《臥底Season 2》Ep3 四眼妹相當有可疑

成個department都係惹火尤物,不過以男性角度去睇,36E嫌疑就最大,都唔使點解釋啦,特別係我入職之後嗰餐welcome lunch,36E孭住個𠝹波袋出去,我偷望嘅同時亦發覺老闆都偷望咗幾眼,仲有街上面嘅麻甩佬,真係成班都係臭男人……包括我。

Welcome lunch嘅時候我仲發現到,36E份人都幾世界女,乜嘢都搭到嘴,阿hip講行山佢又識,model講名牌佢又有留意,就連我講自己平時鍾意打機,36E都有研究同埋玩過啲新game,佢仲癲到同老闆傾車,外交手腕會唔會太強呀?

36E好似同個個都friend,老闆同佢講嘢嘅時候就笑得最燦爛,後來慢慢發現到,36E更加係department裡面嘅開心果,只要佢喺度就有話題,而且對人人都咁nice,身材咁好又咁熱情,對於男人嚟講的確好易中招。

順帶一提,呢間公司係幾多OT,就算其他部門都一樣,冇乜人搭正6點鐘走,基本上你7點前熄機離開就相當礙眼,不過為咗份臥底工作,就算我係新人都要係咁易扮下嘢,唔夠一個星期就有少少發現,因為有一晚我見到兩個人差唔多同時離開,老闆6:30走,36E唔夠兩分鐘又走,前後腳喎!

一晚半晚可能係偶然,反正呢份臥底job我預咗要做三個月左右,再觀察下先,喺office裡面另一個大熱嫌疑人就係model,其實佢同老闆嘅接觸冇乜異常,不過佢啲名牌袋就多到好唔尋常,因為model用嗰啲全部係大大個logo或者圖案,盲嘅都見到係CHANEL、LV、Hermès、Saint Laurent等等嘅牌子,差唔多隔幾日就唔同。

打份工真係可以有錢到咁?還是本身就係賺錢買花戴呢?咁當然啦,所有嘢都要求真相,唔可以只睇表面,或者係model嘅男朋友送呢,嗰對長腿係值回票價嘅!

嫌疑人第三熱門應該係Dada,雖然佢各方面未必夠36E同model咁標青,但係必殺技係夠嗲,聽講佢媽媽係台灣人,我自己就唔多受落嬌嗲呢一套,不過有啲男人係好鍾意㗎嘛,舉個例,有次食晏大家叫小菜,其實我係食唔落,所以求其講咗句:「Dada你食埋個隻蝦啦,一人一嚿㗎,你好似未食喎。」

一句咁普通嘅說話之嘛,然後Dada就打我手臂再講:「耶,你好衰㗎,人哋減肥想忍口吖嘛,你仲叫我食,你食啦,男仔肥啲好呀!」

我都未嚟得切反應,Dada連隨又嗲多一嘢:「你做咩咁留意我呀?」跟住成枱同事大笑,搞到我勁尷尬。

老老實實,當時同Dada做咗一個月同事都唔夠,我隻手臂已經畀佢前前後後打過廿幾次,正常講嘢唔得㗎喎,係要打一打人手臂先,咁奇怪既?同埋Dada淨係對男人先係咁,對住其他女同事就只係把聲keep住嗲,唔會郁手郁腳,呢啲格平時應該收唔少兵。

我都見過Dada打老闆手臂,仲要講緊公事,所以係幾唔恰當,不過老闆睇嚟好受,起碼畀Dada「耶」完之後笑得好開心,完全唔抗拒,都話㗎啦,有啲男人真係鍾意㗎!

至於嗰位逢星期五著瑜伽褲返工嘅女同事阿hip就比較正常,身型同性格都好健康,星期一至四OL look打扮斯文,放假鍾意做運動同埋行山,睇個hip型都知佢好勤力做深蹲,暫時睇唔出有咩可疑,反而有隻黑馬隨時爆冷跑出嚟,我講緊嘅就係蜻蜓小姐2.0喇。

點解呢度啲女同事天姿國色,我仲走去懷疑蜻蜓小姐2.0呢?頭先咪講過36E試過同老闆前後腳6:30離開嘅,其實呢種情況只係出現過一次,唔排除係巧合,同埋你都知好多打工仔見到老闆走咗,跟住就會安心收工,換轉我都會咁做,只不過有任務在身先至留到咁夜,反而蜻蜓小姐2.0有啲唔同,除咗老闆之外,佢就係OT得最長時間嘅人。

簡單嚟講,雖然公司好多人OT,不過大部分頂盡係做到8點幾至9點,唯獨老闆同埋蜻蜓小姐2.0呢兩個人就好似冇底線,老闆嗰次6:30走係絕無僅有,其他日子我都唔清楚佢同蜻蜓小姐2.0係OT到幾多點,因為等唔到呀,有次我已經坐到9:30,佢兩個仲係做到冇跡象會離開,咁我入嚟嘅日子又淺呢,OT得太過份都冇人信啦!

