阿姐生日要收禮物 同事焗夾500買Burberry

「喂,500吖。」有個同事行埋嚟劈頭向我講。

我:「咩500?」與此同時,其他人已經拎晒銀包出嚟畀錢,其中一個仲話冇cash,問可唔可以payme?

「買禮物呀,一人五舊。」

我:「買咩禮物?」

「Burberry scarf,除返我哋咁多個,一人五舊啱㗎喇。」

喺呢間公司做咗一年都唔夠,佢講嘢又無頭無尾,聽返同事解釋先至知道,原來係夾錢買生日禮物畀阿姐。

我:「關我蛋治?我係咪一定要夾?」

「夾啦!你好幸福㗎喇,撞正疫情,冇得成班出去唱K食飯,我哋之前幾年除咗要買禮物,仲要請阿姐Happy Hour直落,你今年淨係夾禮物咋,我哋team仲要多咗人頭,往年夾得仲甘呀!」

痴孖根!有明文規定㗎?合約有寫㗎?唔夾係咪要炒先?

我哋team個阿姐50歲人仲未結婚,平時放假已經會約同事出街食飯,佢哋曾經叫過我一兩次,不過我都冇出席。

其實我本身企得好硬唔肯夾,唔係話孤寒,而且上司或者同事生日,買份禮物同埋請食飯都好常見,只係唔鍾意被迫同埋焗住夾嘅感覺,呢啲嘢應該係從心出發先啱㗎嘛!

我話唔想夾之後,兩三個同事車輪戰咁勸我,佢哋話少一個人夾,其他人又要share然後再夾多啲,又話我第一年入嚟做無謂搞到咁唔合群,係咁話500唔算好多,有個同事仲好笑,佢話:「你當跌咗啦,一陣阿姐知你冇份夾,個心又有條刺,其他同事夾多咗又唔開心。」

Sorry,我最後唔爭氣夾咗,你哋講到咁,唔怕得罪阿姐,都怕得罪其他人,費事第日做嘢會有麻煩,免得喺公司被孤立,我同自己講,當係交保護費。

我唔敢同自己條女講呀,拍拖年半,未送過兩千蚊以上嘅禮物畀女友,雖然條Burberry scarf係大圍一齊夾啫,都唔好畀女友知喇,聽完真係心理唔平衡。

我真係好唔明,做得我哋阿姐,佢人工本身都唔少,要下屬夾錢買份大禮畀你,佢內心完全冇唔好意思㗎咩?收禮嘅時候連少少慚愧都冇?

做人好奇怪,當一個地方有啲壞規矩同埋傳統,久而久之習慣咗就變成正常,如果你提出問題同埋反對,其他人就會覺得你唔合群,覺得你係怪人,玩下手仲要被排斥,真係唔識形容呢種怪現象。

投稿讀者:被打劫的人

👀 唔知點解一講起Happy Hour同埋工餘活動,就自然會諗起以下兩篇文🙈

家有惡妻 Happy Hour都要簽回條
https://hkofficedaily.com/?p=13094

留返時間畀員工 其實就係最好嘅福利
https://hkofficedaily.com/?p=4281

error: