講單好心涼嘅嘢畀你聽，就算有道德L走嚟批判我都係咁話。
幾年前我老公同佢個妹打算夾份搞檔生意，當時我已經反對，因為開公司本身唔容易，partner更加要信得過，你可能會問：「自己個妹都信唔過？」正正因為係佢個妹，咁多年嚟睇得好清楚先知道信唔過。
回帶去未搞生意之前嘅日子，佢個妹本身就係一個無尾飛陀，女仔之家但好爛賭，成日要返屋企問佢阿哥，即係我老公，仲有奶奶借錢還賭債。佢個妹出去借財仔，會填晒我哋做咨詢人，所以連我都耐唔時會收到奇怪電話，有次佢個妹仲忽然打嚟問我公司地址（當時我打緊另一份工），又問我公司電話，話要寄嘢畀我喎，咪玩啦！我同佢阿哥一齊咁耐，呢個阿妹連凍檸茶都未請過我飲，早兩日先問我老公借幾萬蚊，你好明顯攞我資料填form啦，當時直接篤爆佢，佢仲要鬧返我轉頭，話唔畀就算。
由我同老公拍拖到結婚，親眼睇住佢個妹唔係借錢就係失蹤一排，隔一段時間又出現返，後來無啦啦帶個麻甩佬返奶奶到一齊住，話嗰個係佢老公喎，一睇已經知係MK，兩公婆都冇返工，成日喺屋企Hea，反而奶奶仲要返酒樓做傳菜，好在我同老公一早搬咗出去住，唔係仲眼冤。
有一日，老公話要同阿妹夾份搞間公司（少少涉及運輸，原諒我唔深入講公司詳情），除咗反對，我仲覺得好好笑：「先唔計你阿妹份人咁不負責任，請問你知唔知『夾份』嘅定義係咩，你阿妹上個月先問我借二千蚊，二千蚊都冇，你同我講佢夾份開公司？人唔笑狗都吠啦！」
其實我老公係出於愛錫個妹，佢唔想阿妹一世都係咁，覺得佢哋兩兄妹其實先後涉獵過運輸行業，不如小本經營一檔啦，同時希望阿妹生生性性，畢竟年紀唔細。
我認為阿哥愛錫阿妹，親人之間切肉不離皮，呢啲都係可以理解，所以平時借畀阿妹嘅錢我都冇咩點同老公計，但你要同呢個阿妹搞公司就太over喇，一來投資唔會少，二來可以係無底深潭，何苦呢？
我哋兩公婆為呢年事嘈咗無限次，嘈到就快離婚咁滯，但我都係勸唔掂老公，卒之公司開咗，開頭佢阿妹都有振作過一排，但一如所料後勁不繼，我老公開始好吃力，好似單天保至尊咁，我唔忍心睇住老公啲錢冇晒，毅然提出幫我老公手，結果我辭咗份本身兩萬幾蚊嘅工，再象徵式每月收老公一萬蚊作為人工（冇另外再收家用，因為我知佢辛苦）。
老公都好感激我辭工過嚟幫忙，嗰陣時我真係朝9晚10咁做，因為公司細，又冇閒錢請咁多人，所有文件嘢、瑣碎事務、出單、追數等等都係由我負責，工作上好多時仲要出街，夏天最熱嗰陣絕對唔好受，我以前朝9晚6坐office咋，而家人工得一萬，工時仲長過實Q，但呢壇生意始終係自己老公，佢做得掂，我都係得益者，我都會好開心。
然後我發覺老公有樣嘢唔畀我掂，就係會計帳目方面，佢話有限公司要搵正統會計師簽名報稅先有用，畀我係搞唔到，當時已經覺得有啲怪，我又冇話要幫佢報稅，但你要我追數，我起碼都要check下公司戶口有冇錢收到吖，個客話bank transfer找咗，我咩都對唔到，呢度又冇會計部，咁點做呀？
總之老公愈係扭擰，我就覺得愈奇怪，兩公婆瞓埋一張床咁多年，當我傻咩！後來有筆數真係唔畀我check唔得，因為有個客苦追三個月終於入錢，而個客係有「扮入錢」前科，點都好，我藉住嗰次順勢睇下公司條數同埋in and out帳目，果然畀我發現！！！阿妹個老公，即係我妹夫，每月出緊HK$18000 人工！
我唔理你十八蚊定萬八蚊，重點係我入嚟做咗半月左右，從未見過呢個妹夫出現，唔好話值唔值先，你連工都冇返，又唔係幫我哋揸車同送貨，請問月薪HK$18000係咩事？
即刻怒爆我老公，佢本身驚我發火仲想講大話，後來都知冇得呃，總之就係最初阿妹話妹夫會入嚟幫手，要求畀妹夫月薪HK$18000，但公司開業至今都冇出現過……
係咪好奇怪我冇講粗口？現實中我有講呀，係投稿畀你就費事打出嚟粗俗。
妹夫no show月薪HK$18000，我朝9晚10月薪HK$10000，仲係辭埋本身兩萬幾嘅office工，走嚟同你日日OT，我同老公講，一定要cut咗妹夫個支出，做生意唔係咁樣，何況公司絕對唔係賺大錢，佢見我咁強硬，終於屈服走去同個妹講，令我啞口無言嘅一幕出現喇，佢個妹竟然調轉發爛渣，話妹夫之後冇得出糧，我都唔可以出糧。
我做到隻積咁，有時星期六日都同老公傾公司嘢，你話我冇資格出呢HK$10000？就因為我踢爆妹夫唔返工都月薪出HK$18000？老公叫我唔好計較，妹夫嗰度照出，同時加返我人工去18000，當時我嘅回覆係：食！屎！啦！
條氣啃唔落，我頭也不回，唔再理公司嘢，老公勸我唔掂，出動到奶奶勸我返公司幫手，但佢令我無名火燒到仲熾熱，因為奶奶講咗一句：「算啦，隻眼開隻眼閉啦，始終係一家人。」我唔會鬧老人家，但係奶奶呢句令我更加失望。
後來我直情搵返份新工，月薪係我以前舊公司水平，有兩皮幾，日日準時收工，我唔係約friend出街就返屋企打機煲劇，人都後生咗，期間我老公同奶奶多次叫我返去公司幫手，又話再係咁落去會愈嚟愈亂，隨時執笠喎～～～我唔係黑心，但我真係想你執笠，因為你當時執咗間公司，其實唔係蝕好多，分分鐘仲有少少剩，再同個妹搞落去，再係唔返工都出糧畀妹夫，你之後死得仲轟烈。
上年受疫情夾擊，佢阿妹又唔知邊度惹落另一筆債，期間有兩個月唔見人，又用公司資料出去借錢，加上我老公一個人獨力難支，佢連車都賣埋，生活質素比之前仲差，終於決定公司唔再做落去，你問我可唔可惜？梗係唔可惜啦，我直頭心涼，因為呢個先係最好嘅結局，好過再搞落去萬劫不復，你就當我係一個黑心嘅女人，黑心嘅老婆啦！
投稿讀者：偷文死全家（唔知改咩名，又知你成日畀人偷文，唔介意我用呢個筆名嘛）
－
🙍🏻♂️ 今次係阿哥想幫阿妹，再益埋妹夫，但委屈自己老婆嘅故事，你哋仲記唔記得之前有篇投稿，係做便利店嘅妹妹，要將辛辛苦苦賺返嚟嘅錢畀阿哥還債？
https://hkofficedaily.com/?p=11673