ChatGPT嘅出現，真係幫輕咗我好多，無論日常生活同埋工作都係，特別係我做Marketing呢行，每日要處理公司嘅各個社交平台，邊有咁多idea吖，ChatGPT唔止可以發掘題材，佢就連lead in都幫我寫埋，好耐都冇試過好似近呢個月咁準時收工。
我都有叫班下屬善用ChatGPT，特別係Data analysis方面，呢啲分析市場趨勢同埋客戶行為嘅前期工作，唔好揼石仔咁樣死搵爛搵喇，用ChatGPT拎晒啲基本嘢先，之後再小修小補，你會發現工作舒服咗好多。
不過我哋用ChatGPT嘅事早排畀隔籬team個old seafood質疑，因為佢見到我個下屬用緊，然後就走埋去八卦一大輪，第二日開會竟然大大聲喺老細面前告狀。
「Jacky個report好馬虎喎，我見到佢用ChatCPT整嘅，全部電腦gen出嚟，咁同出貓有咩分別呀？」
Jacky算係fresh grad新人，佢對於個old seafood嘅「指控」表現得好緊張，似乎係驚老細聽完會責難。
我首先更正咗個old seafood先：「ChatGPT，唔係CPT。」
Old seafood：「我理得你係CPT定CPU啦，總之你咁樣即係作弊，下下搵啲電腦咁做，咁公司使乜請人呀？買多幾部電腦返嚟咪得囉，仲唔使個個月出糧添！」
其實呢個old seafood唔係第一次做金手指篤背脊，聽聞佢試過篤一位女同事閂埋會議室房門泵人奶，又試過指責另一位男員工去廁所太頻密，懷疑對方蛇王吞pop，仲mark低人哋去廁所嘅時間同次數，總之呢件old seafood個格就一向係唯恐天下不亂，好多人都唔鍾意佢。
我：「ChatGPT就係咁樣用，你就算做其他report，以前都少不免要去google搵資料，何況我哋唔係copy & paste，一部分係參考，最重要自己加返細節……」
我都未講完，old seafood又繼續吠：「咁你答返我個問題吖，人人都係咁，唔使請咁多人啦，電腦做晒咪得囉，我知你哋連action plan都係搵呢啲AI寫，嘩！你份糧幾好逗喎！」
呢個時候老細出聲：「我覺得冇問題喎，最緊要做好件事啫。」
Old seafood果然係仲有一口氣都仲想反撲：「即係假手於人喎，請槍喎！」
老細：「又唔可以話請槍，你自己有冇用過ChatGPT先？你都要識得問問題，佢先會畀到有用嘅答案你，否則10個人去問同一樣嘢，佢都會畀10個唔同嘅答案你，要用呢個AI功能都有技巧，如果大家做出嚟嘅嘢係準確、有用、幫到件事，咁咪ok囉！你頭先話買多幾部電腦返嚟，咁樣冇意思㗎，資料又好，report又好，action plan又好，都要睇問嗰個人點樣去同ChatGPT溝通，你用下先啦！」
好嘢，一招收佢皮！其實老細講得冇錯，你問問題嘅思路同埋能力，係好影響ChatGPT畀你嘅答案深度，真係阿豬阿狗行埋嚟打幾句就識整火箭咩！
Old seafood當日個會再冇講過嘢，嬲就梗㗎喇，點估到佢真係走去研究ChatGPT，仲驚動埋我哋公司個IT部，原來呢條柒頭皮搵錯咗個山寨網站，成個layout都做到同ChatGPT一模一樣，結果一路chat一路畀人盜用咗啲password同資料，詳情我冇問呀，淨係知佢chat chat下唔對路走去搵IT部求救。
啲人成日話IT淨係識叫人熄機再開，其實唔止㗎，我哋班IT仲識叫個old seafood報警，只係old seafood認為未有實際損失，最後選擇打去card center cut咗張信用卡，人柒冇藥醫，醫返都變白痴，我懷疑佢真係搵咗個ChatCPT，唔係ChatGPT，不過講真，ChatGPT的確係有冒牌網站，各位用之前要睇清楚，唔好學old seafood咁柒。
有人話ChatGPT嘅出現，最終會令好多人失業，計我話有真材實料同埋工作能力嘅人根本唔使驚咁多，若然真係因為咁而失業，應該係個人太廢啫，一個人如果真係咁廢，即使呢個世界上冇AI，最終都會被淘汰㗎啦！(完）
《日本職場》同性戀風俗店「獵頭」大爆入行經過，高峰期月入達80萬日圓！
https://youtu.be/FEjcwu3Yy10