男同事騎呢溝女 柒到出鴻圖道

溝女有冇補習班㗎呢?如果搞呢壇生意真係有得諗,我相信係有得賺,因為有唔少人溝女嘅招數睇到人反白眼,簡直係尷尬癌發作,我公司有個男同事就係好例子。

我哋稱呢位男同事做P先生啦,咁佢就睇中一位叫Sarah嘅女同事,繼而發動連串攻勢。Sarah會突然喺公司收到速遞,好幾次都係收到零食,然後P先生就會WhatsApp或者打內線畀Sarah,問佢鍾唔鍾意。

Sarah係唔鍾意嘅,叫咗P先生唔需要再送嘢畀佢,而我哋成班女同事就當食花生睇好戲,可能P先生都覺得寄零食冇咩新意,之後竟然寄M巾畀Sarah,仲有張心意卡寫住:「希望照顧你生活上所有細節。」老土到核爆!

M巾可以話係轉捩點,本來Sarah收到零食就咁冷處理,但係佢認為送M巾再講咩照顧生活細節,就有啲冒犯成分,畢竟唔係同你咁熟,又唔係男女朋友,女仔嚟M係好私人嘅事,有個男同事送M巾的確有啲癲,重點都係Sarah對P先生完全冇興趣,你知女仔㗎啦,對你有好感就冇所謂啫,如果唔鍾意你,收到呢啲禮物只會覺得好變態。

P先生後期勇敢咗,會直接走埋嚟撩Sarah傾計,但係內容好空泛同埋冇意義,你問佢食飯未呀?忙唔忙呀?呢啲尚算合理吖,佢走嚟問Sarah IQ題,仲要係咩IQ題呢?我記得有一條係咁:

P先生:「從前有兩塊牛扒,一塊5成熟,一塊7成熟,兩塊扒喺街撞到,但完全唔打招呼,你知唔知點解?」

Sarah:「我唔想知。」

P先生:「因為兩塊牛扒都唔熟囉!」

Sarah冇反應,P先生自己笑,再望一望我哋幾個同事,但係包括我在內,全部人都冇畀反應,當時就好似有隻烏鴉喺office飛過一樣。

呢啲都算啦,大家閂埋門自己知就算,P先生追Sarah係搞到柒出國際……sorry,我又誇張咗少少,係柒到出鴻圖道間茶餐廳啫!

有次lunch time,我同Sarah食完飯打算埋單,然後發現冇單,咁咪叫侍應寫返畀我哋囉,點知侍應哥哥笑得勁衰咁行埋嚟:「你哋同事話請呀,佢幫你哋埋咗單喇,痴線幾廿蚊個常餐,笑死我……」

原來我同Sarah都冇為意,P先生都喺另外一張枱,平凡真慘,喺茶記都唔起眼,但最恐佈係佢舉起杯凍奶茶望過嚟笑,好似講緊:「Cheers!」頂你係咪癲線㗎!呢度鴻圖道,我同Sarah兩個常餐加埋都唔使100蚊,你當呢度係Four Seasons定係K11 MUSEA?定係當你杯凍奶茶係紅酒呀?

之後每次落嚟呢間茶仔,侍應都總係笑到衰衰咁,有意無意要窒下我哋(因為佢唔知P先生係target我定係Sarah),次次食完想走佢都會話:「今日唔見個觀音兵埋單嘅?」唉,搞到我同Sarah有時特登行過一條街食。

其實溝女唔使咁高調,就算高調,都唔該高格調,送M巾同埋茶記埋單舉杯凍奶茶Cheers呢啲千祈唔好學,真係會搞到個女仔好尷尬。

投稿讀者:Jessica

🥸 職場上溝女都係小心啲好,唔信可以參考埋以下例子:

溝女,用一張500蚊紙就得啦
https://hkofficedaily.com/?p=15325

波樓返工有艷遇,索女話要同我住
https://hkofficedaily.com/?p=12196

有個大叔狂追我同事
https://hkofficedaily.com/?p=10527

error: