見工遇無禮對待 最後竟然叫星期一返工

回應你上星期篇投稿,嗰位讀者話經理好熱情,second interview之後帶佢參觀office,又介紹佢同其他同事握手,而最後竟然冇請。我嘅經歷剛剛相反,去見工時被對方不禮貌對待,點知佢哋隔日打嚟叫我返工。

見工,我早10分鐘到,應該合理啦!填完form,淨係計等嘅時間足足個半鐘,期間只係問過reception個小姐一次,因為驚HR唔記得咗我,reception小姐叫我等多陣,HR開緊會。

橫掂一場嚟到,你都知近半年好難搵嘢做,既然佢咁講,我都冇再多聲氣。

終於有得入房見,HR一行入嚟已經西面,樣樣嘢都質疑,話我經驗唔夠多,憑咩咁有信心apply呢個position?又話我轉工轉得密,點解5年轉兩份工咁多?係呀係呀,佢話我5年轉兩份工好多呀!

仲有,佢話我舊公司太細,完全handle唔到佢呢間大公司嘅工作……聽到呢度,我忍唔住問咗句:「其實我嘅經驗,幾年幾月轉工,以前公司叫咩名,工作內容係咩,唔係一早已經喺CV同resume寫得清清楚楚咩?如果真係咁唔適合,點解你叫我嚟見工呀?」

強調下先,當時我講呢番說話嘅語氣係好溫和,因為我都想知點解講到咁不堪都叫我上嚟interview,真心有呢個疑問。

個HR冇答我,反而叫我等一等,佢話去嗌部門主管見我,當時我心諗,你講到我一文不值,handle唔到你哋大公司嘅工作,又叫team head見我?我真係完全摸不著頭腦。

反正等見工等咗個半鐘,又畀佢奚落完,嚟到呢一步咪見埋囉,始終HR嘅立場同睇法又未必同team head一樣㗎嘛,後來我發現呢個諗法實在太天真喇。

一山還有一山高,一西還有一西臭,個team head入到房又係loop返差唔多嘅說話,正當我想主動結束個interview嗰陣,嗰個team head快我一步,但我今次收唔到火,直接問佢哋公司點解要搵我嚟見工,既然覺得唔適合,呢個interview係浪費時間,你估佢答我咩?

佢答:「呢層你唔需要知。」然後走咗出房。

想追住佢嚟X,但office多人,我唔想自己變小丑,離開咗之後同朋友人呻下,嬲完就算,唔值得為呢啲公司同呢啲西人影響心情,但你真係估唔到,第二日我收到個HR電話,佢叫我下星期一返工……成件事好唔好笑先?你估我有冇返工?

我:「吓,你哋踩到我地底泥咁喎,而家話請我?」

HR:「我哋唔係踩你,真係覺得你條件未夠啫,所以你個expected salary寫28000,我哋畀唔到,傾咗最盡係24000,有冇問題?冇問題下星期一準時9點返工啦!」

Sorry,我認自己冇修養,所以我話:「食屎啦你哋,搞咁多嘢原來想壓價,我覺得你哋真係好可憐,喺大公司做狗,垃L圾!」跟住就cut佢線。

呢啲公司簡直不知所謂,所以我見到上星期個讀者被人熱情對待但最後冇請,其實已經好幸福㗎喇,好過我呢次一肚氣,最後佢打嚟叫我返工再順勢壓價啦!

投稿讀者:呢啲公司狗也不Diu

error: