趁住中秋節send個msg畀老豆，話畀佢知今年買咗最傳統嘅雙黃白蓮蓉月餅，其實我同佢已經足足一年冇講嘢，前因係幾年前介紹咗老豆入去自己間公司做，與其話介紹，不如話無心插柳會比較貼切。
話說我係做Sales，其實好憎sell嘢，不過見呢份工嘅時候真係好趕住搵嘢做，個招聘廣告又寫住係customer service，job details係follow up啲客，咁咪send CV去見囉，點知返落先發現CS成份只係佔好少，主要都係Sales……
雖然唔太鍾意，亦唔太適合，不過我都硬住頭皮做咗兩年，日日畀個上司捽數，有時覺得慘過做保險，唯有安慰自己做保險多少要打擾到親戚朋友，喺呢間公司做Sales就唔使，老豆當時已經失業，屋企又得我一粒女，如果兩父女一齊冇嘢做都幾大心理同經濟壓力。
因為做Sales條數唔靚，上司其實唔係好妥我，有時講嘅說話都幾難聽，好在班同事唔錯，大家都好憎個上司，有共同敵人係特別投契，另外我公司個老細都好好人，性格非常親民，由於呢個老細間唔中會同我哋班Sales去見客，所以都算幾close㗎！
機緣巧合之下，有次又係出去見客，本身我老細同上司都會一齊，不過上司忽然要處理另一單突發投訴，結果得我同老細去client visit，雖然之前傾過計，但係得返我同佢兩個去見始終有啲緊張。
老細：「帶齊啲sample未呀Michelle？」
我：「齊喇，呀……好似執漏咗一個model，唔好意思呀！」
老細：「執漏一個好閒啫，唔使咁緊張喎，你哋一定唔鍾意個老細跟埋去見客啦！」
我：「唔係，點會呀！」
老細：「我後生嗰陣都做過行街(Sales)，嗰陣個老細又係會跟埋我哋出去見客，最初都好煩好大壓力㗎，不過後來我自己搞生意就明喇，間唔中跟埋Sales出去見，個客就會覺得間公司好重視佢，當然啦，我都會睇下個客有冇potential先跟埋去嘅，你而家呢個新客唔錯㗎，畀心機follow啦！」
我：「知道，雖然老細你跟埋嚟係有啲壓力，但係有私家車坐喎，我覺得幾好呀！」
我哋班Sales平時去見客，一定係坐巴士小巴地鐵，不過老細同行的話，就可以來回都坐佢架車，佢個司機仲會載到我哋去個客樓下，又泊正架車喺度載我哋走，大熱天時嗰陣係幾舒服㗎！
老細：「咁你要珍惜喇，可能要過一排先有得同我坐私家車見客。」
正想問老細係咪嚟緊要出trip嘅時候，我嘅手提電話響起，係老豆打嚟，太熟悉老豆個格，如果唔聽就會keep住call，無奈之下要聽一聽先，預咗係問今晚返唔返屋企食飯，果然不出我所料，最慘係老豆仲要係咁追問想食乜，點解佢永遠feel唔到個女做緊嘢唔方便講咁耐㗎！
講咗5分鐘先收到線，我第一時間同老細耍個冧先：「唔好意思，我老豆好長氣。」
老細：「你老豆嚟㗎？聽到你係咁答今晚食乜餸，我仲以為係你媽媽，你老豆肯煮飯咁好嘅？」
「佢幾個月前失業吖嘛，而家好得閒，咪做埋阿媽嗰份囉，其實我寧願阿媽煮。」
老細：「失業？你老豆之前做咩㗎？」
「佢之前揸車囉，好似球叔咁，做啲老細嘅私人司機。」球叔係我而家老細個司機。
老細：「佢做咗好耐私人司機㗎喇？」
「我印象中老豆一直都係揸車，細細個佢揸保姆車，之後揸過客貨van，又揸過一排的士，後來就去咗個大集團做老細嘅私人司機。」
