保安呢行，雖然你眼見好多上咗年紀嘅人，但係公司有得揀嘅情況下，其實都唔想同佢哋續約，因為聽阿頭講，想入行嘅後生仔實在太多（我哋呢行30歲算係後生仔，唔係指18，19歲）。
我同事保叔已經61歲，一直傳公司幾個月後唔同佢續約，早幾日難得同佢孖必，保叔自己都好擔心。
望住保叔用擦損晒嘅手喺度手寫訊息畀個仔，佢話自己睇嘢唔算好清楚，螢幕太細，所以要設定到啲字體牛龜咁大隻，基本上你喺佢側邊或者後面行過都會見到佢睇緊乜同寫緊乜。
「保叔，唔好再畀錢你個仔喇。」
保叔：「佢話部電話壞咗，搵工驚人搵唔到佢。」
「電話壞咗而家點同你攞錢呀？不如你自己換部電話先啦，你個螢幕裂咗一忽，上面嗰排字都睇唔到。」
保叔搖頭嘆咗口氣：「佢上年先問我拎咗幾千蚊換電話。」
「咪係囉！你個仔點止一年一次問你拎錢買電話呀？佢個個月都問你攞錢㗎啦！」
睇住保叔同佢個仔互通訊息，佢個仔每一句msg都係同錢有關。
「得罪講句，你個仔真係唔生性，其實你有份做成。」
保叔冇理我，佢唔係冇禮貌，而係老人家分唔到心，同一時間兼顧唔到答我嘢又覆個仔msg。
只見保叔喺褲袋拎個銀包出嚟，反覆數裡面幾張100蚊紙同20蚊紙，跟住又剿下啲提款卡同埋證件，心裡面唔知盤算啲咩，然後拎起部電話再手寫：「聽日比你。」我喺隔離見到佢個樣其實好愁。
聽保叔講，佢個仔同我差唔多大，一樣係30頭，但已經冇做嘢3年幾，日日匿喺屋企打機。
其實我哋呢度嘅保安通常係獨自工作，好少孖必，今次呢更編埋同保叔一齊，係因為佢早幾日巡樓跌親，所以隻手損晒，跌親嗰陣仲壓到部電話，螢幕有一忽裂咗，公司驚佢出事，近幾日先安排佢做一啲孖必嘅崗位。
喺度做咗一段日子，保叔食又唔捨得食，著又唔捨得著，跌親搞到損晒又唔肯放假，螢幕裂咗又唔肯換電話，偏偏個仔就唔出去做嘢，不斷苛索金錢，或者呢啲就叫慈父多敗兒，但我亦見到一個父親嘅唏噓，有時我都好黑心咁諗，保叔如果真係冇得續約，佢個仔會唔會知道冇咗個提款機，肯死死地氣走出去搵嘢做呢？
投稿讀者：安