其實呢段唔算係投稿，我真係想知點解second in嗰陣，個經理講到好滿意，福利同細節全部話晒我知，最正係帶我行勻成個office，又逐個同事介紹我識，但最後冇打嚟叫我返工，請問係咩一回事？
呢份工第一次interview係用Zoom，3個人一齊in我，氣氛愉快，過咗一星期後就有人打嚟約我second in，今次就要上佢哋office喇，嗰間公司幾廿人，業務正常，環境正常，而其實second in上到去都係正常，個經理同我有講有笑，臨尾埋牙又討論過人工福利，大家初步都agree，佢話會交畀人事部正式覆我。
你都可以話以上係門面嘢，純粹禮貌對一個candidate，一日未打嚟confirm幾時返工都唔叫請咗，但佢帶我行勻成個office參觀喎！話我知呢個係pantry，又打開啲櫃講咖啡同茶包擺喺邊，冇理由每一個上嚟見工嘅candidate都有相同待遇啩，個經理咁得閒？
又當呢啲都係禮貌式喇，佢最後介紹埋同事我識喎，真係咁樣介紹：
「Martin，呢位係Ian，Marketing嗰邊嘅。」
「Ian，呢位Martin就睇晒成條Sales Team。」
我有同Martin握手㗎！經理亦唔止介紹Martin一個畀我識，通常呢啲係返新工第一日做，所以當時我相信自己已經100％受聘。
點知過咗一個星期，都冇所謂嘅人事部打嚟叫我返工，本身就唔希望自己打去，因為好似好煩咁，但我忍唔住喇，期間仲turn down咗另一個offer，如果你想我下個月先返工都唔緊要㗎，講聲我知咪得囉，大家互就啫！
唔計星期六日，齋計working day我都等咗10日，都係打去問下啦，我冇經理直線，唯有打去當時約我見工嘅人事部，道明來意，嗰位HR話知我係邊個，但冇收到指示搵我返工……
我費事叫佢駁條線畀經理咁冇禮貌啦，唯有拜託HR問一問經理，請同唔請都call back我吖，始終見緊其他工，我都要取捨㗎嘛！HR好好人，佢答應問完call返我，最後答案係：「經理話未confirm，再諗諗先。」
我話冇失望，你都唔信啦，連隨打探下係咪仲見緊人，HR話應該見完㗎喇，可能經理仲有其他考慮，Ok，咁算啦！隔咗一個月，我喺求職網站見到呢間公司再出招聘廣告，又係同一個position。
唔係話嬲你唔請我，你都有權揀，但點解當時要畀個假希望我呢？Second In之後帶我參觀office，又逐個同事握手介紹，真係正常嘅做法咩？
投稿讀者：Ian