喺呢間公司做咗3年，我承認自己同阿頭，仲有部門嘅同事都唔夾，性格嘅嘢真係冇得好講，呢幾年都係開工收工，lunch帶飯留喺個位食，冇參與同事飯局，咁我結咗婚有家人有小朋友，工餘時間梗係想陪屋企人多啲啦！
因為我唔會擺太多感情喺公司，所以最friend反而係隔籬部門一個叫阿Jack嘅同事，主要原因係我同佢當年差唔多時間入嚟做，一齊上過Training，所以會傾多兩句，其他時間我就比較安靜咁做自己嘢，阿Jack形容過我係「獨家村」。
一個星期前，阿頭無啦啦夜晚9點幾WhatsApp我，佢話公司想同事輪流work from home，原因係最近又多咗人中招，唔想office長期咁密集咁多人……
我回返佢Msg：「咁奇怪？而家仲有人理中唔中招㗎咩？最緊張嗰期都過咗喇喎！」
阿頭：「咁老細叫work from home咪work from home囉，之前公司都有畀同事home office㗎，不過今次分批同埋分部門之嘛，唔會扣大假，你放心啦！喺屋企做嘢都一樣啫！又唔係未試過。」
其實我覺得個理由有啲牽強，疫情最誇張嘅時候，老細畀我哋home office都不情不願，而家無啦啦分批分部門去WFH？仲要完全冇先兆？當日喺office唔講，放咗工先用WhatsApp通知同事？
咁我雖然同自己department啲人交情一般，不過都有係咁易msg其他同事確認下，同事回覆我：「係囉，我都係啱啱先知，咁home office又冇所謂嘅，仲好啦！」
當時我心諗，好啦，原來同部門其他同事都一樣work from home，咁第二日咪留家工作囉！
第二日，即係work from home嗰日，阿頭晏晝5點幾又WhatsApp我，佢話公司要cut人，唔好意思要cut我，又叫我唔使擔心，因為份糧會計到足，仲會有賠償，因為當日係星期五，所以阿頭就叫我下星期一返公司搞埋啲手續，交低職員證同櫃桶鎖匙，HR同會計會幫我搞掂晒啲文件嘢同埋計糧計賠償。
我聽到之後唔識反應，而阿頭其實用字都有禮貌嘅，我只係問咗句：「即係裁員？係咪得我一個係咁？」
阿頭回覆：「暫時係。」
聽完之後個心沉咗一沉，算啦，自己識趣，所以都冇問咁多，亦都冇問點解淨係裁我，反而我打咗畀隔籬部門嘅阿Jack想問清楚一件事。
我：「Hello Jack，想問你今日有冇返工呀？」
Jack：「有呀，今日唔見你嘅，sick leave？」
我：「唔係呀，我阿頭噚晚WhatsApp叫我work from home，話係老細要分部門分批home office，想問下我個department嘅人今日有冇返工呀？」
Jack：「有呀，佢哋全部有返喎，咁奇怪得你一個work from home？我哋department冇收到類似安排喎！」
我：「咁我知咩事喇，噚晚阿頭叫我WFH，頭先就打嚟話要cut人，嗌我下星期一返去搵HR同會計搞埋啲手續。」
Jack都好快意識到：「下！會唔會係……」
我：「應該係啦，想炒我，又驚我喺公司搞事，所以唔畀我知道last day，哈，做咗3年，估唔到咁。」
Jack有落力安慰我，好感激佢，不過我當時真係想沈澱下成件事。
無可否認，呢個只係我單方面講出嚟嘅遭遇，如果你問我阿頭或者同事，可能佢哋會話我呢個人好難頂，好難相處，想炒我好耐，我亦承認自己係獨家村唔夠合群，有時仲會同阿頭頂嘴，唔係下下都say yes照做。
不過就當我好乞人憎，咁樣嘅炒人方式又係咪一個好安排呢？你都係怕我搞事先至冇直接講，最後要用咁迂迴嘅方式去解僱一位員工，吹水話老細要分批work from home，第二日趁我唔喺office就通知已經被炒，使唔使咁呀？
我星期一返公司搞埋啲手續時並冇大吵大鬧，亦都冇搞事，講真都咁大個人啦，職場又咁細，大家好嚟好去。
我係先去人事部搞埋啲手續，出返去自己個位執嘢嘅時候，部門同事全部入晒房開會，夾都冇咁準。
坦白講炒我嘅賠償係足嘅，而且放淨嘅大假都計返錢畀我，望到嚿錢的確係開心咗幾秒，不過再諗清楚啲，而家已經係年尾，下個月又農曆新年，嗰種心理壓力真係好大，希望快啲搵到新工，我都會檢討下自己喺工作上有咩問題。