出街食飯，喺餐廳遇到個舊朋友，佢叫阿強，初時都唔敢肯定，畢竟而家人人戴口罩，加上10年冇見，直至佢除罩之後我先確認冇錯，由於大家張枱都隔咗一段距離，等咗好耐先等到彼此眼神對接，我望住佢微笑點頭。
阿強見到我之後有啲愕然，不過佢望咗一眼就冇理我，繼續同個女人食飯，唔知係咪心裡面凝住呢，我覺得阿強特登食快啲埋單，因為佢係比起我更遲入餐廳，加上明明見到又扮唔識，相信10年前單嘢佢仲未釋懷。
其實我同阿強唔止舊朋友咁簡單，當年我哋更可以稱得上係好兄弟，一個星期少則見兩次，多則見三四次，我哋仲走遍大江南北，兩個麻甩佬喺陌生地方瞓同一間房，避過公安嘅追捕，試問又有幾多朋友嘅經歷可以到達呢種程度吖！
雖然事隔10年，不過阿強最後同我講嘅一句說話，直至而家都仲記得，阿強係飲住酒大聲咆哮：「你係咪咁呀！出生入死一齊避過公安，有好工都唔介紹我？一句到尾，幫定係唔幫，我唔係問你借錢吖，我想入你公司做啫！」
我又係衰嘅，當年大家熟吖嘛，又玩得埋，成日食飯食早餐，我同佢都會講下各自公司嘅嘢，嗰陣時我深得老闆重用，事業起飛緊，真係一人之下萬人之上，然後我同阿強呻過：「原來請個倉務主管都唔容易，登廣告成個禮拜冇份履歷係啱，我趕住食完早餐走喇，一陣仲有個求職者要見。」
阿強其實聽我呻咗好多次，一直相安無事，佢仲叫我唔好心急，又同我講笑，點知有一次阿強話：「你公司係咪仲請緊倉呀？我噚日同個老屎忽炒大鑊，嬲嬲地劈炮冇做喇！」
我：「但係我哋請倉務主管喎！」
阿強：「嗱，我就係為咗呢個問題同個老屎忽嘈，我喺呢間公司做咗8年，係8年呀！加上做嘅嘢就係主管級嘅工作，成個倉啲人嘅更表都係我編，個個有問題又走嚟搵我解決，一早要升做主管啦，但有個老屎忽成日搞事唔畀我上，總之一言難盡，我唔想一世做散仔，做主管工作又冇得升做呢個位，你喺你間公司呼風喚雨㗎嘛，橫掂搵唔到人，介紹我做吖，我F.5畢業㗎，英文都講得兩嘴，平時都要睇寫字樓同事啲email執貨，office班人就最屎忽鬼㗎喇，大家都係香港人唔知做咩要打英文，不過我都識睇㗎！」
我唔想，唔係唔想幫佢，係唔想佢嚟我公司做……
再過多幾次，阿強開始不斷追問，但我都係hea應算數，後來真係覺得太煩，我就同佢講：「上星期請咗人喇！」
阿強忽然躁咗：「請咗人？我第一次叫你介紹嘅時候，你明明仲話冇一份履歷適合，我已經隔日問你一次㗎喇，又冇介紹我去，又冇搵我見工，你係咪兄弟嚟㗎？而家仲同我講已經請咗人？試都唔肯畀我試？問親你公司叫咩名又話唔出名又乜又柒，睇我唔起呀？」
我：「點會睇你唔起呀，睇你唔起就唔會同你一齊玩啦，我次次有好嘢都益你……」
阿強：「益我？你冇份happy㗎？我而家叫你介紹份工呀！搵食㗎，我搵唔到食都陪唔到你玩啦！過幾日我就last day喇，未搵到工冇糧出㗎！你即係見死不救啫！」
我：「唔係見死不救，不如咁啦，我問下朋友啲公司請唔請相同職位，我記得曾經同另一個friend呻過請嚟請去都請唔到倉務主管，佢話佢公司都係咁，我估佢仲未請到人，介紹你去啦好唔好？」
阿強：「唔係介紹去朋友公司嘅問題，係你公司本身要請人，我又符合晒所有條件，大家咁老友你都唔幫，換轉你係我心唔心淡？」
我：「阿強你唔好咁激動先……」
阿強：「你記唔記得我哋上次喺後樓梯避公安？記唔記得大家講過如果捉到要互相照應記唔記得？」
我：「記得！」
阿強：「我上星期五晚先同你一齊瞓，你又記唔記得？」
我：「記得……可唔可以細聲少少？」
阿強：「你係咪咁呀！出生入死一齊避過公安，你有好工都唔介紹我？一句到尾，幫定係唔幫，我唔係問你借錢吖，我想入你公司做啫！」
冇錯，以上呢句係重複咗，因為當時就係阿強最後一次同我講嘢，跟住佢就擺低500蚊人仔拂袖而去，頭也不回，估唔到之後仲唔聽我電話，近呢10年直頭係不相往來。
