呢份工請我嘅時候，其實我已經覺得個老闆好靚女，氣質的確係有啲唔同，公司都有90後同00後嘅女仔，但係成班人行埋一齊嗰陣，你好自然第一眼都會望我哋個老闆，人對眼始終係會畀靚嘢吸引。
後來先知道原來我老闆係明星，Oh no，真係有眼不識泰山，因為其中一個客人上完我office簽嘢之後，同日下晝打電話畀我，係咁讚我老闆好正，冇架子，同十幾廿年前一樣咁靚，佢話：「雖然老咗，但多咗份成熟女人嘅韻味，好似仲靚過以前。」
我聽到一頭霧水：「你識咗我老闆咁耐㗎喇？因為我係新人，如果你係舊客，我可能要畀其他同事跟，因為呢度要跟返個sales，之前係邊位同事同你contact㗎？」
客：「冇呀，我之前冇同你其他同事work過。」
我：「哦，即係你識咗我老闆好耐嘅，但係頭先開會又唔覺你哋係識嘅？」
客：「我識佢，佢唔識我啫，你老闆以前係女主角嚟㗎，我好鍾意睇佢做戲。」
我係00後，講真讀緊中學嘅時候已經好少睇電視，一直都係睇YouTube多，大個煲劇就睇Netflix，通常睇美劇，就連打機都會用電腦，好少開電視，喺屋企你畀部電視我都冇用，所以唔好話以前嘅香港明星，我連而家香港嘅明星都有啲陌生。
個客講咗幾套電視劇嘅名出嚟，然後我搵返嚟睇，嘩！我實在係太井底之蛙，原來老闆以前真係做過主角，後生超靚女呀！Check返維基，佢活躍嘅年代係80至90年代，我未出世，唔怪得入嚟呢間公司做咗幾個月後先從客戶口中得知，同事間亦冇提呢啲事。
咁我當然唔係全部80, 90年代嘅明星都唔識啦，因為我老闆又係紅到嗰個程度，睇返wiki講佢嘅演藝生涯，主要都係活躍於電視劇為主，電影拍過幾套，唔算多，但係當年同佢演戲嘅男主角有啲已經好紅，我少留意香港影藝圈都識，老闆果然猛料。
冇開名係因為我公司唔算大，我而家仲做緊，無謂影響份工，而且我search返啲舊新聞嘅時候都見到，老闆退出幕前係經歷咗好多嘢，佢目前選擇從商都係想平平淡淡過日子啫！
後來我有同一個比較friend嘅同事講有客讚老闆靚女，同事話返畀我聽呢啲算小兒科，原來之前有幾個客直頭送花送禮物想追老闆，而呢啲客通常都有少少年紀，我估係想接近自己細個嘅女神呢？
因為知道老闆背景同歷史之後留意多咗，有幾次大家出去食lunch嘅時候，我都會發現有人眼望望，之前覺得啲人純粹睇靚女，而家終於明佢哋嘅心態，其實睇唔緊要，偷拍先最衰，見過有人靜靜雞用手提電話影，好心唔好咁啦！
又有一次飲緊茶嘅時候，兩個師奶走埋嚟問可唔可以同我老闆合照，我老闆好好人話冇所謂，點知其中一個師奶叫錯老闆個名，嗰個名唔係老闆真名，更加唔係老闆嘅藝名，因為師奶講啱個姓，講啱最後隻字，但中間係錯，你可以想像佢搵唐詩詠合照，然後講：「你係咪唐嘉詠呀？我好鍾意睇你做戲㗎！可唔可以同你影張相呀？」大致係咁。
我老闆好親民，畀人嗌錯都冇黑面或者面露不悅，我諗佢都見慣呢啲場面，同埋佢平時喺公司都好nice，唔會人前人後兩個樣。
突然講我老闆以前係明星，因為早排有個專頁無啦啦post咗佢張相出嚟，有人讚佢好靚，有人話觀塘返工見過佢，有人話以前細個日日J，我都好想回應兩句，不過唔想用自己facebook account，開個假account就太多餘，所以選擇匿名投稿。
不過我有時喺度諗，其實一個明星回歸平淡，講真都係想過返正常人生活，如果我哋平時認到望兩眼唔過份，但盡量唔好打擾對方會比較好，偷拍真係好衰，攞合照就起碼講啱人哋個名先吖，真係你唔尷尬，尷尬嘅就係人哋。（完）
講起拍過劇再出返職場工作，點可以唔提老細想要高海寧電話呢單呀……
茄喱啡（上）你個candidate係御用妹仔嚟喎
https://hkofficedaily.com/?p=17293
茄喱啡（下）老細想要高海寧電話
https://hkofficedaily.com/?p=17304