「今日我鬧到個同事趴街，講咗好多次都做錯，仲要駁咀駁舌，即刻開佢波啦！跟住喺度眼濕濕，好心啦，男人老狗，唔想畀人鬧就醒少少吖嘛，真係唔屌唔鬆化！」幾個friend出嚟食飯，阿德一如以往描述佢喺公司點鬧人。
阿德做嗰間公司係國際知名大brand，好耐之前我有打探過仲請唔請人，但佢似乎唔推薦我入去做：「IT嗰邊我唔熟呀，不過講開又講，我公司啲IT就出咗名廢，次次搵佢哋都係叫你熄機再開，咁我都識整啦！遲早一日叫老細炒晒佢哋。」
其實我都明白介紹朋友入自己公司係職場大忌，雖然大家範疇唔同，我IT佢Sales，不過都唔係咁好啦，加上當時我只係純粹講下，唔係趕住要轉工，所以就鳩吹冇下文，成件事不了了之。
阿德自己親口講過，佢喺公司係一人之下萬人之上，淨係得老細可以點佢做嘢，原因係阿德條數靚仔，咁都合理嘅，Sales係公司嘅命脈，跑到數人人都當你神咁拜啦！不過做阿德下屬應該幾慘，每次都聽到佢講自己點樣鬧人，睇嚟有實力嘅人要求係零舍高。
直至早排我真係辭咗職，見到啱嘅job就send CV，當時都有瞄到阿德公司請緊IT，無謂煩人啦，自己順手send CV去咪算囉，有得見就見，冇得見都唔緊要，搵工就係咁樣漁翁撒網㗎啦！點知佢間公司又真係打嚟叫我去見工。
冇特別同阿德提起呢件事，一來收到電話嘅第二日就去in，當晚我都有好多嘢要準備，二來嗰排有幾個friend都清假旅行，約極食飯都唔齊人，三來我有少少怕瘀嘅心態，見得成就話啫，一陣失敗冇請到，喺阿德面前咪好瘀囉，所以都係唔講住，interview嘅時候撞到佢就打個招呼啦！
呢間公司真係太大喇，填完form又畀HR帶咗我落一層見工，地方大到我都唔知邊個部門打邊個部門，完全見唔到阿德，不過我in完之後都有send個message畀佢，仲加埋一張佢公司樓下嘅相。
阿德收到msg同幅圖之後就reply我：「做乜嚟我公司呢頭嘅？唔係搵我食tea呀？我行唔開喎！」
我覆返：「如果佢哋請我，日日同你食都得啦，我頭先上咗你公司interview呀！」
阿德：「搞啲咁嘅嘢？？？我公司唔好做㗎！請你都唔好嚟啦！」
聽得出阿德唔主張我去佢公司，但我真係周圍搵緊嘢做，有工咪見囉，而且冇出動任何人情牌同埋關係，咁冇理由朋友做緊嗰間公司，我就特登唔去interview㗎嘛，如果一個人好多朋友，個個都唔同公司，send CV嘅時候咪有好多job要避開？唔合理吖！
等咗兩日咋，阿德公司就打嚟話請我，其實喺呢兩日裡面，阿德係不停向我打公司毒針，講咗勁多唔好嘅嘢畀我聽，例如點樣刻薄、點樣低於市價請人、階級觀念好重，甚至係個廁所好潮濕好臭……連廁所嘅環境因素都計埋，究竟阿德有幾唔想我入去做？又有幾憎間公司？😅
新入職當日嘅朝頭早，我終於搞清楚各部門嘅位置係點喇，因為IT Manager帶我周圍打招呼，其實佢係想介紹我畀同事識，等啲人將來有任何電腦問題都識得搵我，然後晨早流流我已經見到阿德畀人鬧，仲要鬧得好凶狠下。
「點呀大哥！上星期又話呢幾張單好有potential，又話high chance又乜又柒，而家呢？究竟你有冇上去見個客㗎？點解我發現個客好似唔識你咁嘅？你話出去client visit係去咗行街呀？你話上過去吖嘛！咁個客張卡片呢？你拎出嚟畀我睇下！」
本身阿德畀人鬧到頭耷耷係冇發現我存在，不過IT Manager完全唔理當時嘅氣氛，係都扯我埋去Sales Team打招呼，跟住我先知道鬧阿德嘅人係佢上司。
IT Manager：「Michael，介紹個新同事你識，佢係Tim，之後有咩問題可以搵佢！」IT Manager再向我補充一句，Michael係Sales Team嘅department head，明晒。
阿德終於留意到我，佢又尷尬又驚訝，其實我都尷尬……
嗰個Michael本身鬧緊人，但又一秒變親切同我握手，把聲仲好似顏聯武咁，附帶一句：「之後麻煩晒你！」
跟住IT Manager就同我「轉場」去其他department，呢個時候我又聽到個Michael轉返做「殺人王」tone繼續鬧阿德，Sales即係Sales，變臉變得好快。
第一日返工因為要同自己team食welcome lunch，所以要第二日先方便約阿德食晏，佢煞有介事咁向我解釋早一日點解畀Michael鬧，話Michael心情唔好先會亂咁鬧人。
我：「明啦！我之前遇過啲阿頭都係咁，慣晒啦！係喎，呢頭附近有咩餐廳好食呀？第日你唔得閒，我都可以自己去食吖嘛！」如果阿德唔提，我係絕對唔會再提，咁就不如順勢轉話題。
做咗一段時間之後，我發現阿德畀人鬧嘅頻率係幾高，唔止個Sales Manager鬧佢，連佢部門同事，仲有其他department嘅人都會話佢，語氣係幾不留情面，我亦從中聽得出阿德做嘢係幾甩漏，因為有幾個鬧佢嘅人平時係好nice，好少見到佢哋咁火。
我冇諗過轉去朋友公司做會睇到呢啲咁尷尬嘅場面，唯一安慰係我自己去in，之前冇麻煩到阿德，至於佢平時講自己喺公司一人之下萬人之上……我作為阿德嘅朋友其實唔需要去判斷，都係嗰句，我IT佢Sales，各有各難處，佢要見客要跑數，份工都唔易做㗎！
或者阿德好要面先會講到平時幾勁幾威，但呢啲係人之常情啦，好多人對住親朋好友都係報喜不報憂，如果佢成日同班friend呻，我哋可能會無所適從，當然啦，我亦唔會同其他幾個friend講出實情，呢啲嘢唔需要周圍唱。
而家除非係Sales Team有同事需要幫忙，否則我盡量唔行去阿德個部門，希望佢日常工作可以自在啲，好在間公司夠大，但係我想講呢度個廁所其實唔臭唔潮濕，我日日食完晏都會爆個石再開工，不知幾爽！（完）
以下嘅舊文唔知你睇過未，全部關於介紹親戚朋友入自己公司🙈
朋友介紹工作講條件每月人工要貢獻$2000
https://hkofficedaily.com/?p=13411
出生入死一齊避公安你有好工都唔介紹我
https://hkofficedaily.com/?p=22443
《Private Driver》 Ep1 – 介紹老豆入公司做
https://hkofficedaily.com/?p=22161