呢個惡夢係從一個客開始……「我之前睇過一項調查，Facebook係老人家玩㗎喇，後生嗰班唔鍾意，佢哋玩抖音，中國多人睇吖嘛，想國際化啲就TikTok，全世界都睇到，早排我飛日本買機票又貪得意搵下啦，人哋ANA咁大間日本航空公司都玩TikTok呀！」
個客遞咗部手提電話畀我老細睇，果然見到成班日本空姐喺度跳舞，連地勤都跳埋一份，然後個客又繼續講：「你有你反，人哋全世界都流行係事實，所以我哋唔做就遲早被淘汰，我啱啱先叫同事幫公司開咗個帳號。」
我哋公司係做Exhibition，今次同個客見面本身係傾宣傳策略同成本，所以講講下就自然講咗去社交平台嘅投放budget，最弊係我老細聽完之後好buy，佢覺得如果我哋唔跟大氣候，可能幾年後已經會唔入流。
老細：「真係ANA喎，全部日本人嚟，不過我聽講三上悠亞嗰啲全部都有TikTok㗎喇！」
客：「點止日本人呀，台灣都大把明星有TikTok，有冇聽過韋禮安呀？A-Lin有聽過喇啩，唱《比悲傷更悲傷的事》嗰個台灣歌姬呀！個個都玩緊，我哋呢個project有台灣公司一齊參與，你諗諗有冇得擺埋TikTok元素落去啦！」
最後個project會唔會擺埋TikTok元素就未知，因為截至我投稿嘅時候，成個job都係未confirm，不過另一樣嘢就confirm-ed，我老細聽完個客嘅推薦，覺得非開TikTok不可，所以佢吩咐咗另一位同事去搞。
當時係11月，我仲未意識到大難臨頭，但係隨住老細愈嚟愈認真，我就發覺成件事唔係講笑，因為負責搞TikTok嗰位同事搵我哋去排舞……
排舞？我打份office工你叫我去排舞？我唔係做dancer，都冇打算參加全民造星喎，排咩舞呀？
同事：「老細話要跟住ANA空姐呢條片咁跳呀，15秒啫，我哋喺會議室係咁易排下就得，你哋裝咗個App未啫！」
我：「未呀，唔好搞啲咁嘅嘢啦！」
同事：「冇得say no㗎！我都唔想跳呀，你睇咗條片先啦，冇得避㗎喇！」
條片係3個ANA日本空姐喺成田機場停機坪跳舞，淨係影到半身㗎啫，不過半身又好，全身又好，真係搞唔掂喎，我寧願OT跟多兩個project，咪叫我拋頭露面啦！
呢條跳舞片我係唔使參與，因為有兩位20幾歲嘅女同事認咗頭，佢哋居然好雀躍，覺得成件事好好玩，咁就梗係好啦係咪？想玩嘅自己舉手，唔想玩嘅放工返屋企早唞。
但係我投得稿，件事又點會咁簡單吖……
拍咗兩三條跳舞片，老細話人丁太單薄，要求多啲同事一齊跳舞一齊䠆（Un），加上佢又唔知參考咗邊間日本公司條片，話跳呢啲舞雖然簡單，但如果搵到幾個年紀大嘅同事一齊跳，嗰種年齡反差嘅效果會更搶眼更搞笑喎！
呢次我都避過一劫，因為小妹二十到尾，喺呢間公司唔算後生，不過都未算老，而且老細點名要搵男同事拍，起碼45歲以上，佢要營造一種連senior都突破守舊模式嘅感覺……我唔明老細個屎忽腦諗乜。
3個被欽點嘅同事分別為50歲嘅IT部主管阿華、52歲嘅會計部第二把交椅Samson，仲有58歲嘅老臣子Edmond，佢哋加埋啱啱好160歲，當日下午「綵排」咗個幾鐘，睇得出Samson好唔自然，佢排排下舞終於鼓起勇氣問老細：「不如搵過第二個啦好嘛，我手腳唔協調呀，老細，你試唔試下跳？」
Samson呢個問題問得好好，老細一路指揮同事拍TikTok，但佢自己好精，從未入鏡參與。
老細：「我跳唔好睇㗎，Samson你唔使介意喎，我哋唔係sell跳得叻，我哋sell喜感，TikTok上面最紅嗰堆全部玩甩碌，唱歌甩碌，跳舞甩碌，做實驗甩碌，呢啲先紅呀！你sell自己好勁係唔會爆㗎！信我！你已經跳得好好，我就係要呢啲！」
難為呢3位年過五張嘢嘅senior同事喺我哋圍觀下跳到面紅耳赤，一句講晒：搵食艱難！
喺咁嘅環境之下，已經冇人可以獨善其身，呢團TikTok火燒埋其他同事嗰疊，因為老細開始覺得齋跳舞唔夠趣，佢要拍短片，而拍短片係需要好多角色，所以公司裡面所有人都要「參與演出」。
老細：「嗱，呢個故仔好簡單㗎啫，一陣Amy（其中一個女同事）企喺公司門口扮派傳單請人，跟住Alex、Dickson、Kelvin就行過，唔好接Amy張傳單，一齊講句對白話冇興趣，Amy你等佢哋行前五步左右，大大聲話：3萬蚊一個月喎！然後Alex、Dickson、Kelvin就同一時間擰轉身，要兩眼發光嗰隻，再跟Amy行入公司見工，明唔明？」
原來老細又係睇埋啲唔知咩TikTok片，係一對AV男女優拍嘅，女嘅叫個男嘅入去酒吧飲酒，話10萬yen一個鐘，個男優話好貴直行直過，女優即刻補句：G Cup喎！最後個男優就擰返轉頭變得好有興趣……呢啲橋段都抄？平時Facebook嘅reel都見過啦！
因為好多同事唔願意出鏡拍呢啲低能跳舞同埋所謂嘅劇情片，而高層又用一種大石砸死蟹嘅手法迫大家參與，Office開始有好多怨言，新年假期後公司爆辭職潮，有3分1同事遞信唔撈，包括我。
我其實唔反對TikTok，玩啲咩平台係個人選擇，最緊要唔影響到人，但公司拍TikTok要員工上鏡跳舞做戲，咁就係直接影響到同事，加上我哋冇得跟隨自己意願去say no，呢個先係最大問題。
3分1人遞信係一個好誇張嘅數字，試想像過完年有3分1同事走咗，個畫面係幾咁震撼，不過老細並冇因為咁樣而反省或者覺悟，聽返HR講，老細認為我哋唔配合唔聽話同埋唔肯上鏡，已經叫咗人事部盡快請返啲人，job ad講明需要幫公司拍片演出。
HR仲話，老細開咗TikTok個App畀佢睇，話湯告魯斯都有TikTok，人哋係荷里活一線男星都係咁跳舞。點解HR會肯同我哋講？因為呢位HR姐姐都係做埋今個月，佢一樣唔想幫公司拍TikTok上鏡。
湯告魯斯的確係有玩TikTok，第一條置頂嘅片就係喺花園跳舞，我都係嗰句，玩唔玩TikTok係個人自由，我哋唔需要去審判別人，只係你要員工一齊拍一齊跳舞就相當擾民，我哋入職時簽嗰份合約係冇講要上鏡，當時見工亦冇話要拋頭露面，所以我寧願辭職，祝我搵工順利啦！
講到扮鬼扮馬，以下呢兩個經典舊post你又記唔記得？
吹到公司有50人老細請臨記扮返工
https://hkofficedaily.com/?p=18438
為谷生意迫員工拍片做KOL
https://hkofficedaily.com/?p=10278