球叔揸揸下車忽然加把口：「咁啱晒喎！」
「咩啱哂？」
球叔：「我今日最後一日返工喇。」我仲未好get到球叔想講咩。
老細：「頭先咪同你講要過一排先有得同我坐私家車見客嘅。」
「呀，係喎，老豆打嚟之後唔記得咗添，你要出trip呀？」
老細：「唔係，球叔退休呀，佢享仔女福，我又未請到司機，你老豆試唔試下呀？」
「下！老豆……點得呀？」
老細：「之前我叫HR搵人，試過幾個都唔得，一係手車好chok，一係行錯晒路，有個仲離譜，好似賽車咁，試完車全部都唔得，你老豆揸過保姆車，即係載過小朋友啦，手車應該好穩嘅，又揸過的士，香港啲路照計好熟，仲要做過大集團嘅私人司機……定係你唔想佢咁操勞？」
因為事出突然，我畀老細咁樣問一問真係嚟唔切反應，答應畀老豆試又唔係，如果佢入嚟做我同事咪大鑊！話老豆揸唔掂又唔係，冇理由踩佢咁衰女吖！而我其實知道老豆係好想搵嘢做，特別係private driver，不過呢行有啲僧多粥少，個個老細都有車，個個老細都要搵人揸自己架車咩！
唔知點解球叔係咁推波助瀾，可能係唔想自己退休之後，老細要紓尊降貴自己揸啩！
球叔：「你咪問咗老豆先囉，佢又做開司機，老細又真係需要請個私人司機。」
老細：「老人家有啲細藝幾好吖，你問下佢聽日得唔得閒嚟見工，係咁易試下車啦！」
「哦，好，我一陣同佢講，多謝你肯畀機會佢。」
其實我曾經考慮唔同老豆講，介紹朋友入公司做都好大壓力啦，何況仲要介紹自己老豆，有咩行差踏錯或者做得唔好，我驚兩父女齊齊失業喎！
我最終都有同老豆講，佢開心到short咗咁滯，當晚就話要加餸，又買燒鵝又整龍蝦，請硬㗎咩？然後佢第二日去見工兼試車……又真係請咗。
老豆搵到工，做女嘅應該好開心，但係唔知點解我笑唔出，唯一安慰係除咗老細之外，冇人知道公司呢個新嘅private driver係我老豆，可能老細唔想我尷尬啦，佢同HR講新司機係球叔介紹，所以之前冇CV入。
不過冇人知還冇人知，出咗事唔通我可以置身事外咩！老豆返咗一個星期都唔夠，我已經喺同事口中聽到講佢嘅壞話。
「覺唔覺個新司機好奇怪呀？」
「好似蛇頭鼠眼咁囉！」
「唔止呀，我見到佢眼甘甘望Mary姐，唔係Mary姐都啱呀？口味咁獨特？」
因為喺呢度做司機，唔會齋坐喺架車度等老細，有時仲要幫老細去下呢度去下嗰度拎嘢，以前球叔都係咁，喺office老是常出現，所以老豆返咗工之後，好多同事都見過佢。
我已經吩咐過老豆唔好行埋我個位度搞搞震，呢樣佢有遵守呀，不過仲係撳唔住同事把口，我成日聽到其他人討論佢，自己做嘢已經夠晒煩，從此之後仲要煩埋呢啲嘢🤦🏻♂️
我：「有同事話見到你係咁望Mary姐喎！你收斂下啦！」
老豆：「邊個Mary姐？黃色絲襪嗰個？佢咁怪相，紅色衫綠色裙黃色絲襪，正常都會望啦，唔係覺得佢靚先望呀，係覺得佢怪相咋！」
我：「總之你唔好望啦！」
老豆：「話時話喎呀女，你個上司好似唔多鍾意你，我今日路過見到佢係咁鬧你，點解你唔鬧返佢啫？」
我：「你唔好理咁多啦，返工係咁㗎啦！」唉，老豆見到我畀人鬧，其實已經好尷尬㗎啦，返到屋企仲要舊事重提，然後我阿媽又好緊張咁問我係咪做得唔開心，我開始後悔介紹老豆入嚟做喇。（未完待續）