投稿人：你行家
幫我個candidate約下晝4點見工，朝早10:30 candidate已經打咗畀我，話一早起身對眼刺痛，去咗睇眼科之後，醫生話係角膜炎，所以candidate打嚟同我講改日子interview，由於距離4點仲有好多時間，我認為咁早講定真係冇問題，佢算幾乖仔，起碼唔係no show，咁我就update個客啦，點知個客竟然發我爛渣，仲問如果真係睇醫生要改期，可唔可以出示醫生紙？睇完醫生紙先決定會唔會再安排日子interview。
我真係唔敢相信自己對耳，個客係咪有啲嘢搞錯咗呀？佢未係你員工喎！
最後我講咗件事畀candidate聽，畀唔畀醫生紙？仲想唔想見呢份工？我交畀佢自己決定，結果candidate 選擇唔去見，唔知點解我反而鬆咗一口氣，可能係我覺得既然搞成咁，去見都唔會請，聶瞳你有冇遇過呢啲case？
＝＝＝＝＝＝＝＝＝＝＝＝
回應返先，今次收到行家嘅投稿，我真係未遇過咁O嘴嘅case，首先求職者甩底唔去見工分兩種，其一係完全唔通知你之下no show，咁當然會唔開心啦，但係做我哋呢行，試問點會未遇過？
其次係有交代嗰種，好多時安排咗求職者幾日後去interview，期間佢有更好offer，咁就不如送上祝福，始終工作同人生係屬於對方，唔應該為份佣同埋利益迫人去見工，大方祝佢新工作順利仲好啦！而且個求職者有晒交代，我覺得已經足夠，總好過佢見完又turn down offer，到時咪又係要搞一大輪。
行家今次呢個case，我認為求職者係有交代，個客同佢素未謀面，要選擇唔相信都冇辦法，亦可以理解，只係個客嘅處理方式可以大方得體啲，例如佢選擇唔信，咁咪唔好見囉，我哋阻止唔到對方點諗，盡本份就得。
要求你個candidate出示醫生紙絕對唔恰當，學你話齋，佢根本唔係個客嘅員工，冇義務要出示醫生證明，你個客似乎欠缺咗大將之風，本來佢唔見呢位求職者係冇問題，但係有咁嘅要求就變咗好有問題喇。