先交代下背景，我係HR，大公司，個brand幾出名，但唔係中資，呢度亦唔係一個老細話晒事。反送中運動期間直至而家都冇表態，亦從來唔會喺TVB賣廣告。
聽落去好似獨善其身，不過真實又唔係咁，經歷咗之前嘅淡市之後，最近公司開始再請返人，結果高層出咗最新指令，就係要求我哋HR要check埋candidate嘅社交媒體，主要睇下有冇頻頻出一啲政治post。
高層嘅指示好明確，佢哋講明唔係封殺某一種顏色嘅candidate，無論對方係黃又好，係藍又好，只要社交媒體係咁講政治，又或者出post言論好偏激就唔請，高層嘅立場同埋意思唔係睇個candidate企邊一面，而係怕呢啲post同埋留言如果瀨嘢，例如觸犯國安法，仲有得罪黃藍是但一邊之後被起底，隨時會影響埋公司。
相信好多人會講：「唓，easy啦！開多個fb咪得囉！」
今次我想探討嘅並唔係有咩拆解方法，而係想講趨勢問題，可以想像到香港未來愈嚟愈多公司會做social media 嘅background check，打工仔要完美避開當然有一千個方法，只係呢種招聘嘅趨勢令人覺得好唏噓，大公司絕對首當其衝，中資或者紅底就更加唔使講啦。
人哋嚟見工，要畀埋自己嘅social network你睇，個心當然唔舒服，而作為HR，其實老細或高層有呢啲要求，我哋都好難做，因為執行起上嚟唔係咁容易。
收到上面order嗰陣我都問過一句：「唔係老奉畀我哋check㗎喎，人哋唔畀都冇辦法，邊有得迫，嚟見工又唔係一定請，憑咩check先？」
高層聽完就好清晰咁話：「唔使同求職者爭論嘅，唔肯畀就唔好迫佢哋，扭扭擰擰咪唔考慮囉，仲有睇埋佢哋啲頭像有冇標語。」
如果你覺得我講呢啲話題好爭議，會令到你個page好多人留言鬧爆，咁就當睇下算啦，我會想像到好多人鬧HR，鬧我點解仲要喺呢間公司做，甚至話冇可能有呢啲咁誇張嘅事發生。
我並唔係想挑起任何口水戰，只係想將事實講出嚟，等大家有心理準備，之後見工有機會遇到呢種情況，我都冇辦法開名，始終公司唔係藍唔係紅，佢哋做生意立場只係唔想牽涉其中，希望大家諒解。
不幸中之大幸嘅係，我公司冇抽秤現有同事嘅社交媒體，否則我應該都冇得留低。
投稿讀者：唔使出我個名啦