公司有個男同事叫Alvis，條友講嘢勁浮誇，初初覺得幾funny，但後來發覺Alvis對住所有人都會講埋啲勁恭維嘅說話，無論畀佢讚嘅人定係旁邊聽到嘅人都會好尷尬，所以佢每次笑笑口行埋嚟我就驚㗎喇。
印象中你之前有篇稿又係話公司有個擦鞋仔，讚同事似AK，讚老細揸Tesla好型，但係對住低級職員就另外一個樣，咁Alvis就有少少唔同，佢對住老細又係咁讚，對住Junior又係咁讚，對住茶水阿姐都一樣，好似幾正面係咪？不過我想講呢，Alvis其實都會搞到人㗎！
上次阿Alvis行埋嚟望住我講：「喂，想問你一樣嘢。」
當時我個心已經涼咗一截，但都要應下佢：「係，有咩幫到你呢？」
Alvis：「你咪有個女朋友嘅，佢爸爸媽媽係咪好唔鍾意你㗎？」
突如其來轉風向？咩玩法？佢成功咗喇，我打咗個突之後無奈要問下咩事。
我：「點解咁講呢？」
Alvis：「冇呀，因為你太靚仔，通常啲老人家唔鍾意㗎，佢哋覺得靚仔冇本心，一定以為你有好多女人。」
DLLM！同部門兩個女同事連水都噴埋，嗰兩條女仲反問Alvis：「 佢都叫靚仔？Alvis你係咪有嘢要求佢呀？」
呢啲咪係最classic嘅「講嗰個唔尷尬，尷尬嘅就係人哋囉！」
勁過你啲植入式廣告喎聶瞳，佢個圈兜到出去文錦渡再出返嚟尖沙咀咁樣讚人，不過我就唔識欣賞喇，正正常常講嘢啦好冇呀？唔使讚我靚仔㗎，有心喇，佢而家搞到我畀兩個女同事笑咗好耐呀！
Alvis仲讚過茶水阿姐keep得好，頂盡似30出頭，其實人哋62啦，你有個譜好唔好呀？嗱，茶水阿姐又受喎，笑到見牙唔見眼，有次佢哋喺pantry嘅對話仲經典。
Alvis：「你後生應該好似夏萍喎，以前係咪好多男朋友㗎？」
茶水阿姐：「乜你咁識講嘢呀，夏萍好靚㗎，你咁後生都有睇以前嘅粵語殘片？」
Alvis：「我唔係講香港個夏萍呀，我係話你似柯德莉夏萍呀，嗰種古典美唔係人人都有。」
你贏啦Alvis，柯德莉夏萍都講得出，連古典美呢啲詞彙都出埋，難怪茶水阿姐會認住阿Alvis隻杯，全office淨係幫阿Alvis一個人洗私人杯㗎啫！你讚人讚到咁浮誇，抵你有VIP待遇嘅。
不過阿Alvis呢種浮誇其實係會出事㗎，最慘唔係佢自己出事，係人哋出事，話我靚仔冇本心呢單算小事，佢有次讚老細似吳尊先至大鑊，累到個新入職嘅男仔差少少過唔到試用期。
上年我哋公司有段時間work from home，嗰次各自喺屋企開視像meeting，印象中有8至9位同事參與，開開下會Alvis隔空問老細：「老細，你呢個角度睇好似吳尊喎！」
頂你個肺又做咩呀，大家開會傾緊正經嘢㗎，佢直頭漠視個議程突然講啲唔關事嘅嘢……點估到老細又受喎！
老細真係回應：「吳尊？唔係啩，吳尊好靚仔㗎喎，我邊似呀？」老細先係愕然，繼而沾沾自喜，從面部表情好輕易睇得出。
意外就係咁樣發生㗎喇，我哋呢啲跑慣江湖梗係識忍笑啦，但係嗰位未過試用期嘅男仔就心直口快，對住個鏡頭問咗句：「吳京定吳尊呀？」
你唔得咁老實㗎小朋友，呢度係職場，你一笑帶過就算啦，何必咁認真同執著呢？
我哋成班出席視像會議嘅同事都唔知點接，結果Alvis走去打完場：「點會似吳京呀？老細呢個角度側側地睇好似吳尊㗎，冇人講過咩？真係好似喎！」
收聲啦！ 老細塊面已經黑晒喇！
聽返新仔個直屬上司講，開完會幾日之後，老細有問過新仔嘅工作表現如何，其實係好唔尋常㗎，因為老細一般唔會過問Junior職員嘅情況，好在嗰位上司話新仔冇問題，仲想提早畀對方過試用期，然後老細好冷淡咁講咗句：「是但你啦，你話佢得咪得囉！」
當然，你可以話係新仔唔識做人，不過唔係個個返工都老奉要迎合㗎嘛，老細成隻「豬頭嚦」咁樣點似吳尊呀？好在人哋個上司保佢咋，否則Alvis隨時搞到新仔過唔到試用期呀！（條新仔而家仲做緊，放心）
關於刷鞋同得罪人嘅故事，你對以下兩段2021年嘅投稿有冇印象？
當雙面擦鞋精 遇上回流老闆仔
https://hkofficedaily.com/?p=20455
同老細踢波慘過做鴨 有人鏟到經理入院
https://hkofficedaily.com/?p=18860