今次臥底工作，蜻蜓小姐2.0嘅出現係一次意外，而佢突然離開就更加意外，我嘅心情有啲複雜，因為呢條女實在太麻煩太累事，正如Stella所講，查咗半年都冇眉目，仲要成日叫我過料畀佢寫report，蜻蜓小姐2.0係流流哋，不過搞到佢冇咗份工我都有啲內疚。
就喺蜻蜓小姐2.0離職嗰一日，老闆又約我放工飲嘢，傾傾吓仲要講起呢件事：「你知唔知佢做咩走得咁急？問佢係咪搵到新工又答唔係，如果唔係咁洗咩賠一個月走呢？個樣又嬲爆爆咁，係咪同事之間有爭執？」
我又Sam Hui喇：「唔覺喎，其實我入咗嚟都係幾個月，同佢唔係太熟。」
老闆：「唉，咁就真係奇怪，好似嬲咗成村人咁，我叫佢同其他人交接埋啲工作先走都唔肯，咁可能你之後真係會忙啲，我想你接手佢跟緊嘅project。」
我：「我接手？」
其實一個人聽完問題之後再覆述個問題，唔係因為聽唔清楚，而係想偷多幾秒鐘思考，當時我喺度諗，本身已經做緊臥底，又要忙公司嘢，而家仲要接手蜻蜓小姐2.0嘅project，條數點計先。
老闆：「Tim，其實你年紀都唔細㗎喇，之前份份工都做唔長，如果喺度做得開心，不如畀心機幫我做嘢啦，人工方面你可以放心，絕對唔會虧待你，有冇聽過呀，男人唔可以窮，唔想窮就首先要有事業，你係咪想去到30幾歲，40幾歲，甚至50幾歲仲不斷轉工吖。」
我：「呢樣我明，未搵到呢份工之前我都好迷惘，屋企人成日叫我做廢青。」
老闆：「廢青冇問題，但係第日繼續做廢中坑同廢老就好大問題㗎喇，我覺得做人唔使大富大貴，但起碼要夠使，唔好畀自己成日為錢煩，一個人愈大，自尊心就會愈重，真朋友亦都會愈嚟愈少，好似我咁，養得起班員工，自己又唔使求人，咁就已經夠啦！」
我：「咁又係，希望我做到啦，喺公司我資歷最淺，其實好多嘢都要跟Mavis、Carol、Angela、Cici，仲有Laura佢哋慢慢學。」
解釋返少少先，Mavis ＝ 36E，Carol ＝Model，Angela＝Dada，Cici = 阿Hip，Laura＝糖妹，咁多名好難記㗎嘛，如非必要我都係會叫返「暱稱」，親切感差好遠。
老闆：「記唔記得曾經同你講過，我平時去商場幫女士推門，老婆都會鬧足我半日，覺得我同人有路，覺得我對人嗒糖？所以佢其實都唔鍾意公司班女同事。」
我：「咁你老婆又唔係公司人，你唔提咪得囉，甚至話啲女同事好樣衰個個都係阿嬸都得㗎！」交足戲啦，明明我知佢老婆知，但都照樣扮唔知。
老闆：「冇同你講咩？我老婆以前都喺度做㗎，生咗小朋友之後先做全職主婦之嘛，佢都識Mavis（36E）同Carol（model）佢哋，不嬲都唔鍾意㗎喇，但係我哋之前請過幾個男員工，唔知點解都做唔長，搞搞下咪好似全女班咁囉，好在你入咗嚟做咋！」
我：「哦，原來係咁。」
老闆：「所以你好重要㗎！我一定會畀機會你。」
我：「你咁講真係有啲受寵若驚。」呢句真心，唔係畀反應做戲。
老闆：「嚟緊有幾個business trip，我諗住帶埋你去，順便學下嘢，會去杜拜、馬來西亞、新加坡，仲有日本同台灣，之前仲一直諗，如果冇男同事，我就一定要同女同事去，因為點都要有同事幫手，到時老婆肯定嬲，所以我咪叫你畀心機做囉，第日好多嘢要直接拍住我。」
老闆唔係得個講字，試用期之後佢真係加咗$3000人工畀我，另外又教識我好多嘢，唔止工作，仲有好多做人同埋做男人嘅道理，我都有一刻動搖過，好唔好放棄虛無飄渺嘅臥底公司生意，正正經經打呢份幾有前途嘅工。
蜻蜓小姐2.0走咗之後，班同事怨聲載道，因為條女走得好急，完全冇同任何人交接工作，所以佢嘅project都幾混亂，不過反而造就咗我同36E愈嚟愈熟，我哋兩個要share蜻蜓小姐2.0一隻job，幾乎日日都要近距離溝通，有時放工放假返到屋企都會WhatsApp講幾句。
