張容易嘅order平衡下，主要係陪傾計陪食飯代交收，但係個天似乎唔想便宜我，轉頭又有一單嘢令我不知所措，仲要賺頭蝕尾。
上次扮人見網友，今次直頭扮人個孫，記得呢位叔叔客人搵我嗰陣，聽完成件事真係打咗個凸，孫喎，點扮呀？我同佢好似樣㗎？你咪玩啦！
阿叔：「唔重要㗎，你陪我去老人院探一探外母就得，佢79歲喇，有老人痴呆，根本認唔到你係真定假？」
我：「點諗都唔妥當啦，自己個孫都唔認得？」
「佢有時連我呢個女婿都唔認得啦！我個仔失蹤咗5年，係生係死都唔知，你淨係話唔做犯法嘢之嘛，咁樣係犯法咩？」
Ok，阿叔你有道理，加上你出錢，接咪接囉！
去到老人院，阿婆真係唔識我，但同樣唔認得佢女婿：「你哋係邊個？」
阿叔：「我係阿財呀，你女婿呀，上個月先至嚟探你，咁快又唔記得啦？你上幾次係咁話想見個孫吖嘛，我而家帶咗佢嚟啦！」
阿婆將目光轉移去我身上：「你係我個孫？」
我：「係呀，婆婆你身體點呀？」係呢啲對白㗎啦，最緊要執生。
阿婆：「我身體好好，我個孫咁細個㗎咩？做咩之前唔嚟探婆婆呀？」
我：「而家嚟咗喇，之前做嘢太忙。」
阿叔由頭到尾都冇畀佢個仔張相我睇，所以身高、體重、年齡、樣貌，我全部都唔知，反而好肯講佢同個仔嘅恩恩怨怨，可能平時冇人聽佢呻啦！呢啲係咪叫無仇不成父子？
根據阿叔所講，老人院呢位婆婆係佢外母，係前妻嘅媽媽，而佢前妻喺7年前已經因病去世，阿叔過咗2年之後再娶，所以佢個仔好唔鍾意，兩父子為咗咁而不斷炒大鑊，總之個仔就唔會接受新媽咪，唔要同新媽咪一齊生活，一怒之下搬咗出去，呢5年以嚟彼此不相往來，難怪阿叔話個仔失蹤咗5年，電話又改埋，係生係死完全唔知。
我：「邏輯上嘅問題，個仔咁反對你再娶，某程度上反映佢鍾意媽媽，即係你前妻，咁婆婆係前妻嘅媽媽，理論上呢個孫應該好錫婆婆吖，咁點解……」
未等我問完，阿叔已經搶答：「其實我個仔同佢阿婆相處嘅時間唔算多，咪農曆新年拜年咁囉，幾年前我外母開始老人痴呆，生活上自理唔到先入老人院，其實我外母都好麻煩㗎！佢又唔鍾意我而家個老婆，我而家個老婆又唔鍾意佢。」
果然係家家有本難念的經。
同阿叔先後去咗老人院9次，扮咗9次阿婆個孫，發覺呢位老人家都唔係好麻煩啫，因為我童年嘅時候老豆老母掛住搵食，正正就係外婆湊大我，所以同老人家相處絕對冇問題，唔知點解仲幾有親切感。
有時啲院友同姑娘問起，婆婆都會介紹我係佢個孫，有個姑娘仲話我：「後生仔，你咁樣唔得喎，婆婆住咗咁耐都未見過你探佢，以後要嚟多啲呀！你婆婆平時好悶㗎，成日望住個窗坐足大半日，應該係好掛住啲屋企人。」
講開屋企人，未聽過婆婆有其他仔女，唔肯定阿叔個前妻係咪婆婆唯一嘅女，總之咁耐以嚟，就得我同個阿叔嚟探佢。
阿叔探婆婆嘅時間表好固定，每兩個星期一次，而且一定係星期五，所以我會mark低日子預留畀佢，直至有一次阿叔冇約我，故此我主動打返畀佢：「唔使探婆婆喇？」
阿叔：「唔使喇，我過兩日去加拿大，應該短時間內唔會返嚟。」
我：「哦，明白。」
唔係心痛冇咗個job，而係諗緊阿叔飛咗，個孫就連婆婆住緊老人院都唔知，呢個老人家咪變相冇晒親人？思前想後，我竟然自己走咗去探婆婆，動真情的確係大忌，但每次諗起姑娘話婆婆成日望住個窗坐足大半日，唔知點解我就好想去探佢。
