作為一個普通職員，我唔知靈堂女人嘅後續，淨係從眉頭眼額睇得出老闆娘又嬲又委屈又不知所措，其實佢當時都好淡定㗎喇，試下調返轉係我死咗，喪禮上有另一個女人嚟踩場吖，我老婆應該會提早火化我條屍……
雖然同事私下議論紛紛，但公司都係要繼續運作㗎啦，點知隔咗半個月左右，又有另一個女人殺上office話要搵老闆娘，對比起上次靈堂嗰位，呢個女人撈味重好多，講樣講身材亦都好好多，佢冇哭哭啼啼，仲要有啲霸氣。
因為我唔知啲女人係邊個同埋叫咩名，容許我簡單地分類，上次嗰位係「靈堂女人」，今次呢位撈味咁重，就叫「壞女人」啦！
壞女人上到嚟office之後好冷靜，強調唔係搞事，仲話自己係Norman嘅女朋友，想搵老闆娘但一直搵唔到，所以今日一定要見到面先肯走，嗌同事call老闆娘返公司。
我就梗係冇老闆娘電話啦，不過秘書有，結果亦真係call咗返嚟，老闆娘本身叫個壞女人入房傾，但壞女人唔肯，似乎係希望全世界一齊聽。
Norman呢個名係佢啲女人叫，我都係叫返甘生或者舊老細順口啲，原來甘生買咗層樓收埋呢個女人，物業係黃埔花園，個女人一直都住緊，甘生間唔中會上去，仲口頭答應過會將呢層樓轉畀佢。
壞女人：「我都唔想煩到你（佢指老闆娘），但Norman走得太突然，又冇人通知我，佢應承過會將層樓轉我個名，白紙黑字寫低㗎，你係佢老婆一定認得個簽名。」
搞咩呀甘生？出去金屋藏嬌仲要Black and White？請問係咩玩法？雖然我冇得行埋去睇呢張「承諾書」，但個人估計甘生當時應該係想氹住個壞女人先，點知世事無常，後來就出現呢個局面。
最估唔到係，老闆娘嘅態度比起個壞女人更冷靜，冇靈堂嗰次咁錯愕，究竟係一早知道定係哀莫大於心死呢？呢層我就唔知喇，淨係知道老闆娘最後以一句：「會交代律師同你處理。」跟住就完咗件事，散場！
「靈堂女人」同「壞女人」比我嘅感覺係，前者似乎真係好傷心，大嗌咗幾次話要同舊老細生仔，應該係真愛啩；後者就開口埋口只係講層樓，呢個唔使讀解都知道係為錢而嚟，咁究竟甘生出面仲有幾多女人呢？
謎團喺個壞女人走咗之後半個鐘已經解開。
壞女人走咗之後，全公司啲人靜晒唔敢講嘢，因為老闆娘未走吖嘛，佢仲自己走入甘生間房唔知做乜，大約半個鐘之後，老闆娘叫咗個IT Manager入去，順帶一提，IT Manager即係我阿頭。
又過多10分鐘，老闆娘終於離開，而我阿頭就行埋嚟細細聲講：「你跟我入一入去吖，有啲嘢要幫手。」我阿頭啲表情同埋語氣好閃縮，一聽已經知係有啲嘢，其他同事就開始圍埋嚟問我阿頭咩事，阿頭粒聲都冇出，淨係叫啲人唔好咁八卦。
入咗甘生間房再閂門之後我已經忍唔住問：「咩料咁神秘呀？」
阿頭：「大鑊嘢，過嚟睇！」
甘生部腦係開著，裡面個folder係一大堆圖，張張都係裸女（其實都裸唔晒，因為有啲係條女著制服扮學生、空姐、護士……），仲有好多性愛「紀錄片」，如果唔係見到甘生個樣，我直頭以為係就咁喺鹹網download落嚟，原來甘生有鋪AV男主角癮，睇唔出佢咁激。
我：「嘩，好癲喎！」
