「話唔做就唔做，我真係唔明而家呢一代，好好地一份office工已經唔使日曬雨淋，咁都唔滿意？一嚟畀間房你做經理好唔好呀？辭職又冇先兆㗎喎！雖然未過試用期唔使賠一個月啫，你都唔係突然話走就走啩！」
一朝早返嚟已經聽到我上司喺個位自言自語呱呱嘈，因為有個新請返嚟嘅女仔做唔夠兩個月就唔撈，打電話返嚟直接同佢講resign，上司問個女仔係咪搵到新工，個女仔話唔係，純粹覺得呢份工唔適合自己。
冇同事理睬上司，所以佢繼續發牢騷，希望得到我哋開聲和應：「我後生嗰陣出嚟搵工，邊有咩JobsDB呀，LinkedIn呀，以前就咁睇街招，喺啲工廠大廈樓下嘅告示牌搣紙仔打電話去㗎咋，搵工都要出街周圍行呀，邊有而家咁幸福上網就搵到呀！」
仍然冇人附和，上司儼如化身香港招聘進化史專家：「你哋記唔記得Recruit呀，後來行去地鐵站先有呢本嘢派，最戇居係嗰本青雲路，好似係跟壹本便利，即係你要佢本青雲路搵工要另外畀錢買書，搵得工已經窮啦，仲點買書呀！你哋有冇印象係咪咁？所以而家呢一代班人真係身在福中不知福。」
我唔係好認同嗰個新女同事辭職冇先兆，我見過上司assign一個project畀佢做，明明話下星期交，點知一日後已經問搞掂未，個女仔反問唔係下星期先要咩？然後上司就話：「係咪一定要last minute？我講下星期就一定下星期？唔會早少少？」
我又見過呢個女仔因為M痛而全日唔出聲，其實佢冇伏喺度休息或者請假，只係當日話唔舒服而冇講嘢，而對手都係不停做嘢，上司路過見佢咁靜就講咗句：「做咩呀？頭先食lunch又唔一齊？同男朋友鬧交呀？而家啲新一代真係……哈！」我都唔知佢「哈」咩？
喺個WhatsApp group裡面，上司打完個msg之後，呢個女仔覆咗句：「okok」點估到上司會突然扯火，佢喺個位同個女仔講：「你覆嘢唔可以打一個ok㗎咩？係要打okok，即係嫌我煩呀？」我都聽到呆咗，一個ok同兩個ok原來可以拆解到咁樣。
WhatsApp group仲有好多嘢，覆得慢啲，話你；覆個emoji，話你敷衍；星期六日，直頭tag你個名焗你回覆msg，當然平日工作仲有好多麻煩同屎忽嘢，真係要打相信用1000字都打唔晒。
呢個女同事後期已經明顯做得唔開心，明眼人都睇得出，上司可能真係唔知，又或者係詐唔知，所以個女仔突然打電話返嚟裸辭，我個人覺得並唔意外，做得唔開心當然係趁未過試用期啦，再遲啲就要一個月通知。
而其實呢位女同事曾經私下同我講：「你覺唔覺得我哋阿頭係典型嗰種老屎忽，聲大夾無準，跟住佢真係好難頂。」
我當時笑住答佢：「你叫我點答你呀。」
「你咁都忍到？」
我都係笑住迴避問題，有啲嘢盡在不言中，畫公仔畫到出腸就無癮啦！我唔係忍到，而係我有頭家要養，個仔都未夠1歲，老婆又辭咗份工，唔通我反上司枱唔撈咩，奶粉好貴㗎！不過個女仔就唔同，唔係年紀問題，係包袱問題，佢仲有資格揀。
年紀同擔子唔一定掛勾，20出頭已經一身兒女債嘅人我見過，40幾歲仲係一個人自給自足，唔使供樓唔使還貸款嘅人我亦見過。
我後生都試過裸辭，當年個老細嘅嘴臉我仲記得，佢問我點解唔做，我答咗句：「想休息下。」然後個老細係冷笑。
可能當年嗰間公司每一個人都覺得我好笑，未搵到工就辭職，呢個後生仔咩料呀？（嗰陣我仲係廿幾歲後生仔）
不過我而家諗返轉頭仍然無後悔當年裸辭嘅決定，嗰段時間我睇咗好多書，去咗幾個旅行，仲識到而家個老婆，我又可以靜靜地諗下自己想做乜，雖然目前份工唔係咩dream job，但起碼都叫穩定，會唔會再轉工就等個仔大啲先諗，或者儲夠彈藥將來搞啲小生意又唔定，呢啲都係裸辭之後思考過嘅人生規劃。
所以其他人唔理解裸辭唔緊要，但都唔應該胡亂去批評人，始終每個人嘅擔子唔同、經歷唔同、人生規劃唔同，其實唔係所有裸辭都係衝動，每個人做出離職嘅決定之前，相信都會考慮咗好多因素，希望嗰個女仔可以趁裸辭後嘅空檔諗下自己想行咩路，跟住會搵到一份鍾意嘅工啦！（完）
每個年代都有各自嘅好處、難處、機會、缺點，其實冇嘢好比較，以下兩篇文都係2021年嘅投稿，有談及呢一代難買樓難上位，亦有講到職場PUA嘅問題。
呢一代難升職 難買樓 難創業
https://hkofficedaily.com/?p=14479
你知唔知咩叫職場PUA 可能我哋都遇過
https://hkofficedaily.com/?p=20192
《辦公室日報》YouTube就快又有新一集，如果未睇居酒屋侍應同埋男公關獵頭嘅訪問，希望你會click以下連結支持下。
https://youtu.be/spMC99H_nxk