《給自己的情書》上 – 同事合演求婚大作戰

「麻煩晒大家,一陣你哋喺會議室視像嘅時候,畫面就會切換為我預先拍咗嘅片段,到時我會向Polly求婚。」

Owen好緊張,又睇得出佢好興奮,呢個驚喜求婚應該策劃咗好耐,見佢反覆檢查西裝褸入面嘅戒指,另外仲準備咗一紮花。

老細:「咁點呀?我呢個臨記要做咩配合你?」

Owen:「點敢吩咐你做嘢呀老細,係咁意拍下手同埋起哄就得㗎喇!」

分工好清晰,有份開會嘅人包括老細在內,到時只需喺會議室不斷講:「嫁畀佢!嫁畀佢!嫁畀佢!」Owen預計Polly會好surprise,而office裡面其他同事亦都有任務,就係等Owen拎紮花入conference room之後尾隨進入,換言之全公司會共演一幕「求婚大作戰」。

最誇張係有份開視像嘅兩位Regional同事都一早知情,其實開會為名,求婚為實。

Owen同Polly拍拖喺公司已經唔係秘密,呢段辦公室戀情大約一年前曝光,據聞地下情維持咗幾個月就畀其他同事發現,男女雙方都年過三十,可以話係適婚年齡,至於會唔會太快求婚就好難下定論,畢竟感情呢樣嘢冇準則,有人經歷多年長跑都未修成正果,亦有人相識幾日已經閃婚定終身,最緊要都係睇當事人嘅感覺。

距離「求婚大作戰」嘅時間愈嚟愈近,連我呢個飾演開會職員嘅閒角都有啲緊張,見慣大場面嘅老細就明顯放鬆好多,佢仲講笑咁問有冇人負責拍片,遲啲想upload上YouTube,當係幫公司做Marketing,仲話要send去畀Regional嗰邊,等外國班同事感受下香港office有幾歡欣。

Owen:「Aden會幫手揸機,不過擺上YouTube就唔好啦,分享畀Regional嗰邊梗係冇問題啦!」

時間到,Action!

假嘅視像會議只係開咗3分鐘,畫面就切換成Owen一早錄定嘅深情剖白,conference room裡面嘅人笑得好開心不斷Wow,不斷Woo,而Polly就完美演繹咩叫「擘大個口得個窿」,成個人呆晒,呢個應該係被求婚嘅正常表現啩,事出突然,佢反應唔切都好正常。

甫定下神,男主角已經拎住紮花入房,Office其他同事跟住入嚟好似嘍囉咁起哄,conference room水洩不通,Polly係唯一冇表情同反應嘅人,然後Owen單膝下跪,喺西裝褸袋拎出一個戒指盒,再「啪」一聲打開,遞到Polly面前:「你願唔願意嫁畀我?」

全世界得一句對白:「嫁畀佢!嫁畀佢!嫁畀佢!嫁畀佢!嫁畀佢!嫁畀佢!」由於間房塞咗太多人,迴聲響徹,身在其中除咗興奮之外,亦多少有啲耳鳴同頭暈,大家都笑得好開心,已經淪為路人甲同路人乙嘅兩位Regional同事只係對住個鏡頭笑,已經聽唔到佢哋講乜,但係Polly並冇展露出預期中嘅笑容,亦冇好似外國求婚片段嗰種淚流滿面嘅激動。

Owen久跪未起,再講多句:「你唔嫁畀我,我就一直唔起身㗎喇,一陣放工都唔走。」

老細喺旁邊懶風趣:「你放工跪喺度唔走,我唔會當OT㗎!」全場又一輪大笑,Polly都笑,不過嗰種笑容非筆墨所能形容,係苦笑,係尷尬,係有種無何奈何,但唔畀反應似乎又落唔到台。

其他同事繼續加力:「嫁畀佢啦!佢好有誠意㗎!」

Polly終於伸手去接過戒指,全場再一次起哄,老細話大家咁開心,一於萬歲請食tea,不過Owen話應該由佢請,因為要多謝所有同事咁幫忙,自己先可以娶到個好老婆。

曲終人散返埋位,坐隔籬個女同事Eunice細細聲話:「覺唔覺Polly面有難色?頭先有一下仲掩住面。」另一位女同事Michelle亦搭嘴:「係囉,好似唔開心咁嘅。」

男同事Morris加入討論:「點會呀!怕醜所以掩面啫,之後佢都笑返啦!」

Eunice:「但嗰種笑係無奈同尷尬喎,唔係開心興奮嗰隻。」

Morris:「你識讀心咩,如果Polly唔想嫁畀Owen,頭先就拒絕咗啦!」

求婚事件沖喜,Office連續兩日嘅氣氛都好愉快,兩位準新人亦成為大家茶餘飯後嘅話題,但係呢個時候,竟然傳出Polly辭職嘅消息,聽人事部講,Polly直情想賠錢提早走。

(未完待續)

《給自己的情書 》下 - 喺餐廳嗰10分鐘好難捱
https://hkofficedaily.com/?p=18669

error: