Interview之前同Stella約咗見面，以一個30幾歲又生完BB嘅女人嚟講，真心keep得好好，我諗佢後生嗰陣都好多人追，不過咁，男人係好奇怪嘅生物，偷食對象又好，情婦又好，二奶又好，其實唔一定靚過正印，因為要追求嘅係刺激感，又或者有啲嘢自己個老婆唔肯做，出面個女人肯做，唔講到咁露骨喇，明就明，唔明就黎明啦！
Stella出嚟主要係描述我有啲咩任務，佢一口咬定公司有隻狐狸精，但就唔知係邊一個女職員，今次呢5萬蚊一個月嘅報酬就辛苦過姐夫嗰次喇，因為Stella要求我每個星期交report，內容係講佢老公同邊啲女下屬有接觸之類，無所謂啦，當係經驗囉，咁我開公司都係想朝住呢個方向發展，將來隨時會遇到更高要求嘅客。
嗰位同Stella感情要好嘅HR隔咗日就打嚟，講好晒幾時上去見工，臨尾又叫我係咁易send份CV畀佢，因為要畀老闆，所以門面功夫始終要做足。
HR：「嗱，份CV你吹大啲都得，因為老闆唔會睇你啲cert同埋reference letter，為咗增加受聘嘅機會，你寫自己係理工畢業啦！」
我：「咁又唔使造假，我本身真係理工大學畢業㗎！」
HR：「麻省理工呀！」
我：「……」
我拒絕咗HR嘅要求，唔好咁痴線啦姐姐，一來你都內定㗎啦，二來偽裝員工入去做臥底好小事，不過偽造文書虛報資料就好大件事，咪玩啦！
上到去之後我有少少後悔，因為HR竟然玩group interview，同我爭呢份工嘅係兩條女，一個平庸四眼妹，蜻蜓咁嘅樣，一睇就知道好做得嘢，另一個就幾靚女，唔做得都睇得，乜唔係搵兩個甩皮甩骨嘅candidate去襯托我咩？老闆仲要一齊入房做group interview，換言之個場面係HR+老闆 Vs 3個candidate，而家唔係做唔做任務嘅問題呀，而係咁嘅陣勢正常都緊張啦！
Group interview主力由HR問問題，老闆齋聽冇搭嘴，首先叫晒我哋3個candidate自我介紹，呢一part大家都發揮正常，跟住去到工作經驗嗰部分就出晒事喇，首先陣亡嘅係靚女，HR叫佢講下之前一份工具體要做啲乜。
靚女：「乜都要做㗎，雖然係marketing，不過都要追sales target，呢樣我就最唔鍾意，我嘅職責係宣傳公司嘅產品，唔明點解要同銷售額掛勾，你賣咗幾多貨係睇你班sales㗎啫，連啲物流都要管，幾時出貨都係我去答啲客，連cs嗰份都做埋，真係咩都要做。」
我估靚女係想表達自己上一份工要涉獵好多嘢，工作能力強，但係個presentation出咗事，令人覺得句句抱怨舊公司。
HR再問靚女：「因為太多嘢做？所以你就想轉工？」
靚女又一次自我引爆：「此其一啦，最頂唔順係公司女人多，是非多，成日要就呢個就嗰個，我都係鍾意同男人一齊做嘢，爽啲冇咁煩。」佢keep住句句都係抱怨tone。
老闆突然插嘴：「但我哋呢度都係女性員工比例多，大約七三喎！」
靚女：「即係7成係女，3成係男？」
老闆笑笑口點頭。
靚女嘗試兜：「哦，唔緊要嘅，人夾人㗎啫，唔一定個個女仔都好似我班舊同事咁麻煩，我自己都唔鍾意講是非㗎，哈哈！」
見工已經係咁埋怨，一定信你份人唔鍾意講是非啦，我唔懷疑佢之前份工要一腳踢，只係interview階段已經不斷數落舊公司同埋舊同事，其實係犯咗大忌，你估面前呢個HR同埋老闆，唔驚你將來轉工時又周圍唱佢哋咩！
