做咗3年Slash，最令我揪心嘅係入行冇耐，來自一位侏儒症患者嘅order，以下會稱佢為「十二個Jason去野餐」，呢個係佢喺online game裡面用嘅名。
「十二個Jason去野餐」因為網上組隊打機而認識咗5個朋友，佢哋幾個素未謀面，只係開game嘅時候先會online傾計，晚晚如是，久而久之愈嚟愈friend，聽我個客「十二個Jason去野餐」講，佢同呢5個男仔玩咗半年已經無所不談，大家會分享工作上嘅煩惱，屋企人嘅矛盾，甚至係同另一半嘅相處點滴，可能真實中唔識得對方，故此好多話題都好直接好放。
問題係，「十二個Jason去野餐」因為侏儒症嘅緣故，由細到大好自卑，乜都可以講，偏偏冇講到自己嘅身體狀況，咁又好難怪嘅，根本冇預期會變得咁friend，有次佢哋6個男仔打機講起外型問題，「十二個Jason去野餐」仲隨口話自己個樣都算過得去，中等身材，唔肥唔瘦，拍過一兩次拖，公司冇乜女仔所以目前單身。
「我唔係有心呃佢哋，因為知道其中一個有180咁高，另一個係健身教練，仲有個曾經做過兼職模特兒，我愈聽愈自卑，已經冇作到天花龍鳳，唯有講到自己中中庸庸。」
我：「明白嘅，打online game認識又唔係真實中嘅朋友，一開始選擇保護自己好正常，或者佢哋全部都吹水，出到嚟先知係三尖八角呢！」我試圖安慰客人。
「佢哋成班已經出咗嚟見面幾次，有send相畀我，冇講大話，得我一個有缺陷，真係冇諗過大家會friend到呢個地步，我推咗好多次，冇藉口再唔去喇，但我唔敢見呀，我驚佢哋會嫌棄。」
我：「真正朋友點會嫌棄你呢？」
「你幫我見佢哋吖，我將基本資料話畀你聽。」
有時我嘅角色會變埋社工，但既然個客一意孤行，盡完本份亦只有接咗張單。
結果我用「十二個Jason去野餐」嘅身份赴約，喺餐廳見到5位陽光大男孩，終於明白乜嘢叫磁場效應，個個都好nice，健談、風趣、開朗，其實「十二個Jason去野餐」畀我嘅感覺都係一樣，唯一唔同嘅只係身體狀況。
「終於肯出嚟喇咩！叫10次先出1次，當唔當我哋係friend㗎？你真名係咪叫Jason？」
我：「係呀！你係？」我個客的確係叫Jason。
「我係百德新街百德阿姨呀！你估埋佢哋邊個打邊個先。」
我：「你應該係阿加嚦膠片，你就係Five Five Six Nine Nine，你係豐乳同露，你係阿士東維拉利爾。」
「有冇搞錯呀，估錯晒，話咗Five Five Six Nine Nine係健身教練啦，佢咁大隻都估唔到？」
記晒呢堆網名已經有難度，加上我唔係「十二個Jason去野餐」嘅真身，估錯晒絕對正常，不過嗰一晚依然非常愉快，呢班人實在太好玩喇，好玩到我都想同佢哋做朋友，差啲忘記咗，只要代入角色，其實我哋已經係朋友。
出咗一次就有第二次第三次，所以呢隻job我賺好多錢，因為keep住每個月都會代「十二個Jason去野餐」見佢哋，有時個真身喺打機嗰陣話自己病咗，呢班friend會買維他命畀我食，真身話買咗新電話，下次出嚟就有人送個手機殼畀我，仲要係特別訂製嗰隻，所有禮物我都會物歸原主，唯獨是有一次佢得物無所用。
我：「呢對跑鞋係百德新街百德阿姨送畀你。」
客人打開鞋盒，將對running shoes拎上手摸咗幾下，然後遞返畀我：「送畀你吖！」
我：「唔得，朋友送畀你，我唔可以收。」
「佢喺呢個牌子入面做Marketing，有staff price，有次我話想跑步鍛鍊身體，佢即刻問我著幾多號鞋，係都要送畀我，我以為佢講下，以為佢冇咗回事，點知咁有心，其實我唔啱著，我啲size好難搵。」
我：「你可以留念㗎嘛，唔使一定著，呢啲係朋友送畀你嘅心意，不過有樣嘢想同你講，阿加嚦膠片結婚想搵你做兄弟，婚禮主題係打機，仲話搵人整咗啲同online game有關嘅場地佈置，你聽佢哋講過㗎呵？」
「我知，之前打機有講過，求下你，可唔可以幫幫手？我知道會好辛苦，聽佢哋講又要試衫，又要出嚟同班姊妹食飯，結婚當日仲要忙足全日，錢你照計吖，幫下我得唔得。」
真心唔係為錢，只係唔想拒人於千里之外：「冇問題，放心，我一定盡力，到時會做足兄弟嘅本份。」
如是者，我用咗「十二個Jason去野餐」嘅身份，做佢朋友「阿加嚦膠片」嘅兄弟，接新娘玩遊戲嘅時候，仲食咗一嚿勁辣Wasabi壽司，又要畀絲襪笠頭踩石春，但我好開心，已經分唔清係太enjoy同呢班人一齊玩，抑或係可以幫個客成完心願。
隔咗一排，新郎哥約食飯曬咗啲結婚當日嘅相畀大家，翌日一如以往完璧歸趙，其實Big Day嗰陣我已經有send相畀「十二個Jason去野餐」，但今次拎住實物，佢感觸好深，深到不顧儀態喺我面前喊。
「我好後悔呀！好後悔點解一早唔坦白，其實第一時間冇講，仲可以第二第三第四時間講，我而家同將來都冇辦法參與呢班朋友嘅活動，但我好自卑呀，曾經諗過一早講自己係侏儒，佢哋可能唔同我做朋友，又或者online game照打，不過唔會約食飯，結婚唔會預我做兄弟……我好想見到佢哋真人，好想有一張同佢哋嘅合照！」
我個客泣不成聲，呢次係做Slash以嚟最難過嘅job，好心酸。
提議過用另一個身份介紹「十二個Jason去野餐」出場，例如話係我最好嘅朋友，之後一齊出嚟食飯飲嘢，但遭到佢以「唔想一個大話冚一個大話」而拒絕，最終佢選擇向嗰5位朋友話自己移民，寧願將彼此嘅友情冰封喺online game裡面，咁之後就唔使出嚟都可以繼續。
經過今次，唔止我個客，就連我自己都上咗一課，原來有啲嘢一開始選擇講大話，謊言就要永遠延續落去，無論包裝得幾咁美輪美奐，結局依然係萬劫不復。（未完待續）