阿頭：「癲？一個folder咋，你back返出去，仲有好多個folder，全部都係。」
我：「呢個女仔咪之前公司個秘書Flora！」
阿頭：「你講嘢咁似老闆娘嘅，佢頭先又係講呢句，我之前都覺得奇怪㗎喇，Flora返咗幾個月無啦啦不辭而別，講開又講，你估而家個秘書有冇吖嗱，再back出去搵搵。」
我：「而家個秘書阿嬸嚟㗎喎，唔係咁重口味呀？」
阿頭：「有錢人諗嘢好奇怪㗎，我哋唔會明㗎喇！」
我：「其實咁樣睇會唔會唔係幾好呀？私隱喎！」
阿頭：「呀屌！係喎，掛住睇唔記得做正經嘢，頭先老闆娘叫我幫佢抄晒啲相同片出嚟。」佢講抄嘅意思係copy。
雖然好衰，但作為一個正常嘅男人，見到呢啲「閃卡」點會唔望多兩眼吖，嗰堆愛情動作片嘅主角仲要係你識得嘅人，我唔係指已故嘅甘生呀，我講緊之前個秘書Flora咋！
呢度睇，呢度散，除咗返屋企同老婆描述之外，我真係冇同其他同事講過，至於阿頭……我相信佢都冇同人講嘅。
老闆娘點解要叫阿頭抄低啲圖同埋片呢？我哋唔知，亦都冇問，但相信唔係想鑑賞亡夫嘅床上表現，最符合邏輯嘅諗法應該係收集出軌證據，有咩事要爭遺產都用得著啩，我淨係諗到呢個原因咋！
「閃卡」嘅用途得老闆娘自己知，我淨係知再過幾個月之後老闆娘一聲「唔玩」，成間公司話執就執，不過嗰陣係收到風同埋聞到浸味嘅，會計部有同事通風報信，話接到「order」埋大數，老闆娘仲出去搵咗會計師樓同佢哋交接，所以大家都有晒心理準備㗎喇。
無論一個人嘅心思幾細密都好，但凡發生過嘅事都一定會留下痕跡，更何況甘生嘅離開係一場意外，佢連毀滅出軌證據嘅時間同埋機會都冇，生前經營嘅好好先生形象「臨天光瀨尿」，雖然唔排除老闆娘一早已經知，不過「靈堂女人」係當住全部親朋好友面前大吵大鬧，「壞女人」又摷到上公司搞到所有同事都知，今次真係一鋪清袋。
距離Kamila嘅生日愈嚟愈近，景宇又走嚟問我：「仲未諗到送咩喎！呢啲妹妹仔究竟鍾意咩呢？呢排我覺得佢冷冷淡淡，唔通畀條仔知道咗？唉，我真係睇唔透，你點睇呀？」
我：「講樣嘢畀你聽吖景宇，我老婆今年44歲，噚晚佢仲喺梳化攬住我，問我結咗婚咁多年仲愛唔愛佢，然後今朝就因為我話佢隻蛋煎得燶咗少少而嬲咗，成朝唔覆msg唔聽電話，學人玩冷戰，嗱！如果我冇估錯呢，一陣5:30左右佢就會搵返我㗎喇，因為想我放工車埋佢吖嘛，不過都可能唔會，隨時自己搭巴士返屋企……咁你話喇，我連44歲嘅女人都睇唔透，邊有心機去睇你個24歲妹妹仔呀？景宇，有老婆就唔好玩啦，因住搞出個大頭佛呀！」
景宇：「而家唔玩，唔通70歲先玩咩，到時就冇免費餐㗎喇！」成日買禮物都叫免費？真係唔明佢點諗。
其實我都係正常男人，見到靚女都會望多兩眼，一樣會偷偷地睇AV，不過玩女人就……見過舊老細嘅「意外」，我真係唔敢喇。(完）
雖然YouTube拍片辛苦過寫文好多，不過見到大家嘅feedback咁正面，真係幾辛苦都值得，如果你未睇居酒屋侍應嘅訪問，可以click以下連結慢慢欣賞，多謝支持🙏🏻
https://youtu.be/spMC99H_nxk