估唔到2023年咁快有奇遇，去見工被安排入房填form，差唔多填完嘅時候出面已經好嘈，但唔知嘈乜，跟住有人開房門入嚟，以為係個HR啦，點知係條西裝友，佢見到我嗰下好愕然，我仲愕然啦，你門又唔敲，仲要好驚訝有人咁樣，乜間房唔畀人用㗎咩？
條西裝友收起咗愕然嘅表情之後無啦啦喝我：「你邊個呀？喺度做咩？出去！」我心諗你咩事咁冇禮貌呀，不過諗返頭先咁嘈，應該係發生咗啲事，我又唔知佢係邊個，咪打算一路孭袋一路同佢解釋係interview囉！
點知我都未嚟得切講任何嘢，後面又有三條金毛爛仔衝埋入嚟，一睇就知道唔係好人嗰隻，不過其中一位反而喝返個西裝友轉頭：「你咁惡做咩呀？」
西裝友對住佢哋態度一秒轉變，細細聲答：「有人喺度呀。」
另一條金毛爛仔好惡咁鬧西裝友：「有人又點呀？乜你知醜㗎咩？知醜就還錢啦！條數幾時還呀？前日打畀你又話噚日，噚日打畀你又話今日，你真係當我哋流㗎喎！玩嘢係咪呀？」
其實我唔係唔想走，只係嗰幾個金毛爛仔企正喺門口，個個都好高好大嚿，我行出去就一定要叫佢哋讓路，真係唔敢呀，同埋唔想正面同佢哋講嘢，我一個女人仔，行過畀佢哋「hi」到都費事啦！
西裝友有少少發晦氣咁話：「咪話咗畀多少少時間我囉，你哋走上嚟我公司追數有咩好處先？我冇咗份工都一樣冇錢還，使唔使搞到咁呀？我問朋友借都要時間啦！一係我同你哋落街傾，唔好喺寫字樓嘈。」
已經唔識分啲金毛邊個打邊個，總之任何一個金毛講嘢我都當佢金毛啦，其中一個就好大聲鬧個西裝友：「畀咗好多時間你啦！上你公司因為你唔聽電話，講咗幾多次唔好唔聽電話呀？今朝打咗幾多次畀你？你自己講！」
跟住又有條金毛向住我講：「嗱！你呢個同事呀！借錢唔還，講嘢冇句真。」
感謝主，我終於出場喇，我終於有對白喇，即刻同幾位大佬解釋：「我哋唔係同事，我嚟interview㗎咋！」
以為有得走啦，點知個金毛講咗句極度冇邏輯嘅說話：「咁啱喇，你同我一齊聽住佢點講，聽下佢今次又話幾時還錢！」
咩叫「咁啱喇」？點啱呀大佬？咪話咗我係嚟interview囉，我哋唔係同事呀，我唔識佢㗎，你叫埋我一齊聽做咩啫？唔通因為interview係英文，佢哋聽唔明？早知我話「見工」啦！佢哋係咪誤會咗我意思呀？
西裝友無端端指揮幾個金毛做嘢：「你哋閂門先啦！唔好搞大件事！」我頂你個肺呀！我未離開間房㗎！做咩叫佢哋閂門呀？
呢一刻先發現金毛仔仲正義，佢回應西裝友真係簡而清：「閂你老母！而家件事仲唔夠大呀？仲驚你班同事知道呀？還錢啦咁多嘢講！」
不過更正義嘅人終於出場，就係頭先畀form我填嘅HR姐姐，佢探頭入房向嗰幾個金毛講：「你哋畀個女仔出嚟先啦，佢見工㗎，唔關事㗎！」
其中一個金毛重複咗句：「見工㗎咩？你唔早講？」喂呀，頭先咪講咗我嚟interview囉，黑社會真係連咁簡單嘅英文都唔識？
最終HR姐姐「救返」我出嚟，行出房嘅時候見到好多同事都圍觀緊，我一路行一路避開人群，雖然人哋唔係追我債，但我都覺得好尷尬。
HR姐姐送我出返去公司門口嘅時候講咗幾句唔好意思，仲話會再約時間同我interview，不過我答：「唔使喇，可能唔啱我。」嗰陣時真係畀呢件事影響，我意思唔係份工唔啱我，因為都未正式見，只係覺得個場面咁核突，唔係好想再上嚟呢間公司。
HR姐姐冇勉強我，佢好簡潔咁答咗我一句：「明白嘅。」我諗佢之後都有大把嘢要處理啩！
由於我冇見工，冇入去做，所以到而家都唔清楚畀人追數追到上公司條西裝友究竟係咩職位，如果齋睇年齡同款頭應該唔係老細或者高層，不過咩身份都好啦，經歷完呢個情景，真係唔想同呢啲人做同事。
比較幸運嘅係，我唔係裸辭，當日只係請咗半日假去interview，唔算有急切搵工嘅需要，好彩好彩。（完）
延伸閱讀：以下幾篇舊文都係同「債」有關，未睇過嘅朋友可以睇下。
4年儲咗13萬然後被迫幫阿哥還債
https://hkofficedaily.com/?p=11673
曾欠債百萬屋企被斷電「最黑暗日子想自殺」
https://hkofficedaily.com/?p=17214
愈窮愈見鬼大耳窿騷擾同事同埋老細
https://hkofficedaily.com/?p=21284