「我有份工好適合你，唔知你有冇興趣？」2022年嘅2月我收到個headhunt嘅電話，佢同我講咗呢一番說話，咁我真係搵緊工，咩都有興趣啦，然後我同意send份resume畀佢，隔咗10日左右，headhunt就約咗我上個客度interview。
間公司喺長沙灣，香港office大約有30幾人，唔係好大，不過佢哋喺法國同荷蘭都分別有公司，最大粒嘅老細唔係香港人，長期坐鎮法國head office，HR第一次見工就同我講咗間公司嘅架構。
其實first interview係ok嘅，HR都算好nice，填form同埋見工用咗個零鐘左右啦，佢話本身想直接做埋second in，但係個team manager當日唔喺度，唯有要另外再約一日上嚟interview，都冇計啦，咪返去等囉！
當時headhunt都好有交代，全程有同我update下，不過都要隔咗兩個幾禮拜先約到second in，好似話係個team manager好忙喎，anyway，我唯有再請一日假上去，個team manager冇HR咁友善，但係嗰次都in咗一個鐘。
期間headhunt有幫我問下機會大唔大，對面話仲有其他人見緊，暫時唔知，咁我以為冇著落啦，咪繼續搵其他工囉，點知一個月之後，headhunt話我second in OK咗。
我：「真係？等咁耐我仲以為衰咗添，佢哋有冇話想我幾時返工呀？」
Headhunt：「未呀，佢OK咗嘅意思係仲要見第3 round，今次見佢哋香港office最大嗰個。」
…… 同一個office仲要上去第3次，唉，都要見啦，否則之前兩round咪白費心機。
再見埋佢香港office最大嗰個，臨尾HR又走入房叫我做個test，唔係即場做，係返屋企做再send返去，有冇咁麻煩呀？得得得，反正都3 round interview，請咗3日假，返屋企做test呀？得，做畀你做畀你！
當晚我已經即刻做埋個test send返去，不過我有效率，唔代表佢哋有效率，3 round interview過後再交埋個test，忽然完全冇下文，然後個headhunt話一直有追，都係未有結果，呢度足足等咗個半月，喂，個test有咩做得唔好咪直接講囉，請就一句，唔請都係一句啫！
等咗個幾月，直頭唔記得咗呢份工，點知個headhunt又打嚟：「Ok咗呀個test，恭喜你！」
我已經冇咗最初興奮嘅心情，淨係問返佢：「咁有冇話幾時可以返工？我而家做緊呢度係contract，就嚟約滿又要簽新約，你個客係請我就真係快喇。」
Headhunt：「未得住呀，佢哋個法國老細想見下你。」
我：「即係點呀？飛去法國定點呀？」
Headhunt：「唔使，你後日朝早得唔得閒？上佢公司，HR會set up好晒等你同個法國老細視像interview。」
都上咗去3次，前後請咗3次假，我當時公司份contract又差唔多完約，搏多一水囉，唔爭在上去第4次。
當日視像interview其實同第一次見HR係一模一樣，又係自我介紹，問下我之前嘅工作經驗，分別只係呢次講英文（好在唔使講法文），咁其實見佢個法國老細同我最初3 round interview都係重複又重複嘅動作。
然後第4次interview之後，我又等咗一個月，headhunt失驚無神又殺出嚟contact我：「唔好意思，個客嗰邊有消息喇，另一位喺阿姆斯特丹嘅老細都想同你傾傾。」
真係佛都有火，即刻喺電話爆個headhunt啦，見一份工你唔係要我請5次假呀？呢啲視像interview各自喺屋企做咪得囉，使唔使我特登去佢長沙灣公司set up interview呀？你公司個鏡頭清啲㗎？定係上網快啲呀？
Headhunt：「你唔想請假上去唔緊要，我幫你同佢哋講請唔到假，視像interview應該喺屋企做冇問題，不過呢位荷蘭老細就未必會好似法國嗰個咁就時間，你知啦，香港同歐洲始終有時差，個interview可能要安排夜晚時間，係喎，如果約到夜晚唔使請假，你會唔會考慮上多佢公司一次？個HR可以留低等你喎！」
