投稿讀者：森仔
早兩年公司裁員，經歷咗三個月冇嘢撈，好在朋友介紹去咗旺角一間波樓做侍應，本身以為由文職轉服務業會好唔慣，點知又ok喎，最大原因係波樓侍應冇想像中咁辛苦，執下枱、收下波、捧下餐，大部分時間睇人打波，係長期要企囉，咁當然人工就比茶餐廳侍應低，都好合理嘅，付出同收入成正比。
不過波樓品流的確幾複雜，好多MK同埋黑社會聯群結黨嚟打波，我呢個場比較少斯文客，佢哋一入嚟絕對嘈過自由行啲大媽，粗口爛舌就梗㗎喇。
MK還MK，好多女仔又願意跟住呢班紋晒身嘅雙刀火雞飲飲食食，班古惑仔上嚟例牌有幾條女跟住，當然有啲女係鬼五馬六好似中咗輻射咁嘅樣啦，不過都有唔少好嘢，靚嘅MK妹實在唔少，有時想勸下佢哋唔好群埋呢啲壞人，正正經經讀下書搵份嘢做，出面大把世界，問題係我用咩身份講吖，自己咪一樣喺度做侍應。
財不入急門，搵工都係一樣，期間我keep住send信搵文職，之前三個月無人問津，點知喺波樓做咗一個星期就有人打嚟約interview，仲要見得成，不過就要等下一個月嘅1號先正式返工，冇所謂啦，最緊要做返寫字樓，波樓就返多陣當搵外快，之前幾個月冇收入已經好傷㗎喇！
冇諗過返咗一個星期波樓竟然有艷遇，有個經常同班古惑仔上嚟嘅MK妹主動撩我傾計，有樣有身材，係個妝同衣著俗啲啫，不過真係嗒得杯落。
「你咁斯文嘅，同波樓啲人好唔同。」
我：「吓！呢度全部都係大哥，我點同佢哋比呀？」
「我意思係你同你班同事好唔同呀！」
我：「哦，我新嚟吖嘛，咪要精神啲囉！我班同事做咗好耐㗎喇，可能因為咁，睇落咪唔同啲囉！」
「畀個電話嚟吖靚仔，得閒搵你食飯，我叫泳恩，你呢？」
我：「我叫阿Sam，你叫我森仔都得。」
講咗三句嘢就抄我牌，成世仔最威水係今次。我承認色心起，亦有種食得唔好嘥嘅心態，不過勉強勒得住自己，始終唔知出面邊位大佬係佢條仔，一陣抽水抽著火水就大鑊，同埋我都有自知之明嘅，「靚仔」呢兩個字幾時輪到我吖，由細到大都未畀人咁樣形容過。
呢個MK妹泳恩主動到超乎想像，連續幾日WhatsApp我，仲要次次都講埋啲好露骨嘅嘢，曖曖昧昧咁，又成日send啲波罅相嚟。我嘅心理狀態就徘徊喺去馬同唔去馬之間，人生未試過有女仔投懷送抱做主動，仲要佢堅靚，唔係嗰啲中咗輻射甩皮甩骨嘅MK妹。
期間泳恩照常跟住班雙刀火雞上嚟波樓玩，我用咗少少時間去觀察邊個係佢條仔？食咗會唔會有生命危險？終於發覺佢並唔屬於呢班雙刀火雞裡面任何一個人，其中有個古惑仔仲講過一句：「契妹！幫我叫餐蛋麵！你問下班衰仔有冇人食吖，另外要杯凍奶茶，你自己鍾意食咩就食咩啦！」
哦，原來其中一個係佢契哥，其他嘍囉就係跟佢契哥搵食，都叫做明白晒，放心啲。
少男情懷總是詩，有一日泳恩又msg我：「森仔，你收幾點呀？我今晚唔上嚟波樓呀，出去等吖，想唔想我攬住你瞓？」
我reply：「一齊瞓？去邊度瞓呀？」
泳恩：「你係咪一個人住？不如我同你住吖。」
咸濕還咸濕吖，我始終有讀過書，亦肯肯定自己唔係靚仔，平時溝女狂食檸檬，突然有個樣靚身材正嘅MK妹鍾意我？仲要主動話攬住我瞓？呢個人相當有可疑，講唔出咩事，只係聞到陣陣伏味，理智控制住細佬，我作出咗一個可能終身抱憾嘅決定：
我：「Sorry，泳恩，我同屋企人住㗎，同埋呢…你唔啱我，不過多謝你，未試過有咁靚嘅女仔對我咁好，其實你契哥班手下有幾個都好靚仔㗎喎！你唔考慮下佢哋？」
我妄想可以同佢談心，妄想泳恩係真心鍾意我，可能佢唔想要嗰啲雙刀火雞style嘅男朋友呢！但係當我say no之後，泳恩係一句嘢都冇覆過，究竟係嬲吖？冇我咁好氣吖？定係佢份人根本冇禮貌呢？我諗唔通，不過算啦，只好怪自己唔敢食，咸濕，但冇膽。
之後泳恩都有成日上波樓，但完全當我透明，對我極度冷淡，之前嘅事好似冇發生過一樣，不過佢竟然搭上咗我另一位同事，係～～我係唔靚仔，但嗰位同事阿榮更加毒，成件事根本講唔通，泳恩究竟係飢不擇食定係點呢？毒男同事阿榮明顯冇我咁多顧慮，仲非常受落，如無意外相同嘅情節應該發生喺阿榮身上。
本身都有少少唔甘心，擺到埋嘴邊㗎嘛，直至我last day嗰晚，泳恩又同班雙刀火雞上嚟打波，打打下有個極惡嘅紋身佬上咗嚟，一嘢就衝埋我度問：「你就係阿榮呀？」
「阿榮喺嗰度。」我指一指嗰位毒男同事。
極惡紋身佬即刻衝過去扯住阿榮衣領，問佢係咪搞大咗泳恩個肚。
阿榮：「我…我…冇呀，咩事呀大佬？」
「冇？口窒窒咁樣，咁你有冇同泳恩搞過呀！」
毒男同事：「有事慢慢講先大佬……究竟咩事呀？」
其實當時泳恩一直喺度冷眼旁觀，最後極惡紋身佬「的」咗阿榮落街唔知去邊，泳恩同佢契哥都跟埋落樓，真係好想睇埋個結局呀！可惜直至我夠鐘收工，佢哋都未返上嚟，加上我喺波樓工作嘅時間太短喇，走咗之後完全收唔到風，好想知極惡紋身佬同泳恩係咩關係？好想知泳恩個肚係咪關阿榮事？好想知佢哋有冇結婚生仔組織美滿家庭？又好想知阿榮係咪做咗傻仔畀人屈錢？
兩年後嘅今日，我仍然得唔到答案，不過我知兩年前如果唔係有自知之明勒得住，個結局應該會幾悲慘。