你一定覺得我好冇義氣好殘忍，但其實我都有自己嘅苦衷，我同阿強係一次喺深圳按腳時認識，嗰個場係先按腳後按雀，喺大堂嘅時候阿強坐我隔籬，當時我哋第一次見面，由於各自幫我哋按腳嘅女女都好似坦克車咁大份，直頭係耕田阿嬸feel，按照慣例，兩位阿嬸嚟緊都會入房幫我哋按雀。
我同阿強都覺得好不安，所以就傾咗兩句：「唔掂喎，我呢條女老虎都打死幾隻喎！」
阿強：「我呢條女都唔弱，個眼神好唔友善，我懷疑佢曾經殺過人，好恐怖，不如走喇。」
我：「好！轉場！你係香港人？」
阿強：「香港人！你又係放工啱啱上嚟呀？」
我：「係呀，做嘢咁辛苦，唔係上嚟食呢啲呀？我知道有另一個場幾正，一唔一齊去？」
阿強：「梗係去，單嫖獨賭有時都好驚㗎，兩個人有照應好好多。」
我同阿強就係咁樣認識，之後幾年我都keep住同佢走遍大江南北，深圳東莞廣州啲場我哋都去過晒，放長假嘅時候更相約去湖南、四川、重慶……簡直係江山如此多嬌，兩個人可以玩得咁癲，咪就因為唔係同事，本身又唔同朋友圈子囉，玩乜都可以放盡啦！
點解我哋兩條麻甩佬仲會一齊食早餐同瞓覺？有時喺啲骨場滾完，咪順便喺嗰度瞓囉，唔止慳返房錢，仲有職員morning call，包保出香港返工唔會遲到，間唔中啲場會好爆唔夠房，我就會同阿強瞓埋同一間房，我同自己親兄弟都冇咁close呀！起身仲食埋早餐先搭直通車。
至於公安嗰鑊嘢就真係驚險，有次同阿強去沙嘴滾，上樓私竇嗰種，做做下私竇嘅人話有公安殺緊上嚟，我同阿強褲都未著就衝出房，私竇負責人話已經lock咗樓下個閘，但同時唔畀我哋留喺單位內。
結果我同阿強著返衫要走出後樓梯，喺上面望落去，見到成車公安（可能係城管，驚到唔想提唔想深究），阿強點咗枝煙，先畀咗我，跟住再點多枝。
我哋兩個就咁樣坐喺沙嘴一棟樓嘅後樓梯食煙傾計，期間要特登好細聲，怕樓下公安聽到。
阿強：「係咪畀幾千蚊啲公安就可以放人？」
我：「講係咁講，我未試過，但因為嚟沙嘴呢啲私竇驚畀人劏死牛，我特登唔撳咁多錢，而家個身一千都冇。」
阿強：「我都係呀，頭先3百幾人仔，我袋咗700喺身都嫌多，幾嚿水公安應該唔放我哋。」
傾傾下，公安大力拍樓下大閘，我同阿強即刻收聲扮冇人。
隔咗陣靜返晒，我又問：「你估同個公安講去撳錢得唔得？」
阿強：「唔得㗎，呢啲見光死，你要靜靜雞塞畀佢，即場冇就走唔到㗎喇，捉你上車行政拘留。」
我：「行政拘留好似14日定20日喎，死啦，點同老細交代，可唔可以打電話返香港？」
阿強：「好似要打畀屋企人，唔知係咪，我份工都麻煩呀，請十幾日假真係死得。」
喺後樓梯匿藏逃避公安呢個時間，好似過咗一個世紀咁耐，最後係私竇條友出返嚟，見到我同阿強喺度煲煙之後就用普通話講：「你們還在這裡？」
阿強：「梗係還在啦！」阿強用廣東話講「梗係」，然後跟佢用普通話講「還在」。
私竇條友：「他們走了，去另外一邊了，你們現在走吧！」
我同阿強飛奔落樓，好似打war game咁慢慢開閘睇清環境，確定clear！奪門而逃！沿路仲見到有架大車，有公安押緊唔知邊棟樓捉落嚟嘅嫖客。
其實我寧願阿強問我借錢，佢講得出，我一定借，偏偏佢係叫我介紹份工，仲要入我公司做，如果將來有咩事反面唔開心，又或者阿強唔小心講咗出嚟，我喺公司仲使生存嘅，以後點搵食呀？
阿強除咗爛滾，飲酒仲好兇狠，喺深圳啲夜總會都醉過幾次，佢最後一次同我反面就係喺一間夜總會裡面，所以我先叫佢細聲啲，當時間房有好多女女，出嚟玩唔好講公事吖嘛，仲要咁大聲，啲女女又唔識廣東話，個個都一頭霧水。
我哋逃避公安，係因為嫖完之後被困沙嘴；我哋瞓埋一齊，係因為骨場冇晒房；我哋食早餐，係因為要搭直通車返香港做嘢；我哋出生入死，唔係去攻打伊拉克，係驚要行政拘留呀！唔係好馨香㗎咋！我100%當阿強係好兄弟，但可唔可以唔做同事呀？
自從同阿強反面，再加上沙嘴一役嘅陰影，後來我都冇再去玩喇，打咗畀阿強幾次都冇聽，message又唔覆，估唔到10年後大家會喺冇預計嘅情況下再遇，睇得出阿強仲未放低，不過見佢身邊有個女伴，希望佢已經修心養性啦！