等你條命，一係屋企in，一係就係咁先，結果個headhunt幫我安排留喺自己屋企視像，第5次interview見佢荷蘭老細，同場個法國老細，仲有香港個HR都有join個視像會議，內容又係自我介紹同埋講過往工作經驗，咁點解要我再in第5次呀？呀法國老細同個HR轉達咪得囉！
好喇，見完喇，又一個月冇晒下文唔知做乜？最好笑係有個headhunt打嚟叫我見第6次，點解叫「有個headhunt」呢？因為連當初follow我個獵頭公司headhunt都轉咗工呀！而家換咗另一個女仔follow up我呢個job，好唔好笑？
我：「你知唔知你上一手跟我呢個job嘅時候，我已經見咗5 round？」
新headhunt：「我知呀，佢有交代過，我都有問過點解見咁多次都未決定請，原來呢個客不嬲都係咁，可能係謹慎啲啦，佢哋原來有其他職位搵我哋請人，都係要見好多輪，唔好意思，我都知你見咗5次，因為佢哋開發緊大灣區嗰邊，請咗個人專負責呢個市場，HR話大灣區個負責人想見一見你呀！」
嘩，由長沙灣到法國，再去荷蘭，而家去埋大灣區，你哋喺非洲剛果民主共和國嗰邊有冇office呀？ 大洋洲同埋中北美洲加勒比海區呢？
我有in呀，呢次講普通話，條大灣區話事人態度好nice，好似好buy我咁，又隔咗唔知幾耐，新headhunt再contact我，佢話：「真係最後一次喇，上次大灣區個經理講咗冇問題，咁法國嗰邊有個新嘅副經理，你之前未見過嘅，見埋呢次就confirm offer㗎喇，我幫你問得好清楚，最後一round喇！」
一份工見7 round，ok，我見埋佢。第7次interview，內容來來去去都係嗰啲，呢次雙聲道，因為齊晒人呀，HR、香港個team head、法國老細、法國office嗰位第二把交椅、荷蘭佬、大灣區唔知咩項目經理全部喺晒度，個視像會議簡直星光熠熠耀保良。
In完第7次，佢哋終於confirm offer喇，然後我覆返個headhunt：「我搵到工喇，唔好意思，我唔接呢個offer喇。」
Headhunt：「吓！點解呀？見咗7 round喎，真係千辛萬苦，而家有offer都唔take？」
我：「咪就係因為見咗7 round囉，你上一手個headhunt冇同你講，我當時contract就完約，好急搵工咩？」
Headhunt：「佢有remark呀，不過見咗7 round喎，之前有幾個求職者同你一齊in，有啲第2、3 round已經冇咗，得你一個可以過晒7 round咋！」
痴痴地！原來明知我當時就完約都搞咁耐。後來嗰間公司個HR直接打畀我，問我點解唔做，仲話：「你做啦，好難得有人可以過晒我哋個法國老細同荷蘭老細㗎！如果你唔做，我哋又要重新in過人㗎喇！」
我：「重新in過人係咪又要啲求職者過7 round？」
HR：「我哋呢度最少都5 round，程序係咁，如果你唔做，我哋再請人要搞好耐㗎！」
我：「唔好意思呀，我好鍾意而家最新呢份工，唔轉過嚟喇，多謝你，byebye！」
你係咪覺得我好絕情呀？我in呢個position呢……$25,000人工咋，senior都談唔上，唔知以為我in緊咩亞太區總裁，$25,000你叫我in 7 round，歷時大半年，正常人都搵咗第二份啦！（完）
以下都係2019同2020年嘅見工奇遇記，隔咗咁耐你仲記唔記得？
未試過工咁淒涼我全程自問自答
https://hkofficedaily.com/?p=9844
叫求職者出示醫生紙：佢未係你正式員工喎
https://hkofficedaily.com/?p=947
見工變咗傾心事調返轉安慰HR
https://hkofficedaily.com/?p=13332