$550兩位嘅Afternoon Tea算唔算貴呢？當然唔算平，但如果你食過又貴又一般嘅《Fortnum & Mason》，喺大館食《富 Madame Fu》 應該會感覺好好多，起碼服務好，環境好，食物亦唔差，你的確可以嘆到一個悠閒嘅下午，而家佢哋仲同SHISEIDO有一個名為‘The Ultimate Moment’嘅Afternoon Tea，上官網就可以訂位。
Book枱唔算難，但要book室內就比較難，聽講粉紅色梳化係打卡必影，不過IG啲相人人一樣，我又覺得千篇一律，反而坐outdoor可以望到大館個廣場同埋樓下酒吧仲開心，仲遠啲仲見到對面大廈都有露台餐廳，景觀真係好過室內，加上當日天氣唔凍，坐出面心情都好啲，你唯一要挑剔就係坐出面比較多客人出出入入。
呢期《富 Madame Fu》同SHISEIDO合作，$550兩位嘅Afternoon Tea已經包埋SHISEIDO嘅trial kit，分別有Ultimune紅妍肌活免疫再生精華10ml、Essential Energy 水凝亮澤乳霜10ml、活膚補濕防禦健膚水18ml，同埋夜色粉霜啞緻唇膏旅行裝，侍應會按人頭送上，所以我同男朋友嚟一樣有兩set，女仔當佢係寶，我男朋友就當係草，仲好，我一個人要晒兩set。
講開侍應，呢度嘅服務都十分好，雖然食得呢類Afternoon Tea嘅地方，正常都係好有禮貌，唔會差得去邊，不過《富 Madame Fu》嘅侍應真係好有heart，搵佢哋幫我同男朋友影相，冇要求之下都係咁幫我哋轉唔同角度影咗十幾張，最後因為唔想拎住兩Set SHISEIDO行大館，問侍應有冇袋，對方亦走去搵畀我哋，服務一流，同埋《富 Madame Fu》 可能係地區問題，相對多鬼佬鬼婆，所以連其他客都好有禮貌，我哋食緊嗰陣，後面有枱法國男女，個男期間講電話一度好勞氣，一輪咀法文應該鬧緊人，其實我同男朋友冇理會，但佢哋埋單時竟然主動同我哋講對唔住。
講返主角－－－食物，無意外驚喜，但唔會令你失望，咸點個忌廉蟹肉蟹子酥盒好味，蛋糕so far so good，甜點個紅桑子慕絲紫蘇果凍就好fresh，值得一提係畀你搽Scone個Madame Fu特色玫瑰果醬，我係一個唔食果Jam嘅人，但都覺得好好食，好香，你成個口都香晒，呢個不得了，有機會記得試。
富 Madame Fu-Grand Cafe Chinois
地址: 中環荷李活道10號(舊中區警署)大館營房大樓3樓
電話: 21142118 星期一至日: 11:00-23:00
訂座：https://www.madamefu.com.hk
圖文：Alice A
版權所有，不得轉載
仲想睇下有咩好嘢食推介，就睇下👉呢到👈啦～