你知唔知咩叫職場PUA 可能我哋都遇過

見工經驗多,各式各樣嘅問題都畀人問過,點解要請你?5年後你希望自己係點?你會點樣處理壓力?你覺得自己有咩缺點?以上種種都問過晒喇,最近一次interview我就遇到一條新問題,或者呢個並唔係常見嘅題目,但我認為好值得分享。

呢次係2nd interview,個interviewer係HRM,佢問我點睇PUA ,然後再強調一句係講緊職場PUA,咁真係唔好意思,聽都未聽過,冇得充大頭鬼,所以我就直接向對方講:「唔好意思,我唔知係咩嚟,介唔介意解釋下?」

HRM並冇講埋啲學術性嘅分析,反而向我舉咗啲實例:「即係我一直否定你做嘅嘢,但又唔會有任何實質建議同埋方向畀你,又或者喺其他方面打擊你自信,不斷灌輸出面好難搵工嘅訊息,等你唔敢輕舉妄動,就算覺得唔合理都只可以服從,同時又會畀假像出嚟,例如話睇好你,然後不斷塞啲工作畀你,放咗工都搵你處理公事,從而美化壓榨。」

由於係第一次聽職場PUA呢個名詞,所以我只能夠用本能去回答:「首先我入得嚟做都會盡量配合,我覺得上司有義務解釋清楚工作嘅方向同內容,因為多啲溝通,就行少啲冤枉路,另外自己都會經常同其他同事,或者係出面嘅朋友溝通,咁我就會更清楚市況,例如係咪真係好難搵工,唔好畀自己鑽牛角尖。」

其實嗰次嘅interview係愉快嘅,落到樓我已經即刻search乜嘢係職場PUA,原來全寫係Pick-up Artist,本身係講緊感情,係一種搭訕技巧同埋兩性之間嘅精神控制手段,後來就有好多人應用於工作方面,咁點為之職場PUA呢?其中一點就係HRM所講嘅不斷否定,又唔比清晰方向同埋可行嘅解決方案,而佢所提及到嘅「出面好難搵工」,潛台詞就係「唔該你醒醒定定珍惜呢份工」,呢個行為喺PUA上面就係向員工製造焦慮。

職場PUA仲包括人身攻擊,喺工作上不斷貶低你,令員工愈嚟愈冇自信,降低自我價值,另外就係HRM都有提及嘅美化壓榨,例如你愈做得多,愈做得好,講一句「最信得過你」,然後就不斷加重你工作量,所以公司經常會出現愈廢嘅人愈唔使做,愈勤力嘅人愈要做得多。

簡單綜合一下,職場PUA就係
1)不斷否定;
2)美化壓榨;
3)製造焦慮;
4)人身攻擊,同埋
5)制定一啲冇辦法完成嘅工作同目標,
而稱之為PUA係唔止單一動作,例如否定你同埋踩完你之後,偶爾會話你幫得手、睇好你、信得過你,直接啲講就係一種精神控制同埋情感勒索,其實好多兩性關係都係咁,而職場方面就更明顯,而且傷害性更大。

諗諗下,我咪就係因為上一份工有職場PUA先決定resign囉,以前個阿姐完全唔知自己想要乜,總之叫你做咗先,做完出嚟佢就會ban,但又冇方向同建議,另外會喺私人時間例如放假嗰陣搵我傾公事,久而久之想我成為一種習慣去接受。

或者我呢次嘅投稿冇其他人咁精彩,不過實在太想分享乜嘢叫做職場PUA,因為我相信好多人都遇過。

仲未知呢份工請唔請我呀,亦都分唔清個HRM咁樣問嘅目的係乜,究竟佢就係施予職場PUA嗰個人吖,抑或係暗示呢間公司有職場PUA而希望我有心理準備呢?不過唔緊要啦,因為最佳應對方案就係唔好害怕辭職,如果佢真係請我,又真係有嚴重嘅職場PUA,我會毫不猶豫遞信,始終公司、老闆、上司,只係我哋生活中一個配角,唔應該畀佢哋控制或者摧毀自己嘅生活同埋人生。

希望各位將來interview遇到呢個問題,又或者工作上遇到職場PUA,會識得分辨同埋處理啦!

error: