一句msg裡面有啲哈哈笑emoji並唔代表友善，上星期我就收到一個舊同事嘅msg，佢係咁打：「你知唔知，你打爛咗我飯碗呀😂😂😂」其實我最初係sense唔到佢講乜，加上呢個舊同事一個星期前走咗，大家都係相處咗唔夠半個月。
既然大家唔熟，我亦唔想估佢嘅原意，所以就好簡單咁覆咗一連串問號：「？？？？？」呢位舊同事再send多一個「😂」emoji過嚟先入正題，佢話：「因為公司請咗你，所以我先至會畀人炒，而家我失業喇😢」
佢咁樣講嘢，我真係猜唔透係講笑、自嘲，定係有咩弦外之音，既然係咁，我不如直接問：「咩意思？」
「我意思係，我其實唔係自己遞信，係畀公司炒魷🙈」
我：「講真？」因為呢位同事之前真係周圍同人講自己resign，而家佢講到有內情，的確令我有啲愕然。
「呃你做咩😂最衰係你啦🤣🤣🤣有冇工介紹呀？」
大家都係男人老狗，唔使句句都夾硬加啲emoji啦，頂你個肺同本身句子嘅原意又唔match，我見嘢就答：「冇啦，邊有工介紹吖。」
佢又回：「😂」
你老味畀夠emoji未呀！
因為好多嘢做，件事不了了之，點知隔咗兩日佢又send msg畀我：「仲未搵到工呀😂你就爽啦，做乜搶咗我份工呀😂」
唔識得點樣覆佢，後來我問上司，佢話唔使理咁多，仲話呢位被炒嘅同事不嬲都係麻煩友，其實想炒佢好耐，原來我未入嚟之前仲請咗個女仔，不過呢位舊同事就係咁講公司壞話，又唔教個女仔做嘢，態度勁差，搞到個女仔返咗幾日工已經無癮走咗。
上司：「你唔覺得佢對你都好差㗎咩，十問九唔應，我睇住你問佢個system點入嘢，佢聽到之後都冇睬你。」
講真我唔覺，因為我份人本身好獨立，同事唔肯幫就會搵方法自己研究或者解決，如非必要就無謂求人啦！」
我：「有啲印象，不過我以為佢好忙咋，所以都冇放喺心。」
上司：「咁係因為你心理質素好，之前個女仔覺得佢畀緊hard time，又覺得啲同事咁樣好難做得耐，咁我又唔可以同個女仔講就快炒個同事㗎嘛！」
另一位同事聽到我同上司講呢單嘢又走埋嚟插嘴：「你唔使理佢㗎！佢份人又卸膊，又虛偽，似足啲高官，其實政府工可能啱佢。」
虛偽呢樣嘢我就好認同，因為過咗一日又收到條友嘅msg，佢依然係亂柒咁用啲emoji……
「有冇坐我個位呀🤣我個位好呀，老細行過又睇唔到，同埋闊啲㗎🤣🤣」
我：「冇」簡而清，標點符號都費事加。
「你有冇少少內疚先🤣🤣🤣其實我有啲憎你lor🙈」
我：「點解憎我？」
「因為你搶咗我飯碗囉🤣」
強調一句先，我睇到佢呢句msg係冇嬲，可能自己完全唔係敏感嘅人，所以我咁樣覆：「講真，如果你覺得公司係都要炒你，咁我入唔入嚟做根本冇分別，冇我，都有第二個、第三個、第四個，所以我冇內疚，你都唔需要花時間去憎我，畢竟我係唔知道公司後面有咩打算同決定，我單純係搵工見工，佢請我咪返工囉，就係咁簡單。」
「😂😂」佢睇完我msg之後又覆兩個emoji……
唔知點解呢，我對佢嘅責怪說話係毫無反應，反而係啲emoji令我有少少唔耐煩，係嗰種明明好介意又扮唔在意，明明想攻擊你又戴晒頭盔扮講笑嘅感覺。
相信呢位舊同事有思考下我段msg，因為佢冇再msg我喇，其實炒魷又好，裁員又好，自己resign都好，人總要向前望，我希望佢盡快釋懷，唔好再糾結於我入嚟係直接或間接迫走佢，與其send呢啲無謂msg同埋emoji，不如努力啲搵新工仲實際啦！