因為Stella嘅語氣的確幾差，所以我都有將成件事同姐夫講，不過佢知道我公司仲有另一個臥底，到頭來臥嚟臥去之後，第一個反應竟然係哈哈大笑，我唔覺得好笑喎，點解Stella要咁老土呀？反正都係幫佢做嘢，應該早啲話我知蜻蜓小姐2.0嘅真正身份吖嘛！
姐夫：「其實Stella份人冇乜嘢嘅，只係比較多疑同埋謹慎，佢未做全職少奶奶之前，我好多時都會同佢傾生意，當時已經知佢嘅性格係咁，生完小朋友之後就更加神經質，雖然大家已經冇講公事，不過Stella間唔中都會搵我吹水，話題永遠圍繞佢老公，佢真係好緊張個老公。」
第二日返工做做下嘢，蜻蜓小姐2.0趁住幾個女同事行開咗，無啦啦走嚟拍我膊頭。
蜻蜓小姐2.0：「喂，阿Tim。」
我：「咩事？」
蜻蜓小姐2.0：「你唔好再監察我喇。」
我：「咩監察你？」
蜻蜓小姐2.0：「Stella噚晚同我講咗喇，你同我入嚟都係同一個目的。」
有冇搞錯呀！冇睇《無間道》㗎咩？Handler點可以隨便講出臥底嘅身份㗎，Stella一開始又唔講，做到一半先話我知蜻蜓小姐2.0係臥底，而家又喺冇預警之下同佢講我嘅身份。
蜻蜓小姐2.0：「不如我哋合作一齊查啦！」
我：「係Stella定係你嘅主意？我習慣一個人做嘢喎！」
蜻蜓小姐2.0：「大家合作可以交換情報，一於咁話啦！」
真係要搵個機會問清楚Stella，呢條蜻蜓小姐2.0都唔知乜頭乜路，係要叉隻腳埋嚟，咁樣只會愈嚟愈混亂。
冇等我同意，蜻蜓小姐2.0已經自顧自講佢嘅分析，佢認為狐狸精最大嫌疑人係model，原因都係太多名牌，似有sugar daddy照顧，同埋model份人比較陰沉，好似收埋好多秘密喎。蜻蜓小姐2.0同時認為另一位女同事糖妹可以不理，因為佢有糖妹facebook，知道對方有一位消防員男朋友，高大威猛之餘，兩個人仲成日post相晒恩愛，所以糖妹係狐狸精嘅機會唔大。
迫於無奈之下，我要日日同蜻蜓小姐2.0交換情報，呢條女真係好唔掂，講嘢冇point之餘，仲要十分主觀，咁我咪口痕問下佢係咩背景，會唔會係私家偵探出身，點解會被Stella委任入嚟捉姦啦，點知……
蜻蜓小姐2.0：「我係因為做facial識Stella，佢叫我幫手。」
我：「哦，咁你本身做咩㗎？」
蜻蜓小姐2.0：「咪答咗你囉，我同Stella做facial吖嘛，佢係我熟客嚟㗎！」
我：「即係你做美容，你幫佢做facial，唔係同佢一齊去做facial，明白晒！」條女講嘢都唔清唔楚。
蜻蜓小姐2.0：「係呀，Stella每次嚟都會同我傾佢老公啲嘢，仲好肯定公司有個狐狸精，咁我個friend都有類似經驗，我仲幫過人捉姦，Stella聽完咪話安排我入嚟幫手囉！」
我：「吓！即係你辭咗美容份工，特登走入嚟查嘢呀？」咁兒戲？
蜻蜓小姐2.0：「梗係辭啦，我之前得二萬蚊左右，Stella畀3倍人工我喎！」
我：「咪住先，即係你收Stella 6萬一個月呀？」
蜻蜓小姐2.0：「唔止，仲有呢度本身份糧呢，加埋7萬幾㗎喇！係喎，你收幾錢入嚟呀？」
我：「我得5萬咋！係咪應該同Stella爭取呢？」
蜻蜓小姐2.0：「咁又唔好，你當我冇講過啦！」
點樣當你冇講過呀……
本身做到冇心機，查嘢冇進展，人工又低過蜻蜓小姐2.0，不過喺我最心灰意冷嘅時候，老闆有一日放工無啦啦撩我去飲嘢。
老闆：「Tim，有冇約人呀？飲杯嘢吖！」
雖然有啲錯愕，好人好姐做咩無啦啦嗌我去飲嘢，不過呢次係接觸老闆嘅好機會，我梗係答應啦！
出到去酒吧嘅時候，我半開玩笑形式咁問：「老闆，你唔係想炒我吖嘛，哈哈！」
老闆：「唔係，見你都做咗兩個半月，就嚟過試用期，咪問下你做得慣唔慣囉，不過今日喺公司太忙冇機會，反正悶悶地未想返屋企，咪叫埋你出嚟飲嘢囉！」
嗰次係我同老闆第一次兩個人飲嘢，內容圍繞工作同NBA，普通過普通，但係唔知點解，老闆自此之後就經常約我放工飲嘢，密度大約係一個星期三次，喂，working day都係得5日，你約咗我3日，啲情侶拍拖都冇見得咁密啦，結局唔係冇狐狸精，原來老闆鍾意仔仔呀？我收你5萬蚊唔包屎忽窿㗎喎！
我哋每飲一次嘢，傾計嘅話題就愈嚟愈深入，老闆開始同我講女人，原來佢覺得36E最正，都話㗎啦，男人點會唔明男人嘅心理吖！老闆仲話最唔buy model嗰type，原因係睇得出好拜金，仲話邊個做model嘅男朋友或者老公一定會好辛苦，因為買名牌都買到破產。
老闆係咁搵我飲酒，搞搞下大家變咗做朋友，我都有分享自己以前嘅感情事，一來傾計交心呢樣嘢係相向，二來我講自己嘢亦無傷大雅，只要佢唔知我係Stella派嚟嘅臥底咪得囉，後來我哋甚至熟到傾Stella，因為我問咗句：「老闆，你以前晚晚OT，既然而家唔使OT，點解唔早啲返去陪老婆呀？」
老闆：「你估得你哋打工仔先識扮工呀，好多時我OT都係扮工㗎咋，我老婆自從生咗BB之後就成日疑神疑鬼，就算我6點準時收工返屋企，一樣會畀佢嘮叨，我平時為咗公司已經好煩，返到去唔想再同佢嘈，咪盡量夜啲返去囉！身不由己呀細佬，時光倒流我真係唔會結婚。」
其實我有個問題好想問，就係你明知Stella咁多疑，點解仲要請埋36E、model、Dada、阿hip呢啲索女返嚟呢，但由於我對住老闆嘅角色設定係唔識Stella，唔知Stella未生BB之前都喺公司做，更加唔可以畀佢知Stella懷疑呢班女當中有狐狸精，所以我唔可以貿貿然咁問。
老闆一路飲酒一路呻：「早兩日之嘛，同老婆落樓下商場買嘢，推玻璃門讓畀身後嘅女士入先咋，我老婆即刻鬧我做咩對街外人咁好，仲話我平時唔幫麻甩佬推門，見到係女人先至咁有風度，然後又嘮叨一大餐，佢真係痴線！男人有手有腳自己推門啦，我呢啲係gentleman啫，推個門就想同啲女人做愛咩！」
如果老闆冇誇大，咁Stella又真係幾多疑同埋難服侍，不過我仲要面對多一個好煩嘅女人－－－蜻蜓小姐2.0，因為佢知我成日同老闆飲嘢，所以經常叫我過啲料畀佢，你話我自私又好乜都好啦，點解我要同你交代呀？蜻蜓小姐2.0仲吩咐我每次同老闆飲完嘢之後，就要將傾計內容打段text畀佢，唔知以為佢係我米飯班主，嬲嬲地我決定搵Stella討論下分工問題。
我：「Hello Stella，我想問下呢，你希望我份report獨立畀你，定係要將啲料畀埋蜻蜓小姐2.0（當然我唔係咁樣同Stella稱呼佢啦，真實中我會叫蜻蜓小姐2.0嘅英文名）。」
Stella：「唔需要同佢交代呀，你向我report就得啦！佢叫你咁做呀？」
我：「係呀，你都知我呢排同你老公，即係老闆成日去飲嘢，我都係諗住report畀你一個人知……」
未等我講完，Stella又扯晒火：「得，我聽日炒咗佢，我會叫佢自己辭職，唔好阻住你做嘢！」
我：「嘩嘩嘩，又唔使咁嚴重，我諗你同佢講清楚個分工就得㗎喇。」
Stella：「唔係呀，我想叫佢走好耐㗎喇，佢早你半年入公司，咩都查唔到，所以我後來先要請埋你之嘛，反正你而家同我老公咁熟，有你就得㗎喇！」
我：「咁樣樣……」
雖然我唔鍾意蜻蜓小姐2.0，但係叫佢走又太嚴重，始終斷人衣食唔係咁好啦，不過Stella意向已決，我根本冇辦法勸得掂。話時話，7萬幾蚊一個月，做咗半年咩都查唔到，呢條蜻蜓小姐2.0又真係……仲要扮大家姐吩咐我做嘢，或者咁啦，將佢一半人工畀埋我，留佢喺度做我assistant會唔會兩全其美？
冇諗過Stella效率咁高，第二朝返到公司，我竟然見到蜻蜓小姐2.0執嘢，啲女同事圍晒埋去，咁我咪問咩事囉，糖妹走嚟答我：「佢辭職呀！」
我有啲Sam Hui，蜻蜓小姐2.0個樣亦都嬲爆爆，怒睥咗我一眼……（未完待續）
《臥底Season 2》EP1
受啟發開新公司「第一個任務係…捉姦」
https://hkofficedaily.com/?p=21740
《Season 2》Ep2
見工過關正式入職 成個部門都係惹火尤物
https://hkofficedaily.com/?p=21746
《臥底Season 2》Ep3
晚晚陪老闆OT 四眼妹相當有可疑
https://hkofficedaily.com/?p=21752