Send完CV冇耐就收到HR電話約見工，可惜同日有另一個interview，咁我就嘗試同HR話轉另一個日子，佢本來ok咗，但隔咗陣又打返嚟講：「後日老闆唔得閒，如果聽日你晏啲上嚟得唔得？5:00你ok？」
我話5:00未必趕得切，因為我另一個interview喺港島區，出到九龍再上佢公司應該要5:30，正常6:00收工，無謂阻人啦！點知HR話佢老闆冇問題，約實我5:30 interview，乜咁有誠意呀？不過都好嘅，一日內見晒兩份，唔使再成套西裝出多次，咁我就應承啦！
上到去我已經發覺HR趕住收工，係咪呢！一早話咗改第二日㗎啦！我填form用咗唔夠15分鐘，HR跟住入房見我，期間佢已經不斷睇錶，in得10分鐘咁上下佢就同我講：「我要趕住走喇，而家叫老闆入嚟見你，你等等。」
哦！原來可以直接見埋老闆，咁又唔同，ok，你冇咩事就走先啦！（呢啲係我內心對白啫，冇講出聲。）
老闆好nice，同我interview一切正常，見咗40分鐘左右，一個女人入嚟同老闆交代聲而家收工，仲話出面啲人走晒，叮囑老闆走嘅時候記得熄燈鎖門。
當時我喺度諗，呢個老闆都唔錯喎，起碼唔會迫同事留得夜過佢，亦唔介意自己熄燈鎖門，應該冇乜架子夠貼地啦！
老闆對個女人表示ok之後，就望一望自己隻錶再同我講：「原來都差唔多7點，唔怪得有啲肚餓啦，你有冇約人呀？一齊食飯吖，都未問你之前份工啲嘢。」
嘩！個老闆約我食飯深入了解喎，呢份工好大機會請我啦，而且佢份人咁親民，反正冇約人，老虎蟹都食啦！
講明先，我係男人，30幾歲，已婚，而個老闆應該50幾歲啦，我哋絕對唔係hehe，釋除咗呢樣疑慮先。
我哋喺尖沙咀一間酒吧晚飯，地方係佢揀嘅，佢話近公司，同埋平時成日嚟，露天位置可以食煙，是但啦，你係老闆吖嘛！
晚飯嘅時候我哋天南地北咩都傾一餐，除咗講返我之前份工之外，我哋仲講咗以下嘅話題：
－－佢19歲結婚
－－佢離過兩次婚
－－佢同班friend好鍾意玩電單車
－－佢個女走咗去讀中醫
以上嘅話題關我咩事呢？其實我都唔清楚，但當時幾肯定個老闆係幾like我，否則又點會同我講咁多私事呢？佢仲同我提及下年考慮搬office，話想喺觀塘搵間大啲，喂，公司內部操作都同我講喎，呢份工仲唔係請硬我？作為老闆正常都唔會同candidate講咁多私事同埋打算啦，照計佢已經當咗我係一份子。
食完晚飯已經係9點，佢埋單，我一蚊都冇出，臨尾佢同我講：「喂，咁好啦，有消息我叫HR通知你。」
見工就最憎聽呢句，不過由呢位老闆講出嚟就特別順耳同舒服，得啦，你啱啱先請我食飯，大家又咁好傾，我連你個女讀中醫都知喎，第日做嘢慢慢傾囉，最多你個女畢業掛牌嘅時候，我有咩頭暈身㷫唔睇西醫，淨係睇你個女。
不得不重複又重複再講，見工見到老闆請我食飯飲酒，仲講咁多私人嘢我聽，換轉係你都覺得請硬啦，但係我返去等咗兩三日都冇電話，跟住就到weekend，去到下一個星期都係冇call，咁我就覺得好奇怪喇。
按耐不住，我決定打去間公司問一問HR，首先多謝個HR畀個機會我嚟interview，呢啲門面說話唔少得啦，再問下我個position如果真係請，通常係要等幾耐。
HR：「我哋請咗人喇，唔好意思，因為太多人上嚟見工，唔請嗰啲好難逐個通知。」
我：「請咗人？點解嘅？」
HR：「點解？」
人哋出招聘廣告請人，有人見工，咁就梗係會請人㗎啦，我都明白咁問係好低能，但我嘅意思係……
我：「我以為自己好大機會，因為嗰晚見完工，你老闆仲帶咗我去食飯，成晚同我傾計。」
HR：「哦，佢份人係好nice㗎，佢平時都會搵我哋班同事食飯，嗰晚可能我哋走晒，佢悶得滯先搵你食。」
我：「咁樣……佢連個女讀緊中醫都同我講，搞到我以為自己好大機會。」
HR：「我老闆係咁㗎，呢幢大廈啲保安都知佢個女讀緊中醫，佢係好鍾意同人分享，你唔好介意。」
原來連大廈啲保安都知，又原來搵我食飯係攝時間，老闆！見工同溝女一樣，唔好畀錯signal人哋啦，一場歡喜一場空好hurt㗎！（完）
延伸：見工血淚史又點止咁少呀？以下幾個舊故事你仲有冇印象？
公司請人內定自己友望住求職者感覺內疚
https://hkofficedaily.com/?p=17388
Interview 講到好滿意最後不了了之
https://hkofficedaily.com/?p=15745
見工句句腌臢最終壓價四千
https://hkofficedaily.com/?p=21688