讀者投稿:呢份工我點都唔會揀!

我都試過有同事約完candidate上嚟之後,自己當日請咗病假冇返,搞到我要喺唔知頭唔知路嘅情況下突然幫佢in人,唯有極速睇晒對方嘅resume然後認真面試,再寫低晒啲point轉交畀原本負責個同事。

我同你都曾經做過candidate呢個角色,將來亦有機會再做,去見工之前要花精神同埋時間做準備,搭車又係一個cost,呢期去interview仲要動用寶貴嘅口罩,所以請善待求職者,希望大家去見工唔會遇到以下呢段投稿嘅情況。

========

投稿:Sammi

今日去interview,填完form畀人帶入房,有個男人嚟in我,望完我啲資料,佢自言自語話:「呢個position我唔熟喎,做咩叫我見呀?」然後叫我等一等,出去搵另一個同事。

跟住係個女人入嚟,同佢打招呼完全唔應,坐低睇完我張form先開口話:「我做account,你呢個位唔係我見,等等先,我叫同事。」又叫同事?你公司目測得十個人鬆啲之嘛!

跟住佢就喺正會議室門口同一個唔知咩人大大聲交談:「呢個位關我咩事?」嗰個唔知咩人又答:「老細開嘅新位嚟,佢唔喺度,我都唔知搵邊個見,冇hr吖嘛,你哋啲阿頭見住先啦!」

靜咗一陣,個女人同返最初入嚟個男人一齊in我,其實你哋未ready好,又冇hr,好心就唔好約我上嚟啦!

橫掂嘥咗個口罩嚟到,硬住頭皮in埋啦!成個面試過程都係我做主導,連呢句都係:「不如等我介紹下自己先吖。」我未試過見工見到咁淒涼,全程自問自答,仲要叫自己介紹下自己,好似精神分裂咁。

佢哋唔知我個position嘅skill set,乜都插唔到嘴,有時我講完靜咗落嚟,想睇下佢兩個有冇嘢要問返我,對面呢一男一女就好似以前返學嗰陣,老師一問問題就眼神閃縮嘅學生,望下我張form,又互相你眼望我眼好似射波咁,場面好尷尬,最後個女人終於講返一句嘢:「好吖,有消息再通知你吖。」

香港真係好多呢啲垃圾公司,雖然唔知佢哋會唔會搵我second in,不過我點都唔會揀呢份工喇。

———–

Follow埋我哋其他平台啦❤️多你一個like就好多
IG:officedailyhk
Youtube:OfficeDailyHK
———–

error: