做咗咁耐人，見過咁多份工，有咩HR未遇過吖，但係早排見過一間公司嘅HR真係毫無職業道德可言，佢除咗全程都Natural High係又笑唔係又笑之外（唔知以為佢啪咗嘢），仲做咗一個行為令我好反感。
見工傾計傾到一半嘅時候，呢個HR突然爆咗句：「我今朝先至in完你上司。」其實當時我好疑惑，in我上司？即係咩意思？嗰陣我講緊自己嘅工作經驗，仲要未講完，個HR無情情加插一句打斷咗我。
見我百思不得其解，個HR之後又再補充：「你哋同一間公司吖嘛，resume睇到啦，同一個department，佢係manager，你上司係咪David Ho？」
我當時見呢份工係幾日前請定假，仲要係上司David批，我梗係冇話去interview啦，咁David如果自己都有工要見，亦唔需要同我呢啲下屬講，打工仔騎牛搵馬嘅嘢在心中啦，估唔到成件事咁窄，大家同一日上下午分別走嚟in同一間公司。
不過幾時見工，邊個嚟見工，呢啲全部都係求職者嘅私隱，有冇諗過我哋係唔想透露畀而家份工嘅同事知道呢？呢位HR究竟係無心之失，定係咁樣講出嚟另有目的？我完全冇興趣去深究，淨係覺得佢完全冇職業道德同埋好唔專業。
呢位HR全程都好似開籠雀咁未停過，除咗爆畀我知上司David嚟過見工，仲係咁同我講佢對David嘅感覺：「佢講嘢都幾風趣，平時對住你哋班下屬都係咁？因為David唔出聲嘅時候都幾惡，你對呢位上司有咩評價？」
有冇搞錯呀？而家我嚟interview，你見緊我喎，有乜理由用我見工嘅時間去問另一位求職者啲嘢呀？雖然佢係我上司啫，同埋David又會唔會想你向我呢個第三者透露先？
結果我隨便答個HR，都係美言幾句啦，冇可能影響David嘅受聘機會㗎嘛！
臨尾個HR同我講好快會有消息，當時我已經好肯定就算請都好，呢個offer我係唔會take，因為貴公司處理求職者interview真係非常有問題。
後來我check返呢間公司嘅招聘廣告，佢哋果然係同時請緊manager grade嘅人，好在interview時間唔係撞到應咋，否則填form嘅時候你眼望我眼就真係搞笑。
個HR呢方面又冇呃我，隔咗一日已經contact我話confirm offer，但係正如之前所講，我唔會過去做喇，所以喺電話裡面直接就turn down。
故事未完，Turn down offer嘅同一日，David走咗嚟問我：「喂，做咩你唔做呀？」
我：「咩唔做？」
David：「嗰份工呀，HR姐姐話你拒絕咗佢喎，叫我問下你點解唔做，做啦！你過埋去我多個熟人吖嘛！」
我：「搞錯呀！我唔take offer都走嚟同你講，佢知唔知咩係私隱呀？」
David：「唓！你前兩日見完工我已經知啦，個HR打嚟同我講，又問我關於你嘅工作表現，我特登唔出聲之嘛！」
我：「你唔覺得佢好過份咩？遇到兩個求職者來自同一間公司，有咩可能周圍披露㗎，同一間公司一定friend㗎咩？如果我同你唔啱呢？咁咪分分鐘影響到人！我就係因為咁樣先唔去做。」
David：「後生仔，唔使下下咁勞氣嘅，佢最後唔請我就真係嬲喇，而家佢都請咗我，有咩好嬲啫？」
我：「你知唔知嗰日下晝我見工，佢已經同我講朝早in完我上司，即係你，喂，去見工點會想畀人知㗎！唔好話專業呀，佢連尊重兩個字都未識。」
David：「算啦！你真係唔過去做呀？你再諗下先啦！」
因為David接受咗個offer，即將會轉新公司，對佢嚟講就好似咩都無所謂，但我就真係好介意，好在嗰次個HR叫我畀評價嘅時候，我冇講過David任何壞話咋，否則佢肯定一五一十講晒畀David聽。
其實我覺得做HR唔止要讀書，仲應該要有考牌機制，呢啲咁唔專業嘅HR簡直係害群之馬。(完）
講到HR同求職者之間嘅「互動」，過往實在有太多太多「精彩」投稿，唔知點解以下呢3個比較印象深刻。
霸氣求職者反勸HR繼續努力：「希望貴公司不要氣餒」
https://hkofficedaily.com/?p=12223
HR入房第一句就講：「你有咩問題想問？」
https://hkofficedaily.com/?p=18224
見工句句腌臢最終壓價四千：「我哋公司喺中環」
https://hkofficedaily.com/?p=21688