我坐到9:30嗰次,仲要係老闆行出房叫我走,佢話唔使因為佢未走所以夾硬留低喎,又話做落咗會成日OT,嗌我趁而家未有咁多工作,好好享準時放工嘅樂趣先,老闆擺明識穿我「扮工」啦!

其實嗰次老闆叫我做完嘢可以走嘅時候,我留意到蜻蜓小姐2.0都有望過嚟,你兩個係咪嫌我阻住晒先?

咁都未算,咁多女同事當中,以蜻蜓小姐2.0行入老闆房閂埋門講嘢嘅次數最密,有時我仲見到蜻蜓小姐2.0神神秘祕行出office外面個走廊講電話,仲唔係有古怪?曾經諗過蜻蜓小姐2.0會唔會搵緊工,要行開聽嗰啲HR同Headhunt嘅電話,因為喺自己個位唔方便,但又唔似吖,因為蜻蜓小姐2.0呢種行徑都維持咗好耐,如果係搵緊工,又未見過佢請假喎,搵完都要見㗎嘛,究竟係咪同老闆傾電話呢?

我每個星期都要交「捉姦研究報告」畀Stella,真係成份excel,列出每個禮拜邊個人古古怪怪,期間多次提及呢條四眼妹相當有可疑,應被視為「高度關注人物」,望落去越安全嘅人可能就係最危險嘅人,36E同model佢哋係正,但老闆要溝到嘅難度亦相當高。

男人雖然鍾意睇波睇腳睇樣,但同時都會追求新鮮感同刺激感,正所謂豬扒都係肉,好過去自瀆,更何況蜻蜓小姐2.0並唔係豬扒,我留意過佢對眼都幾大,如果有心打扮應該唔差,我家姐都係四眼傻更更,結果咪又係嫁咗畀個創業家姐夫。

蜻蜓小姐2.0之所以被視為黑馬,其實仲有一個原因,就係我發現到佢非常留意老闆,特別係其他女同事同老闆講嘢嘅時候,有次Dada打老闆手臂,蜻蜓小姐2.0真係牛咁眼望住,又有一次36E走咗入老闆房傾嘢,蜻蜓小姐2.0即刻借頭借路拎啲文件入去搵老闆,個感覺就好似要睇實自己條仔咁。

連續5個星期都將蜻蜓小姐2.0擺喺「捉姦研究報告」嘅第一位,Stella似乎並唔在意,亦冇乜大反應,去到第6個星期,Stella無啦啦喺電話度發火鬧我。

Stella:「冇可能㗎,你不如花啲心機睇下邊個女同事似狐狸精仲好啦,會唔會係其他department呀?」

我:「唔係喎,佢真係特別留意老闆,同埋佢晚晚都留到好夜,兩個好似夾埋一齊最遲走咁樣。」

Stella:「唔會係佢啦!你嘥晒啲時間!我叫你睇實其他人,你照做就得啦!」

我:「唔係哩,真係有啲唔妥……」

Stella:「我叫你查第二個呀!佢都係我條針嚟㗎!你查佢做咩啫!我大嗱嗱畀你5萬蚊一個月,你畀啲咁嘅垃圾report我?」

我:「等等先,佢係你條針?」

Stella:「係呀!佢都係我派入去㗎!你而家明白未呀?忍咗你好耐,個個星期都話佢最可疑,可咩疑啫?佢都係留意緊我老公,份report又話佢鬼鬼祟祟出走廊講電話,佢咪就係同緊我講囉!你花咁大篇幅講佢把鬼咩!」

搞清楚少少嘢先,我入嚟做臥底,但原來蜻蜓小姐2.0已經做緊臥底,換言之我係臥臥底,佢臥老闆,我臥佢再臥老闆,大家咁樣臥嚟臥去呀?頂你唔早啲講,究竟呢個department仲有冇其他臥臥臥臥臥底㗎?(未完待續)

《Season 2》Ep4 同老闆飲酒做咗朋友
https://hkofficedaily.com/?p=21761

error: