「Owen，嗰次我生日，其實只係想大家靜靜地食餐飯，但你安排咗兩個人走嚟彈結他，佢哋企喺張枱前面唱生日歌，成間餐廳嘅人都望晒過嚟，有人不斷影相，有人全程拍片，其實我真係好尷尬，唔係每一個人都鍾意咁高調，嗰兩個人仲要唱多兩首歌先走，我唔知可以畀咩反應，因為我唔enjoy成為焦點，而喺我最無助最難為情嘅時候，原來你都一直用手機對住我拍片，仲笑得好開心，嗰10分鐘好似一個世紀咁漫長，好難捱，好尷尬。」
Owen將Polly畀佢嘅msg公開，希望我哋幾位同事可以評下理。
而同一時間，Polly亦已經離職，雖然係early leave，但傳聞老細同HR有共識，知道Polly處境尷尬所以唔使賠錢早走，唔大大聲講出嚟係唔想做壞規矩，免得將來有同事early leave又拎返呢個case嚟講。
Owen極之唔認同Polly嘅說話，佢覺得女朋友生日，搵兩個人走嚟彈結他唱情歌係好有心思，亦都非常浪漫：「邊有女仔會唔鍾意㗎？佢有冇諗過我花咗幾多時間同功夫去舖排呀？」
女同事Eunice：「其實唔係男仔女仔嘅問題，係性格問題，唔係個個都想咁高調同矚目，就好似你總動員全公司求婚，係咪100%肯定Polly已經ready好？如果佢未，當日嘅環境同氣氛即係焗佢嫁，你擺咗佢上枱，佢say no又唔係，走又走唔到，本身兩個人嘅事私下解決就得，但搞到咁大，佢連留喺度做都好難。」
Owen：「點解唔走得？如果佢未準備好，當日咪唔好應承囉！」
我：「成個門口塞住晒，點走呀？其實當時除咗接受你隻戒指，基本上冇第二條路行。」
Owen：「咁我呢？我付出咗咁多，點解佢唔領情？你知唔知隻求婚戒指幾多錢？粒聲唔出就咁畀返我，自己唔鍾意就走咗去，你哋又知唔知上次搵人彈結他，仲有嗰間餐廳，全部都係我精心挑選，我對Polly從來唔會計較洗咗幾多錢。」
唔知點解，我覺得Owen口中嘅「唔計較」，其實已經係計較緊，佢嘅付出其實係要求回報，而且從中睇得出Owen好自私，佢覺得總動員求婚，對方就一定要嫁；佢覺得搵兩個人彈結他，對方就一定要sweet；佢覺得凡事萬眾矚目，對方就一定會enjoy……但係你必須留意，所有嘢都係「佢覺得」。
Owen冇畀Polly選擇自己喜愛嘅方式，其實以上嘅事，都只不過係Owen覺得好，覺得表現到愛嘅方式。
另一位女同事Michelle：「唔好介意，我想講一件事，Polly同我講過，你會失驚無神上去佢屋企……」
未等Michelle講完，Owen已經急不及待辯解：「又有咩問題呢？有時打畀Polly，知道佢未食嘢，我咪買嘢食上去畀佢囉，你唔覺得好溫馨㗎咩？」
我：「Sorry，我可唔可以搭嘴？或者我哋由細到大睇電視，會有一種假定同人設，失驚無神出現就等於驚喜，其實唔係個個性格都鍾意咁，我以前女朋友都試過，唔知點解好反感，有時你想享受下一個人，著住底褲喺屋企爛撻撻都係一種放鬆，但對方突然出現，真係會打亂本身嘅安排。」
Owen：「喂，咁我送完個飯畀佢，講明唔使理我，我可以自己走㗎喎！」
我：「你係施予者，你講得出可以自己走，佢係接受者，見到你走上嚟，如果唔陪下你，佢個心會唔舒服，你都唔會expect佢拎完你個飯盒就閂門，當你外賣仔咁㗎嘛！」
Owen：「我唔明有咩問題，我都話自己走先啦，佢使咩唔好意思啫，你唔鍾意另一半畀驚喜你啫，唔代表其他人嘅性格同你一樣。」
似乎佢講極都唔明，如果用呢個邏輯，咁你鍾意畀驚喜人啫，都唔代表其他人係同樣性格喎。
Michelle：「Owen，不如比我講埋落去先，嗰次星期日你突然出現喺佢屋企門口，Polly真係唔鍾意，因為唔捨得你山長水遠過嚟就咁走，佢原本計劃嗰日溫日文，結果就要換衫同你出去行街。」
Owen：「唔需要囉！都話我送完飯盒可以自己走。」
Michelle：「仲有，上次Polly出trip，你話要幫手照顧佢媽咪，會私底下約佢媽咪飲茶，你知唔知佢好困擾？」
Owen：「點解要困擾呢？Polly係單親家庭，佢唔喺香港嘅時候，我幫手照顧下伯母啫。」
Michelle：「你有冇諗過伯母都未必需要人照顧呢？」
Owen：「一個老人家，點會唔需要呢？」
算啦，我哋幾個已經放棄解釋，《給自己的情書 》裡面有一段歌詞係「自己都不愛，怎麼相愛，怎麼可給愛人好處。」不過有啲人嘅理解係完全錯誤，正如Owen，好多野做出黎純粹想滿足自己「要做」既心態，要show畀對方睇佢嘅愛意，但就冇換位思考別人係咪願意接收，或者接收得舒唔舒服，直接啲講，呢種係情緒勒索。
聽班女同事講，佢兩個分開之後，Owen仲纏繞咗Polly一段時間，瘋狂send msg畀對方，不斷叫對方出嚟食飯，仲會喺公司其他人面前猛咁數落Polly，口口聲聲話愛，但行為上就好似要摧毀對方先至安樂，說穿了，其實Owen最愛嘅並唔係Polly，係佢自己。
「自己都不愛，怎麼相愛，怎麼可給愛人好處。」呢一段歌詞，唔應該好似Owen咁樣去詮釋。