唔知大家記唔記得Candy呢？即係姐夫間公司個女仔，好多人都以為我同佢一齊，但現實中真係冇，無可否認彼此曾經有曖昧期，點講好呢……總之我脫離咗姐夫間公司之後，大家嘅聯絡就少咗喇，而且Candy嘅性格都幾倚賴，我始終係廢青底，如果同一個人拍拖要孭咁多責任上身，我會有啲唞唔到氣。
36E的確係我杯茶，首先我承認男人都係膚淺，其次係36E其實幾獨立，加上都介紹過佢啦，性格外向又活潑，係department裡面嘅開心果，同佢拍住做嘢真係好舒服，我哋仲試過放工一齊食飯，呢啲女仔冇得頂呀，咩都傾到一大餐，起碼唔會dead air或者夾硬搵話題吖嘛！
某次放工晚飯，36E講起一套電影，話打算weekend自己去睇，唔知佢係試探定點啦，咁我咪試探返佢囉！
我：「咁靚女都要一個人睇戲，我諗你啲男朋友多到要排隊約你啦！」
36E：「我都冇男朋友。」
我：「哦，冇男朋友即係收兵啦！」
36E：「傻啦，我唔會做呢啲嘢，兩個人一齊最緊要啱傾，收兵真係非常無謂，又嘥時間，我試過玩交友app識咗個男仔，喺app好多嘢講㗎，點知出到嚟又唔係嗰回事。」
我：「你都有玩交友app㗎？」
36E：「而家冇啦，太多sales同playboy，10個msg有5個都係sell美容sell保險，另外5個就一嚟即刻講賤嘢，招呼都唔打已經問開唔開房，有啲仲好笑，講兩句就send張下體相過嚟。」
我：「交友app真係咩人都有㗎，自己要小心啲。」
36E：「你呢，你有冇女朋友？」
我：「冇啦，我呢啲廢青邊會溝到女吖。」
36E：「一定要成功人士先可以溝女㗎咩？兩個人一齊最緊要夾，如果同成功人士出嚟話不投機半句多，其實咪仲難頂，咁你會唔會考慮下我呀？」
我：「我邊有資格考慮人呀？你仲要咁高質。」
36E：「我就係鍾意你咁識得氹人開心，好啦，調返轉我考慮吓你，weekend陪我睇嗰套戲吖！」
我：「好呀！」
不假思索就答應，我知道自己唔係為咗臥底工作，而係我真心想探索有冇機會同36E發展，同埋呢……如果我同咗36E一齊，咁狐狸精嫌疑人名單又少一個，調查範圍咪縮窄咗囉，win win㗎喎！
嗰個weekend出嚟睇戲食飯真係好開心，我同36E嘅感情亦都一日千里，多咗約出街，多咗傾電話，仲會做人肉鬧鐘call我起身，除咗未發展到拖手仔之外，其實大家做嘅嘢已經同一對情侶冇分別，佢更加……約我去佢屋企🙈
36E：「我啱啱跟朋友學識咗煮黃金蝦球，下個星期日得唔得閒吖，上嚟我屋企煮畀你食。」
我：「咁勁？不過咁咪要見家長囉，我怕尷尬喎！」
36E：「咩呀，我一個人住㗎，邊有家長畀你見。」
我：「嘩，孤男寡女共處一室，你唔怕我獸性大發咩？」
36E：「可能係我獸性大發呢，睇下點！」
喂呀！已經係魔鬼身材，大家又咁啱key，你而家仲講埋啲咁嘅嘢，叫我點頂呀！如是者，我就足足一個星期冇睇AV，雖然唔係存心去佢屋企做衰嘢，不過都以策萬全，係咁易儲儲火啦！
嗰個禮拜嘅時間過得好快，一來係內心有盼望，想快啲到星期日去36E屋企試下……佢嘅手勢，烹飪方面呀！另外係大家都要繼續pick up蜻蜓小姐2.0留低嘅蘇州屎，佢啲嘢太過唔清唔楚喇，搞到成班同事要做多幾重功夫，又要搵佢啲file，堅煩！
終於去到星期五，OT緊嘅時候，我突然收到36E嘅WhatsApp msg，內容係「星期日唔見喇。」咩料呀？我下意識望一望過去，佢塊面黑晒，冇望我，正想reply問下咩事嗰陣，老闆打內線叫我入房，咁都要服侍老闆先啦。
入到房，我又係未嚟得切問咩事，老闆已經好惡咁同我講：「原來你係我老婆啲人呀？我真係對你好失望！你走啦，我會跟足勞工法例賠一個月畀你，下星期寄cheque，唔好再畀我見到你。」(未完待續）