投稿讀者：Chapman
我係一個70後嘅老鬼，成條team都係90後，上年大三罷嗰陣，我open畀下屬自由決定，最後成個部門嘅人都響應，老細就梗係唔高興啦，仲捉咗我入房照肺，鬧我唔識得管理，太過放任班下屬。
當時老細係咁講：「嗰啲咩90後00後做嘢靠唔住㗎！欠佢哋㗎？唔畀罷又周圍唱公司，畀佢罷又成班走晒去唔返工。」
公平講句，靠唔靠得住，其實同年齡或者年資係冇關，邊個話老嘢同埋Senior一定靠得住？更何況我好明白點解呢一代咁重怨氣，咁想改變。
有時望住班後生，我會覺得佢哋呢一代好攰好辛苦，人工係全公司最低，鑊氣就最多最重，OT一定有份，Bonus就細細份，升職嘅空間幾乎係零，因為當一間公司得咁多個position，包括我在內嗰班老屎忽如果唔走，你根本就冇位升上去。
9點返工，食個lunch趕頭趕命，平均7至8點先離開公司，返到屋企都已經冇咗半條人命，然後瞓醒又要返工做爛頭卒。其中一個員工有次半夜12點WhatsApp我，原來係漏咗份文件唔記得send，所以想向我備咗案先，我問佢做咩仲唔瞓，佢話只係得夜闌人靜嘅時間完完全全屬於自己，唔捨得咁早瞓。
其實佢冇講錯，工作已經榨乾榨盡所有黃金時間，真係得夜闌人靜先搵得返自己嘅人生。
講忙，人人都係咁忙，但係講機會，呢班後生真係冇乜，有個上年結婚，同老婆搬出去住，租金同生活開支已經佔佢兩公婆加埋總收入一半有多，仲要各自畀家用。上年我特登幫呢位同事嗌加薪，老細一嘢就ban返轉頭：「租樓就不嬲唔抵㗎啦！一係你唔好結婚，一係就買咗樓先吖嘛！」
典型老屎忽思維，係人都知租樓唔抵，但有冇諗過呢一代根本買唔到樓？三四百萬都係得納米樓，住到入大西北都要六七百萬，六七百萬喎！佢要供幾多年？當你公一份婆一份，好叻仔揀供25年個plan，我又想問下喇，請問邊個可以保證份工一定做到25年？25年內真係唔會失業？真係無縫接軌？而家個社會連5個月後變成點都冇人知啦！
有瓦遮頭咁基本嘅要求，對而家班後生嚟講係遙不可及嘅一件事。
我哋以前嗰代返工一樣辛苦，但係機會多過而家好多，因為當時好多嘢都未有，大把老細連英文都唔識，不過肯做肯搏依然有得發圍，而家呢一代即使大學畢業都唔一定搵到工，就算佢哋辛辛苦苦儲咗筆錢搞生意，大財團一見到有商機就即刻copy，再用無限金錢去做得比你更好更快，你根本好難同有錢佬或者大集團鬥。
而家呢一代之所以生活得咁攰，某程度上係好多資源早就畀上幾代霸佔同瓜分晒，例如晉升空間、住屋，同埋商機。講攰，其實新一代比起上一代更攰。