CV寫得好清楚 唔啱又叫人見工

投稿讀者:Vincy

我做建築嗰行,早排見工有不快經驗,因為公司疫情後減薪,只出返原本份糧嘅8成,而且係無了期咁減,完全冇跡象加返,呢個情況已經超過半年,所以好多同事都心灰意冷,唯有send CV去其他公司試一試。

有一間建築公司約我上去interview,本身見HR都好地地,後來見埋佢哋個Manager就真係不得了。

「其實我哋兩間公司都算係上下家嘅關係,你哋可以話係我公司個客。」

我:「冇錯,因為我都會搵返自己有相關經驗嘅工作。」

「問題係我識得你哋老細,如果我請咗你會好尷尬。」

我:「尷尬?呢行轉嚟轉去好正常,因為都係嗰幾間公司。」

「我怕請咗你之後,你老細第日唔畀生意我哋呀。」

我:「Er……但係我send CV過嚟,你都見到我做緊邊間公司啦!」

「見到呀。」

我:「咁你驚得罪我老細,又叫我上嚟見工?」

「冇呀,想了解下你做咩想轉工咋。」

CLS!!!

1)你唔想得罪我老細唔緊要,咩上下家都唔緊要,咁你咪唔好約我上嚟見工囉!
2)你盲㗎?CV寫得好清楚,你唔會請又叫我上去interview,好多時間?
3)見一份唔關事嘅工,僱主會嫌你冇相關經驗;本身做開呢行,你又驚我係競爭對手;唔係競爭對方喇,你又怕得罪行家,其實你哋班所謂僱主想請咩人?

冇經驗你又嫌人冇經驗,有經驗你又嫌人年紀大,轉行你又驚人未做過,同行你又驚人出蠱惑,簡單啲講,即係又要後生又要人工平又要有經驗又要未做過,究竟你班老細想點樣樣呀!

班同事問驚唔驚條友報串畀我哋老細聽?有咩好驚呀?見工啫,又唔係偷呃拐騙,大半年嚟都8折出糧畀員工唔係應該更加需要驚咩?唔驚冇面咩?

不過諗深一層,嗰間公司見我可能只係為套料,目的係想了解我哋呢邊咩情況,真係最怕呢啲,浪費時間,又冇心請,我又要請假,最後一場歡喜一場空,仲要畀人chok埋行情(唔知係唔係),妖,好嬲呀!

error: