《臥底Season 2》第一個任務係捉姦

由於我之前嘅影相freelance job好唔穩定,拉勻每個月都係執萬零蚊,跟住入姐夫公司做臥底3個月,每月袋5皮嘢,總共賺到15萬,呢個數字已經係我上年嘅年薪,所以完成任務後唔止有啲失落,成個人仲懶過舊陣時,因為覺得啲錢可以慢慢搣多幾個月先搵工吖嘛!

家姐見我坐下一個月,hea下又一個月,不斷苦口婆心叫我搵嘢做,唔好再行返廢青呢條舊路,咁我咪打蛇隨棍上囉:「你不如叫姐夫請我做長工啦,最多人工同之前一樣,做嘢嘅同時,又幫佢mon住公司有冇人搞事,5萬真係好抵㗎!」

家姐:「你唔好發神經啦!當時係因為姐夫間公司有員工搞搞震,啲人好似走馬燈咁轉,每個月要嘥六位數字畀嗰啲獵頭agency請人,所以先至用5萬蚊搵你入去捉鬼咋,而家都冇事啦,好心你正正經經搵份嘢做啦!」

我:「回不去呀家姐,真係回不去,前兩個月仲搵緊5萬一個月,你叫我而家搵咩工啫,萬零蚊我適應唔到哩!」

家姐:「正一廢青!5萬就冇喇,一口價,$16,000,入返姐夫公司做個小職員,deal唔deal?」

我:「$16,000?狗也不deal啦……」

我都未表達完自己嘅訴求,家姐嘅手提電話就響起,係個friend打畀佢唔知呻啲乜,淨係聽到佢講「咁蠢?冇介紹呀,我公司冇用神秘顧客呢啲服務。」

等到家姐收線,我就問講緊咩神秘顧客,原來佢個friend喺一間大型體育用品店做back office,最近委託咗一間提供神秘顧客服務嘅公司去幫門市sales評分,但係唔止扮問嘢嘅時候好似讀稿咁生硬,仲畀班sales發現一直用錄音筆錄緊成個傾談過程。

家姐:「講開又講,你個衰仔係懶啲啫,都算醒醒目目,不如去應徵做嗰啲神秘顧客啦,聽講時薪都幾高㗎,你一定醒過佢哋,起碼唔會畀人見到支錄音筆。」

我:「唔係喎,我諗到另一樣嘢,去做神秘顧客,不如自己開間公司做神秘顧客服務啦!仲可以溝埋臥底員工呢類業務一齊做,都係嗰啲嘢啫,然後你介紹頭先個friend畀我,呢啲服務公價幾多㗎?」

家姐:「癲完未啫?你邊位呀?人哋大公司會搵你做嘢?你估全香港啲公司都係你姐夫開㗎!」

雖然家姐覺得不切實際,但我就好似搵到新嘅目標一樣,我明佢講乜,真係要接臥底員工或者神秘顧客呢類嘅生意,先唔講搵唔搵到客,起碼要正頭正路成立一間公司,咁先可以同人傾㗎嘛,結果我第二日就搵咗個由細玩到大嘅死黨Johnny商量,睇下佢有冇興趣一齊創業。

我:「成件事無本生利,又唔使入貨,有需要先請人,先搵嗰啲淨係租地址收信嘅share office,然後用個地址去商業登記處搞BR,再聯絡銀行開返個公司戶口,印埋卡片,呢啲有限錢嚟啫,我同你一人都係夾幾千蚊。」

Johnny:「有興趣呀!預埋我!間公司叫咩名好呀?」

我:「咁我又未諗過喎!」

Johnny:「又神秘顧客,又臥底,公司名應該要從”secret”呀,”秘密”呀呢啲字眼入手,有隻女人牌子個名幾型㗎,好似叫咩secret,係咪維吾爾族的秘密呢,呢類名吖,維吾爾族的秘密有限公司!好似維基解密咁,型呀!」

我:「Victoria Secret?頂你個肺咩!人哋叫維多利亞,唔係維吾爾族,喺香港開間公司叫維吾爾族的秘密,係咪想一開檔就畀人捉!」

Johnny猛咁話「維吾爾族的秘密有限公司」呢個名好型,不過我冇同佢癲,其實business名稱唔需要畫公仔畫出腸嘅,有時定咗型都唔係咁好,改返個普普通通嘅名,將來擴充更多不同業務都比較靈活吖嘛!

坐言起行,上述嘅步驟全部做晒,最煩惱嘅反而係開公司戶口,因為有幾間銀行都要求有實體辦公室先會批,share office或者co-working space都唔使諗,有一間仲話唔排除會派職員上office check,使唔使咁嚴謹呀?好在都搵到一間手續比較簡便嘅銀行,不過就要等對方查冊,換言之當時係有BR,冇銀行戶口收錢。

諗住萬事俱備先叫家姐介紹個friend用我公司嘅神秘顧客服務,點知呢個時候姐夫竟然搶閘彈job過嚟,唔係入返佢公司做,而係佢個舊client想要臥底員工。

我:「正喎,又發市,多謝姐夫!」

姐夫:「唔使開心住,因為你要過到關先可以賺呢嚿錢。」

我:「過咩關?」

姐夫:「就咁,我呢個舊client叫Stella,佢老公亦即係佢老闆,不過Stella早幾年生咗BB之後就冇再返公司,而家做全職少奶奶,佢懷疑老公同女職員有路,想你查下。」

我:「嘩,我以為好似上次咁,check下啲員工點解成日辭職咋,點知你走嚟叫我捉姦,捉姦搵私家偵探啦!」

姐夫:「Stella話搵過喇,冇發現,但好肯定個狐狸精係公司嘅人。」

我:「首先,私家偵探都搞唔掂,我真係有能力咩?其次係,捉姦喎姐夫,條件真係要傾下,幾錢先?同埋係咪查唔到一樣有錢收?」

姐夫:「我同佢講咗5萬蚊喇,如果搵私家偵探混入間公司做,咁就唔止呢個價啦,唔係點會搵你啫!不過咁,有做嘢就有錢收,冇話要查到先有酬金。」

我:「咁都合理啲,係喎,頭先你話要過關先有得做,係咪要見下個Stella先?」

姐夫:「見就係見,不過唔係見Stella,你要過嘅一關就係見工,請咗你,入到去做,先可以正式開始呢個任務。」

我:「你係咪忘記咗……我當初入你公司做臥底員工之前,其實係失業咗半年,如果我見工係醒,一早搵到工啦,你今次即係玩我,畀個假希望我啫!」

姐夫:「Stella控制唔到佢老公請咩人,但係佢同HR本身好熟,個HR可以話係Stella嘅人,所以控制到揀兩個唔適合份工嘅candidate同你一齊interview,除非你見工嗰陣無端端除褲跳舞啦,否則正常嚟講一定揀你嘅。」

我:「既然Stella同HR好熟,叫HR查咪得囉,使乜搞一大輪搵我入去做啫?」

姐夫:「人哋公司好大㗎,HR唔係同個老闆同一層樓,你問完未啫,唔做就幫你推。」

梗係做啦!5萬蚊一個月喎,查返佢一年半載,五六都中三十啦,同埋我都講過,公司名唔好咁limit個行業,咁咪神秘顧客又做到,臥底員工又做到,捉姦都可以做埋囉,真係溝埋做瀨尿牛丸都得吖嘛,不過要同Johnny講聲唔好意思先,今次捉姦任務要獨食喇,一來得我出馬,二來新公司銀行戶口又未開到。

Stella提出嘅offer仲好過之前姐夫公司,因為我入到去做的話,本身份工嘅salary入晒我袋,佢另外會每個月出5萬畀我,如果咁計法,即係每月收入大約6萬幾蚊啦,唔好理咁多,一於捉住家姐同姐夫練習下interview先,見工fail就咩都唔使講。(未完待續)

《臥底Season 2》Ep2 見工過關正式入職
https://hkofficedaily.com/?p=21746

error: