Fortnum＆Mason High Tea…貴唔一定係好
Fortnum & Mason係有300幾年歷史嘅英國皇室認證品牌，Afternoon Tea舉世聞名，佢啲茶真心正，可惜甜點方面係死甜，再睇返佢個收費，每位 HK$588 再加一，只可以講句試過就算喇，回頭免問。
首先呢度有分Afternoon Tea同High Tea，參考返Fortnum＆Mason香港嘅官方Menu，Afternoon Tea佢中文叫下午茶，而High Tea佢就叫茶餐，我同女友見一場嚟到決定咩都試下，所以除咗有英式三層架之外仲有熱葷，我哋分別揀咗維多利亞龍蝦松露奄列同埋香草烤Glenarm牛柳配焗薯批，Ok嘅，龍蝦松露奄列香口，牛柳都得，但食完唔會令你念念不忘。
甜點，反而成為咗扣分位，本來以為得我一個咁覺得，但最近見到有人食完都係類似評論，我本身係一個好食得甜嘅人，飲嘢亦唔會特登嗌走甜，不過Fortnum & Mason嘅甜點真係死甜，所以就算佢有得refill你都唔會想要，因為要食晒一件已經唔容易，好幾件都係咬咗一啖唔想再食，鬆餅冇特別，另外有下午茶蛋糕係推車仔形式可以叫人即場切，普普通通，收費包咗就試埋。
環境靚無需質疑，服務正常，佢哋嘅茶當然好飲，但係凡事都要連埋價錢做對比，每位 HK$588 再加一，兩個人要千幾銀埋單，我覺得唔值，嚟過係一種體驗，再嚟就冇需要，呢個價錢你可以喺香港有更多更好嘅選擇，拆散佢食兩至三次High Tea都仲得。
特別一提呢個號稱全香港最靚High Tea景觀嘅view，肉眼睇係靚，影相就一啲都唔容易，因為會背光，再引發我諗到另一樣嘢，就係咁高昂嘅收費，假設你訂唔到窗邊位，應該會覺得更加唔抵。如果你覺得茶好飲，餐具靚，其實喺佢樓下買茶就足夠，Fortnum＆Mason一樓買茶葉餅乾同茶具，二樓就係餐廳，要睇最靚嘅景觀，何不行出去海傍直接對住個海影相？隔住玻璃兩個人食千幾蚊，仲要係甜到不能承受，個人真係麻麻地。
FORTNUM & MASON
地址：尖沙咀梳士巴利道18號Victoria Dockside K11 Musea 地下002&122號舖
官網： https://www.181fortnums.com.hk/
Afternoon Tea時間: 2pm – 6pm
圖文：Boris
版權所有，不得轉載
仲想睇下有咩好嘢食推介，就睇下👉呢到👈啦～