每次去到老人院都見到婆婆望窗發呆，主動走埋去同佢傾計，婆婆即時綻放燦爛嘅笑容，我個心都暖一暖，之後嘅日子平均隔個幾星期就會探一探，偶爾佢會問：「阿財呢？」
我：「佢呢排忙呀，我代佢過嚟囉，仲好啦，唔好阻住我同你傾密計。」
如是者，我喺冇收阿叔錢嘅情況之下主動去探婆婆，仲會經常買啲嘢去氹佢，但係有次老人院嘅職員捉咗我埋一邊，對方話：「唔好意思，你地兩個月未交錢。」
本能反應令我講咗一句：「關我咩事？」
姑娘好詫異：「下，咁你係佢個孫，我又搵唔到你爸爸。」
係喎， sorry sorry，我嘅角色係阿婆個孫。
即刻WhatsApp阿叔，冇人回覆，應該係時差問題，結果我私人交咗錢先。
過咗大半日阿叔終於reply，劈頭就覆段咁嘅嘢：「你咁多事做咩？我有叫你去探佢咩？我都畀咗幾年錢啦，乜都夠晒，你叫老人院職員搵社工搞啦！」
我reply：「你係咪咁講嘢呀，婆婆一個老人家無依無靠。」
阿叔：「你有本事咪交囉，我唔會阻你，你都唔好煩我。」然後佢block咗我WhatsApp……
老人院嘅費用唔平，我喺冇辨法之下唯有向職員坦白成件事，佢哋嘅表情匪夷所思，又難怪嘅，我嘅工作即使向朋輩講都未必有人明，何況老人院職員吖，總之而家搵社工跟進緊。
婆婆老人痴呆嘅情況開始反覆，有時唔認得我，有時又對我好親切，有時會扭計，有次仲無端端講咗句：「你都唔係我個孫。」
我嚇到個心都離一離：「你點知既？」
婆婆：「我個孫邊有咁後生呀，佢1984年。」
我：「1984年出世？因為我個樣後生啫，睇落唔老吖嘛。」我都唔知自己講緊乜，但又work喎！
婆婆：「係呀係呀，你媽咪又係咁，唔識老，媽咪呢？點解佢唔嚟探我嘅？」
呢題唔識答，又唔想講佢個女已經走咗好多年，結果我話去洗蘋果成功終止話題，轉個頭婆婆又講咗其他嘢喇。
早幾日老人院職員打嚟，仲以為係社工嗰邊有新進展，但原來係職員通知我，話婆婆今日生日，我即刻換衫買咗個蛋糕過去，話晒都80大壽喎！
婆婆話自己從來都未切過生日蛋糕，我分唔清係佢老人痴呆唔記得，定真係冇試過咁樣過生日，我同佢講：「祝婆婆你長命百歲……」
都未嚟得切講身體健康，婆婆已經好快咁話：「梗係唔好啦，做人好辛苦㗎！長命百歲有咩好？你應該祝我安詳咁去，瞓瞓下走咗最好。」
老人院職員即刻話大吉利是，雖然我好錫婆婆，希望佢可以健健康康，但諗深一層佢講嘅說話又唔係冇道理，將來我哋老咗，啲仔女係咪一定會照顧自己呢？失禁、痴呆、無法自理，又會唔會成為其他人嘅負累呢？
唔想個結尾愈講愈暗黑，不如講下其他嘢，啱啱接到隻job要陪個客去西貢碼頭坐，佢嘅要求係我唔好講嘢，淨係坐喺佢旁邊就得喇，簡簡單單好吖，多啲嚟密啲手，之前畀咗兩個月老人院嘅錢，要勤力啲接單喇。
（完）
Slash 1 – 代人辭職分手殺出血路
https://hkofficedaily.com/?p=20308
Slash 2 – 好後悔點解唔一早坦白
https://hkofficedaily.com/?p=20318