女同事因為負責出去book場搞event，所以認識咗一位餐廳老闆，對方係一個40幾歲嘅大叔。
大叔次次都好幫忙，對女同事好好，超時唔加錢之餘，有時仲提供額外嘅飲品同埋小食畀我哋班member。
女同事覺得非常唔好意思，問准公司加budget去畀呢啲extra cost，始終唔想欠人情債。Anyway大叔唔肯收，有時完咗event仲留我個女同事喺度，請佢飲咖啡食cheese cake，不過之前受疫情影響，我哋公司近乎零event，大叔見唔到我女同事，就多咗用WhatsApp噓寒問暖，例如問夠唔夠口罩呀？Speed Dating生意差咗有冇減人工呀？近排忙唔忙呀？食咗飯未呀？
成班同事都覺得大叔想溝佢，女同事唔信，甚至有次大叔send咗句：「好掛住你呀！」佢都認為只係合作夥伴再加少少友情嘅關心。
直至有一日，大叔話嚟咗Speed Dating公司樓下，希望可以見一見面，佢終於意識到人哋堅係想發動攻勢，當時我個女同事忙緊，完全行唔開，故此禮貌地婉拒。
見到佢係咁請大叔食檸檬，我當時忍唔住要問下：「其實大叔咩樣，係孔劉嗰啲吖？定係……」
女同事：「唔係樣嘅問題，係佢已經有老婆，佢老婆仲大緊肚！次次去餐廳做嘢，大叔個老婆都有幫手㗎！我亦從來冇同大叔單獨相處過，更加冇出過街。」
話口未完，電話又響，只係聽到女同事咁答：「唔好喇，行唔開呀，幫我問候你太太吖，生BB好辛苦㗎！你對太太好啲啦！麻煩唔好再打嚟！」
果然唔係孔唔孔劉嘅問題，唔撚關個樣事，係關個撚樣事！
女同事自從嗰次之後唔敢單獨放工，次次都要搵埋其他人陪佢走，有次大叔真係喺樓下等佢，咁啱嗰日係我哋老細陪佢落去，聽講老細狠狠地屌走咗大叔。
大叔溝女冇問題，屋企有個大緊肚嘅老婆仲出去溝女先係問題。