輪到蜻蜓，HR問佢點解想轉工，起初回答都好得體，但忽然愈講愈激動，仲喊埋出嚟。
蜻蜓：「之前個上司……唔鍾意我……佢講過好多次想我自己走……」嗰啲……嘅省略號係喊緊抽搐。
HR：「唔緊要，慢慢嚟，使唔使唞下先？斟杯水畀你好唔好？」
蜻蜓：「唔使……佢講過好多次想我自己走……唔知點解咁對我……其實我唔想走……」
HR：「點解你覺得個上司唔鍾意你呀？因為平時做嘢頂撞佢？」
蜻蜓：「因為我成日做錯嘢……唔係有心……可能我……大頭蝦……」
愈喊愈淒涼，HR向佢遞上紙巾，我都差啲想起身走，唔in喇，蜻蜓小姐應該好需要呢份工，讓畀佢啦！不過我都知道蜻蜓小姐咁樣係大忌，首先係interview控制唔到情緒，對方的確好難有信心請你，畢竟呢度係商業機構，唔係社區服務中心，人哋公司冇義務去安慰你，同埋蜻蜓小姐解釋原因嘅時候透露咗自己成日做錯嘢，呢樣又真係難搞啲。
終於輪到我出場喇，HR都係問返同一堆嘢，然後我將自己喺姐夫公司嘅工作覆述一次，當然唔係臥底任務啦，純粹係講正常office做嘢嗰部分，我當時真係有見客同follow up㗎！
HR：「咁你又點解想轉工嘅？同啲舊同事相處有冇問題？」
我：「同班舊同事感情都好好，間公司又好好，不過一入去已經知道係temp job，所以完成咗3個月合約之後搵長工喇。」
可能係有靚女同埋蜻蜓小姐做對比，明顯見到老闆對我嘅態度同埋表情係幾滿意，講真自己並唔突出，如果唔係另外兩位candidate近乎自殺式嘅演繹，我應該冇乜可取之處，如無意外，HR真係篩選過先至咁樣安排，或者phone interview已經發覺嗰兩個女仔唔對路啩。
Group interview之後一日已經收到HR通知可以返工，仲話愈快愈好，放心啦，明㗎喇，我心急過你啦，早啲返工早啲開始查嘢吖嘛！
返工當日HR帶我行一轉公司，再引領我去屬於自己嘅department，簡單介紹啲同事，喂！不得了呀！全女班都算喇，仲要個個都咁正，講名肯定記死大家，不如我幫呢班女同事起啲綽號啦，易入腦好多㗎！
有個女同事目測起碼36E，仲要走肥喎！之後就叫佢36E啦！又有一個身型高挑，個樣有啲古典味，做model都得啦，使乜做文職咁嘥呀？之後叫佢model啦！唔好意思，等我吞啖口水先。
另外有個唔係行豐滿同高挑路線，但係計樣貌就最甜美，少少似Dada，冇咁cool，好鍾意笑，就稱呼佢Dada啦好冇？
未講完，有一個類似糖妹嘅style，青春細細粒，直接叫糖妹啦！仲有個唔知形容佢似邊個，計樣唔係最突出，不過條瑜伽褲勁搶鏡，hip型清晰可見，嗌佢阿hip啦好冇？雖然後來先知阿hip平時都係OL打扮，逢星期五先會著瑜伽褲返工。
差啲唔記得講，仲有個四眼妹，個feel好似一齊見工嗰位蜻蜓小姐，為免混淆就叫蜻蜓小姐2.0啦，佢正正常常㗎，只係其他幾個女同事太突出啫。
呢單job嘅難度似乎好高喎，淨係呢個department都咁多惹火尤物，Stella肯定公司得一個狐狸精？
（未完待續）
《臥底Season 2》Ep3
四眼妹相當有可疑
https://hkofficedaily.com/?p=21752