上司忌才 求職者fit爆都冇得second in

「你唔覺得頭先條友好叻㗎咩?你想佢做你下屬呀?」

當我同上司一齊sit in做完個interview,佢反問我以上兩個問題。係,我差啲忘記咗,佢當初請我返嚟,其實係貪我夠平凡、識睇人眉頭眼額,唔會功高蓋主,因為上司曾經好坦白咁同我講過,藉此提醒我安守本份。

老一輩人好多都有呢種思想,初初畢業出嚟社會工作,我父母都成日講類似嘅說話。

我算係一個好識撈嘅人,自小被教導唔可以鋒芒畢露,應該詐唔知嗰陣就詐唔知,唔好懶叻衝出嚟邀功,所以我喺呢間公司做咗7年半,由我單身做到結婚,由孤家寡人到而家做埋老竇,由冇樓變成業主,呢份穩定嘅工作幫咗我好多。

如果下下搶風頭,我或者換到大老細一句半句讚賞,不過實則完全冇著數,即係好似一場足球比賽咁,你想踢得華麗但係輸波,定係想踢得醜陋但最後贏波?假設後生10年,我會揀前者,而家太多負擔,要供樓要養小朋友,所以我選擇成為後者。

我係department嘅Assistant Manager,條team有人走,順理成章叫HR請人,HR搵咗headhunt幫手,總共send咗5個candidate嚟見工,其中一個真係好突出,學歷高,經驗fit到啪啪聲,因為佢之前嗰間公司有啲名氣,CV好靚,而且job duties同我哋而家個職位近乎倒模一樣,不過呢啲都係其次,最重要係呢位candidate談吐得體,間中向我哋提問嘅問題都好有智慧。

呢位candidate係最後一個約上嚟interview,所以見完之後我屬意請佢,最後有冇offer都好,佢至少值得有多一round second in,但同我sit in一齊見嘅上司就持相反意見。

「你唔覺得頭先條友好叻㗎咩?你想佢做你下屬呀?」

我明白上司講咩,繼續聽佢發表意見。

「阿仔,我同你講,請人返嚟唔好請個叻過你,大老細見到會將你比下去,我哋唔係Sales Team,你唔需要一個叻人去同你跑數,你需要嘅只係一個聽聽話話嘅人,最緊要完成你畀佢嘅工作,唔好駁嘴,唔好懶醒,咁你咪做得安樂囉!」

上司同其他同事講嘢嘅口吻都係咁,成日叫人阿仔阿女,相信佢7年半前請我返嚟,都係貪我夠平庸。

同team仲有一個同我一樣職位嘅Assistant Manager,其實佢都好識做,但比較多諗法,大老細每月一次同我哋team開例會,呢位Assistant Mangaer都會提出唔少意見,大老細甚至點名讚過佢有heart,不過咁又點呢?除咗每月一次例會畀大老細讚兩句之外,其餘時間都畀我上司打壓,因為你喺大老細面前搶咗上司風頭。

後來我哋請咗其中一個平平庸庸嘅candidate,HR都有問我點解唔請CV好靚嗰位?我反問係咪headhunt嗰邊都覺得奇怪?

HR:「咁又冇,你得一個position,請邊個都好,headhunt都係收一個position嘅佣,所以對佢哋嚟講冇分別,係我自己奇怪啫,因為我scan過啲CV嘛。」

如果好叻嗰位candidate有緣見到呢個post,真心想同佢講聲抱歉,因為喺我立場,其實幫唔到呢位學歷同經驗fit到爆嘅candidate,我上司如果畀我揸主意,佢就唔會同我一齊in人。有時好叻好勁好fit份工,都唔一定會得到個job,有啲公司、老細、上司,請一個人會考慮好多方面同角度,嗰位candidate可能係好唔好彩,亦可能係好彩,唔好彩係面前呢位上司忌才,太叻反而冇機會,平庸先有,而我呢個Assistant Manager其實係冇say;好彩嘅係,佢咁叻,嚟我哋公司唔會有好發展,呢度邊個突出就要壓返你落去,所以出面一定有更好嘅公司會賞識佢。

各位求職人士,有時你哋見完工冇下文,唔好妄自菲薄或者覺得自己好差,公司請唔請一個人,會因應內部文化而有好多考慮,所以大家唔好咁易被打沉,要相信自己嘅能力,希望你哋搵到一間唔會忌才嘅公司,或者大家都會有一日變到我咁,生活上好多包袱,但係未有包袱之前,希望你哋都可以做自己,唔好太早就「滑牙」,共勉之。

投稿讀者:Benjamin

🤦🏻‍♂️ 關於interview嘅經典嘢,又點止咁少吖,之前幾個故事都好谷氣㗎

CV寫得好清楚,唔啱又叫人見工
https://hkofficedaily.com/?p=14360

見工考EQ特登要人呆等
https://hkofficedaily.com/?p=14374

Interview講到好滿意,最後不了了之
https://hkofficedaily.com/?p=15745

見工遇無禮對待,最後竟然叫星期一返工
https://hkofficedaily.com/?p=15758

error: